|
*¤!||!¤*'~` يا منيه الخاطر`~'*¤!||!¤* السلام عليكم ورحمه الله وبركاته بعد نجاح قصتي الأولى "كفايه جرحك الأول" وبعد انقطاع طويل ، فكرت اكتب قصه ثانيه و بعد معاناه و صرع مع الأفكار طلعت بهالقصه ، واتمنى تنال اعجابكم ، وسمحولي على اي خطأ املائي "تعرفون وورد 2007 يحط الكلمات على كيفه :0088: "اسمحولي نسيت النك نيم الأولاني" ------------------------------ " مــنـــيــة الـــخــاطــر" الجزء الأول 1- عائلة بو حارب:- بو حارب متوفي من 6 سنوات، ام حارب حرمة طيبه و ف حالها، حارب عمره 25 سنة، اسمراني و طويل و يشتغل ف كلية الشرطة، روضة عمرها 22 سنة ، سمره و جميله ، وهي طالبة ف الجامعة. 2- عائلة بوحمد:- "اخو بوحارب" بوحمد ريال محترم وله اسم و سمعه و يشتغل ف الجيش، ام حمد حرمة طموحه و تحب عيالها وخاصة حمد ، حمد عمره 24سنه يدرس ف امريكا، شمه 22 سنه بيضه و مليانه شوي لكن جميله، تدرس ف الجامعه، ندى 17 سنه شكلها بيبي و بعدها بالمدرسه. 3- عائلة بومهره. بومهره ريال كبير و متقاعد، ام مهره بعد حرمه كبيره و همها بيتها و عيالها، مهره عمرها 21 سنه تشتغل ممرضه، راشد عمره 15 سنة و بعده يدرس. وباقي الشخصيات بتعرفونها من خلال القصه ------------------- الفصل الاول ف الجامعه "روضه و شمه يدرسن ف جامعه الامارات بالعين و هن بنفس الغرفه" تدخل روضه الغرفه و هيه معصبه شمه: بسم الله الرحمن الرحيم ، شوو بلاج ابووويه ؟؟ ع الاقل سلمي شو داشه على يهووود؟ روضه: سلام عليج . اسكتي عني شمووه ترى مالي خلق شمه: شو بلاااج بعد ؟ كله مالج خلق!! خاطري مره اشووفج مبتسمه روضه: شموووووه و ريل ان شاء الله.. لاتقهريني افففففففف شمه: ههههههه امين امين اعرس و افتك منج .. صدق رواض شوفيج؟ روضه: منو غير الغبي ينرفزني بعد ؟ شمه: أي غبي فيهم ؟؟ خبرج الاغبيا زادو هالايام روضه تتطالع شمه بطرف عين . استاذ الmis ليش في غيره ، احرجني يدام البنااات الله يغربله. شمه: هالاستاذ مدري ليش حاط دوبه ودووبج .. حشى ماشي بنات ف الكلاس غيرج؟؟ روضه: حليلي اراويه البروجكت جان يهب بويهي شوي و بيصفعني .. شمه: الله يعينج والله.. انا مرتاحه كل اساتذتي بقر يدخلون ويطلعون ولانسمع حسهم.. و بدت السوالف بين الاثنين "شمه تخصصها هندسه اتصالات، و روضه بزنس" ---------------- ف المستفى مهره يالسه ف غرفه التمريض و ترمس ف التلفون ومهمله المرضى اللي يتريون صار لهم ساعات.. مهره: يا قلبي شو هالرمسه؟ ماشي فرق بينا .. بيزاتي بيزاتك .. عاااد كله ولازعلك .. فديت رووحك اناا . هااا لالا خخخخ غاليه: مهره لو سمحتي اتركي التلفون لاني مقدر اعاين كل المرضى بروحي.. مهره: الوو ،هاا لحظة شوي .. نعم شو تبين ؟ غاليه: اقولج اتركي التلفون و شوفي المرضى وياي انا تعبت. مهره: انزين انزين اتريي شوي .. شو كنت تقوووووول؟؟ هيه اسمعك .. صدق والله غاليه: افففففف اللهم طولج يارووح .. كم بتحملج أنا؟؟ لازم احط حد لكل هذا غاليه عصبت و قررت انها تشتكي على مهره.. ----------------- ام حمد تكلم اختها ام مهره ف التلفون .. ام حمد: من اسبوعين وانتي تقولين بزوورج وللحين ماييتي و لاشفت غبارج بعد ام مهره: شو اسوي يا وخيتي والله اني ماحصل فرصه .. ام حمد: العمر يخلص و الشغل مايخلص ام مهره: صدقتي ياختي والله بحاول ازوورج ام حمد: قولي لريلج هذا يالس لا شغله ولا مشغله ام مهره: الله يعيني على حنته ، والله مقدر اتنصخ يدامه ام حمد: الله يعينج والله،، خلاص يا وخيتي بخليج لان حمد يتصل بي ع الخط الثاني ام مهره: خلاص عيل فداعه الله ، سلمي عليه ام حمد: ان شاء الله ،فداعه الرحمن حمد: مرحبا السااااااع بام عيوون وساااااااع ام حمد: هلا عمري هلا يمه .. اشحالك فديتك؟ حمد: يسرج الحال.. علومج انتي؟ ام حمد: علووم الخير .. هاا متى بترد ؟ حمد: بعد شهر ان شاء الله.. والله مشتاااااااق للبلاد ام حمد: البلاد واهلها كلهم مشتاقين لك .. بهالوقت تدخل ندى.. ندى: وينا نحن من هالرمسه؟؟ طااح حظي ما ألقى الا الاوااامر ام حمد: انتي اسكتي بعد حاسده اخوج المسكين حمد: عندج اياااها .. الحسووود ام الخلاااقين ندى: انا ام الخلاقين يالدب ام حمد: عمى بعينج لاتقولين لولدي دب صدق يوم قال حسووده ندى: اووهوووووو انا غبيه مسويه لكم سالفه .. ادش النت احسن لي ولا اسمع سوالفكم حمد: احسن فكاااااااااااااااااااااااك ام حمد: ماعليك منها المهم انت شو مسوي ......... ------------------ حارب يكلم سالم ع المسنجر .. حارب : سلووم قووم نظهر سالم : وين بترووح ملل ماشي مكان يديد حارب: بنرووح المارينا ع الاقل بنتمشى شوي و عقب نتعشى سالم: مالي بااارض صراحه حارب: عشااان خاطري حاس بكتمه بصدري ابا اظهر سالم: امممممم خلاص قوم تلبس و اكشخ عسب نغااازل شوووووووي،، ويلي على بنات بوظبي ويل.. حارب: ماشي شغل.. انت متى بتكبر و تودر هالسوالف؟ سالم: والله انت ف عالم ثاني، منو هالايام يظهر ومايغااااااازل؟؟ حارب: اناا سالم: انت من المريخ مش من عالمنا .. حارب: خلك عنك الهذربااان وقم وروحووو الشباب المارينا ----------------------------------- ام حارب تكلم روضه بالتلفون روضه: يا يمه بلااج انتي ؟ ام حارب: طفرت يالسه برووحي روضه: عيل وين حرووووب؟ ام حارب: مدري به ؟؟ رد من الدواام ولاتغدى بعد .. و هذي انا يالسه بريحاتي روضه: الله يعينج ،، هااانت يا يمه سنتين و اتخرج و بيلس على قلبج ام حارب: يالله متى تمر هالسنتين ؟؟ اخااف امووت وانتي بعدج ماخلصتي روووضه: بعيد الشر عنج لاتقولين هالرمسه. حارب: يمه يمااااااااااااااااااااااااه ام حارب: لحظة رواض هذا حارب يزقرني روضه: اوكي ام حارب: تعااال انا هنيه بالصاله حارب: وينج يا يمه ؟؟ ساعه وانا ادور عليج ام حارب: ليش انا ياهل ادور علي ؟؟ حارب: محشوومه.. بس بخبرج انا بظهر ام حارب: وين بترووح بهالليل ؟؟ حارب: أي ليل ؟ بعدنا المغرب.. بروح المارينا ويا سلووووم ام حارب: .... الله يحفظك ،، ولاتسرع حارب: ان شاء الله ويظهر من البيت... روضه: هااا ظهر؟ ام حارب: هيه .. روضه: الله يهديه.. تدرين ان هالاسبووع مول ما رمسني؟؟ |
ام حارب: مستغربه .. من رحتي الجامعه ماتصل بج ؟ روضه: لا والله ماكلمني .. انا استغربت والله ام حارب: ماعرف .. بس اول مره يسويها روضه: برااايه انا مو ميته عليه .. ام حارب: رووضووه ماله داعي هالرمسه هذا اخووووج ومالج غنى عنه رووضه: ......... اسفه ----------------- شمه داشه المسن شمه: ليش بعد متضاايق؟؟ انا ماعندي شغل غير اراضي هذا و اعدل مزاج هذاك سيف: مو متضاايج بس تووه ناش من الرقاااد شمه: انزين شو يعني توه ناااش سولف انا ملانه سيف: اللهم طولج ياروووح انتي بلاااج ؟ لازم تنرفزيني ؟؟ شمه: خلاااص بسكت احسن .. ترى محد يتحمل مني كلمه سيف: استغفر الله .. الحين زعلت .. شمووه بس عااااااااااد شمه: مازعلت بس اقوولك ملانه من الصبح اتصل بك كله رااقد سيف: حقج علي مره ثانيه مابرقد. شمه: صدق والله؟؟ سيف: وانتي كل شي تصدقين ؟؟ صدق بقره شمه: منو بقره هااااااااااااااا يا ثووور سيف: ترى الثوور ريل البقره يعني انتي حرمتي شمه حطت الويه المستحي.. سيف: هههههههههههههههه اونه تستحين والله ولا يخصج بالحيا شمه: ليش شو تتحراني؟؟ اصلا انا خجوووووولة سيف: هيه مبين مبين شمه : سواااااااف لاتقهرني سيف: خخخ فديتج أنا المهم خبريني شو سويتي اليوم؟ شمه: ماشي والله بس اشتقت لك و اشتقت لك و ولهت عليك سيف: شموووه لاتهملين دراستج ، اباج اتييبين درجااااااات عاليه شمه: شراتك يالمصري؟؟؟ سيف: تفلي انتي عينج حاره شمه: لا والله انزين تف تف سيف: صدق ماتستحين اتفلين علي هاااا؟؟؟ يالله باي شمه: لالا والله اسووولف اسفه سيف: هههه حبيبي والله انج عسل ------------------------------- ف المستشفى صوب مهره .. يدش الفراش.. مهره د.عمر يبي انتي. مهره: عمر ؟؟ شو يبا بعد افففففف منه الفراش: يقول مافي رووح لازم مهره اييجي معاك مهره: مابضيع انزين امش .. هالعمر ماورااه الا عووااار الراس صوب غرفه رئيس القسم .. تك تك الفراش: د. عمر هذا مهره يجي د. عمر: خلااص انت روووح مهره: خـــيــر .. د. عمر: خير بويهج .. الله يسلمج كثرت الشكااااوي عليج و.. مهره: هذي غاليووووووووه ماغيرها د. عمر: عصب.. مهره ع الاقل سويلي اشويه احترام .. انتي ماتشتغلين من اتيين الدوام تهذربين بالتلفون لي تظهرين .. المفرووض تكون عندج انسانيه مهره: ليش شو شايفني حيوانه يدامك ؟ د. عمر: منصدم من ردها.. والله الكلام ضايع ويااااااااااج اشووف شغلي احسن مهره: وانا اقول جي بعد .. و تظهر عنه وهيه تتحرطم على غاليه -------------------- حمد يالس بغرفته و سرحااااان .. دش عليه ربيعه فهد فهد: حموووووووووووود حمد : اخترع . الله يغربلك زيغتني .. طااااااااح قلبي فهد: هههههه فديت قلبك انا حمد: ويلي ويلااه على قلبي فهد: اثرك عشقاااااااااان حمد: قووووووووول غرقاااااااااااااااااان و ولهااااااان بعد فهد: يوه يوه كل هذا ؟؟ ومنو هذي اللي ماخذه قلبك حمد: هذي غاليه الغاليه فهد: الحين مافهمت هيه غاليه عليك والا اسمها غاليه؟؟؟ حمد: الاثنين يالتيس فهد: تيس بعينك يالهرم ، هذا اللي يغلط علي حمد: خخخخخخ عادي لاااااا فهد : يضحك السبال ... والله ماعندي سالفه اظهر احسن حمد: لالا خلك بسوولف وياااك فهد : انزين خبرني كيف عرفتها؟؟ و وين ومتى وكيف؟؟؟ حمد: حشى تبا تعرف كل ها؟؟ تعرف ذكرتني بعمتي أم خماااااااااس فهد: عمتك ؟؟؟ حمد: خخخخخخخخخخ لالا ماشي .. الله يسلمك تذكر قبل 6 شهور قبل لا نسافر لما انكسرت ريلي، لما رحت المستشفى كانت غاليه موجوده وهيه اللي عاينتني ، بنيه حلوه ومحترمه فهد: يعني هيه دكتوووره ؟ حمد: اقوولك تيس.. هذي ممرضه ربيعه مهرووه بنت خالتي فهد: خلني اعرف غاليه عسب اعرف مهره ..المهم كمل حمد: وووبس خلصت السالفه فهد : هاااااا ؟؟ عيل شو غاليه وغاليه ؟؟؟ كيف حبيتها؟ حمد: لما شفتها حبيتها و عشقتها فهد: والله طلعت انت التيس و العنز بعد .. وانا معندي سالفه اسمعك حمد: ليش ؟؟ فهد: يعني ماتعرف شي عن البنت متزوجه ولا مخطوبه و من بنته ماتعرف عنها شي حمد: لاوالله ماعرف عنها شي فهد: عيل احلم فيها وانا ظاااااااااااااااهر باااي ---------------- بعد يومين روضه وشمه ردن البيت .. ف بيت بو حارب ام حارب: فديت بنتيه اشتقت لها والله و تحظن رووضه حارب: هيه ناس وناس روضه: حره على قلبك حارب: يفلعها بالمخده جب اسكتي ام حارب: بلااااااااااااكم غاااادييين دياااااااااااااااجه .. عفانا الله روضه: ماتشوفينه حارب: تشووفني و تموت فيني بعد روضه: الله يخليك .. صدق حرووووب ظهرني اليوووم ام حارب: وين بترووحين؟ حارب: هذا اللي ناقص بعد اظهرج ؟ انكسر ظهرج قولي امين ام حارب: بسم الله على بنتي روضه: الله يسامحك. المهم ابا اروووح بوظبي موول حارب: ليش بعد روضه: ابا اخذ اغراااض للجامعه ام حارب: شو اغراااضه الله يهدااااااج خلاص ماتم الا شهر و تخلصوون الكورس حارب:يمه تعرفين كوورس بعد ؟ روضه: ليش تتحرى امي جاهله يالجاهل؟ حارب : انتي ماتسكتيييين ؟؟ غربلج الله من بنت عليج لساااان ام حارب: بسكم عاااااااااااد صدعتو براسي روضه: شو قلت حرووووب حارب: خلاااص اشفقت عليج بوديج الساعه 5 روضه: اوكي برووح اتصل لشموووه عسب اتيي وياي حارب: انا ناااقص ميانين بعد ام حارب: هههههه الله يهديكم ------------------ ف بيت بوحمد .. كلهم متيمعين بالصاله بوحمد: ندووي شغلي التلفزيوون عسب اطالع الاخباار ندى: اخبااار الحين ؟؟ انت شوو مخرف؟ ام حمد: قووومي شغلي التلفزيوون يا ندووي بوحمد: لاتصرخين عليها شمه: يبااه هذي يبالها تكسير رااس ندى: ليش شو مسويه لج عسب تكسرين راسي؟ شمه: شو مسويه ؟؟ تراني شفت اوراااق امتحاناتج اللي داستهن تحت السرير ندى: هااااااااا ام حمد: أي اورااااق؟ شمه: اوراااق الرياضيات والانجليزي بوحمد: ليش ندى شو مسويه ف الرياضيات ؟ ندى: ماشي ماشي كل درجاتي زينه هذي تخرط عليكم ام حمد: بنشوووف الشهاااده شمه تتطالع ندى و تضحك وندى مقهووره منها ... يرن تلفون البيت بو حمد: السلام عليكم روضه: وعليك السلام ..اشحالك عمي؟ بوحمد: الله يسلمج يا بنيتي ، اخبااارج انتي؟ واخبار حارب و الوالده؟ روضه: كلهم بخير و يسلمون عليك.. شمووه موجوده؟ بوحمد: لحظة ، شمووووه هذي روووضه تباج ع التلفون ندى: حشى مجابلين بعض اسبووع وبعد تسولفون ؟ ماخلصت سوالفكم شمه: انتي جب .. وتاخذ السماعه.. هلا روااااااضي روضه: اهلين.. اقول يالدبه بروح بوظبي مول عسب نتشرى لحفلة تخرج مريوم بتيين وياي؟ شمه: والله نسيت سالفه الحفله ... هيه بيي .. متى انرووح؟ روضه: الساعه 5 ياله تزهبي ماباجي غير ساعه.باي شمه: تبند التلفون.. يمه بروح ويا رووضه بوظبي مول ام حمد: اوكي .. بوحمد: قولي للسايق عسب ايودييكم شمه: لا روضه بتمرني ندى: شمووه بيي وياااااااج ام حمد: لا بتيين وياي بيت خالتج ام مهره ندى: مابا اففف بيتهم ملل ام حمد: خلي عنج الهذرباان يالله قومي ادرسي ندى: بس اليوم الخميس يعني اجازه ام حمد: ماشي اجازه قوومي بسرعه --------------- ف بيت بو مهره تدخل مهره الصاله مهره: السلام عليكم الكل: وعليكم السلااااام .. ام مهره: احط لج الغدا يمه ؟ مهره: ماشتهي ، انا برقد لاتوعووووني راشد: عفانا الله هذي عمرها مايت البيت وهيه مبتسمه مهره: مالك شغل بومهره: خلاص يبا روحي ارقدي .. نوم العوافي مهره : تتطالع ابوها .. الله يعافيني راشد: يمه خلنا نروح بيت خالتي ام حمد ام مهره: لا خالتك بتزورنا اليوووم بومهره: ام حارب ما بتيي وياها ؟ ام مهره: والله ماعرف بخاطري اشووفها .. صار لي فتره ماسمعت اخبارها وسوالفها راشد: انزين اتصلي لخالووه عشان اتمر عليها و ايوون يميع ام مهره: خوووش راي والله و تتصل لأم حمد |
|
يسلمووووووو عالقصة الحلوووووووووووة و البداااية جذبتني واااااااااااايد |
يسلمووووووووووووو ع القصه الحلووووووووووه ونرجو المزيييييييييييييد |
يسلمووووووووو ع المشاركه |
Part 2 في بوظبي مول .. حارب: روضوو انا برووح باريس جالري بخذ لي ساعه وعقب بروح المقهى روضه: ما بتيي ويانا؟ حارب: وليش ايي وياكم؟ انتن بتدخلن محلااات حريم وانا اتفرج يعني ؟ شمه: روضه صدق فشله ، شكله غلط ف محل الحريم حارب:هذي شموه قالت لج ، لا خلصتن سولي كول روضه: اوكي الله وياك روضه وشمه ارتاحن من حنَة حارب و خذن راحتهن ف التشري شمه: روااض خلصتي والا بعد ؟ روضه: خلصت بس كنت ابا اخذ لي اكسسوارات تناسب البدله شمه: خلنا ناخذ لان صدق اتاخرنا على حارب روضه: اشووفج تحاتين حارب؟ شمه: عن الاستهبال تعرفين حارب شرات اخوي روضه: ادري سيف حبج الاول و الاخير شمه: اااااااه فديت سيف روضه: ماعندج سالفه.. طووفي اندش هالمحل واتركي عنج الخبال روضه: حارب حشرني من كثر مايتصل شمه: ردي عليه ، قولي له بنحاسب و بنظهر روضه: اوكي، روضه تحاسب ومش منتبهه للارقام اللي تضغطها "يرن التلفون" .......: ألووووووووو رووضه: حروووب نحن خلصنا انت وين؟ ......: أي حروووب بسم الله انتي ليش داشه عرض؟ روضه: هااااااا و تتطالع الرقم .. اووويه؟؟ اسمحلي اخوي انا مغلطه و تبند التلفون بويه الريال يرن تلفون ويطلع حارب : الوو هلا حرووووب حارب: يهد يا رووضووه نقعتووني 3 ساعات هلكت روضه: خلصنا فديتك نترياك صوب "هانج تن" حارب: اوكي الحين بيي روضه: اووكي وهم رادين البيت تلفون رووضه كل شوي يرن شمه: ليش ماتردين حشرنا هالتلفووون روضه: هاا هذي ربيعتي ماريد ارمسها الحين حارب: انزين يمكن تبا منج شي روضه: برمسها ف البيت حارب: انزين عطيني انا برمسها روضه: هاااا .. شو ترمسها ماترمسها؟؟ عيب يالله ------------------- ف بيت بو مهره ام مهره: والله اني ولهت عليج يا ام حارب ام حارب: وانا اكثر فديتج ام حمد : وانا محد وله علي ؟؟ ام مهره: كل يوم ارمسج واعرف اخبارج الا ام حارب منقطعه عن الدنيا ام حارب: مشاااغل يا اختي ما تخلص ام مهره: الله يعينج ، ام حمد الا حمد متى بيرد ان شاء الله؟ ام حمد: بعد شهر ان شاء الله ام حارب: ربي يرده بالسلامه ام حمد: آمين.. الا وين مهره وراشد؟ ام مهره: مهره من ردت العصر من الدوام ماظهرت من حجرتها ، و راشد ويا ولد ييرانا فلاح يلعبون كووره ام حمد: والله بنتج غير شكل ماتقول بساعد امي بعاونها موول مامنها فايده ام حارب: الله يهديها ام مهره: آمين ، تعبت من كثر مانصحها مامنها فايده ام حمد: لو اتييبينها عندي اسبووع والله لأصلبها ام مهره: الله يخليج هيه تيلس ويانا والا نشووفها عشان اتييج اسبووع ؟ ام حارب: لا تقسون ع البنيه يمكن ظرووف شغلها ام حمد: ماعليج منها هذي من قبل لا تشتغل جذا متكبره ويارب نفسي ام مهره: ربي يصلح حالها ------------------ ف بيت بو حارب ، روضه : ياربي هذا شو يبا قلنا له غلطانين ف الرقم يعني لازم ايأذيني؟ استغفر الله صدق ينرفز الواحد شمه: منو هااااا روضه: الله يسلمج لما كنا ناخذ اكسسوارات ونحن نحاسب غلطت ف رقم حارب ف اتصلت على رقم ثاني و الحين يأذيني شمه: انا اقووووووووول منو ها اللي يتصل؟ روضه: هيه وانتي حاشرتني ردي وردي شمه: وانا شو دراني.. المهم انا برووح بيتنا لاني صدق اتاخرت روضه: اوكيك ، فمان الله شمه: فمان الكريم ظهرت شمه و روضه دشت غرفتها عسب ترقد ، الساعه 3 بالليل رن تلفون روضه و بدون ماتحس ردت .. ألوووووووووو ......: حي بهالصوووووووت روضه: منوو؟ .....: سهيل طال عمرج روضه: سهيل .. ؟ ابا اناااااااااااااام و بندت التلفون سهيل: ياويلاه شكلي وعيتها من رقادها يالله بتصل باجر الصبح ----------------------- ونرووح لشمه كانت ترمس سيف بالتلفون شمه: انزين شو فيها لو ماخبرتك؟ سيف: شمامي انا قلت لج لما تظهرين خبريني ع الاقل اعرف وين رايحه وين راده شمه: ليش تشك فيني؟ سيف: اعووذ بالله من ياب هالطاري ؟ والله عمري ما شكيت فيج انا واثق فيج لدرجة ما تتخيليلنها، حبيبي انا لا بغيت اظهر اطرش لج مسج عسب احسسج انج معااي ف كل شي شمه: اممم انا غلطااانه حقك علي سيف: ماصاار شي فديتج ، المهم خبريني شو خذتي لي؟ شمه: هااا هيه من كبر مقامك ما لقيت شي بمستوااااااااك سيف: صاااااااارووخ جذاابه ماذكرتيني اصلا، حريم من يشووفن الثياب و المكياج ينسن عمارهن شمه: هههههههه حرااام عليك والله ذكرتك بس ماخذت لك شي سيف: مابا غير سلامتج يالحب شمه: الله يسلمك ---------------------- مهره داشه الجااااااات و تسوولف ويا الشباب مهره: ياربي شو هالزحمه نسيت شو قلت لهذا وشوقلت لذاك .. اوووه هذا يبا رقمي .. اول شي انت من وين؟ ذيب بوظبي: من الشامخه فديتج مهره: أشووووووووه يعني بعيد ، حي بأهل الشامخه ذيب بوظبي: الله يحيييج الشيخه.. انزين ممكن نسولف بالتلفوون ؟ تراني ماحب ايلس ع الكمبيوتر مهره: اوكي انا اقول جي بعد احسن وبدت مهره تتعرف على هذا وذاك يعني ادمااان على التلفووون والجاااااااااااات ،، طبعا محد يدري عنها --------------- |
نرووح صوووب حمد : تدري فهوووود اشتقت لبوظبي واهلها و هوااااها فهد: وانا اكثر والله اشتقت للوالده واخواني حمد: اخواااانك؟ عمرك مارمست عن اخوانك او يبت طاريهم؟ فهد: انا مش وايد معاهم بس اسال عنهم احيانا حمد: اول مره ف حياتي اعرف ان واحد مش مع اهله !!! فهد: لا يا بوووك صارت مشاكل بينا و كل واحد ف حاله الحين حمد: ولو تصير المشاكل لكن ماتفرق الاخواااااان .. الله يهديكم فهد: بلاااااااك انت نحن عايبنا هالوضع راضين مرتاحين انت ليش حااار عمرك؟ حمد: مستغرب والله فهد: ولا تستغرب ولاشي الحياه ماشيه جذي حمد: حياااتكم غريبه فهد: اووونه عائلتك مثاليه و مترابطه حمد: الحمدلله قلبنا على بعض و دوووم بينا اتصالات صح انا الولد الوحيد بس ماستغنى عن خواتي فهد: خواتي ؟ والله ماسوي لهن سالفه حمد: سبحان الله صدق حياتكم عجيبه ---------------- اليوم الثاني الصبح نشت روضه من النوم و كانت ترتب غرفتها رن تلفونها روضه: هذا بعده يتصل؟؟؟ صدق لووووعه.... والله لاسوي لك اكبر طاااااااااااااااااااف و طنشت التلفووون و حطته ف الكبت .. ونزلت الصاله صوب ماماتها ام حارب: هلا بالغاليه روضه: صبااااااح الخير يا ويه الخير.. و تحب راس امها ام حارب: صباح النور و السرور.. ناشه من وقت اليوم روضه: بسَي شبعت رقاااد قلت بيلس وياااج ام حارب: فديتج أصب لج شاي ؟ روضه: ليش تريقتي؟ ام حارب: لا والله اترياكم تنشون روضه: بزقر البشكاره تحط ريوق ام حارب: عيل انا بووعي حارب حارب: مايحتاي توعووني روحي نشيت .. يحب راس ماماته روضه: غريبه ناش الساعه 8 حارب: ماقدرت ارقد قلت بظهر روضه:خلاص عيل بزقرهم يحطون الريووق ---------------- ام مهره: مهرووه قومي تأخرتي ع الدواااااااام مهره: هااااااااا ام مهره: مهاااري الساعه 8 قومي مهره: فزت .. هاااااااااا الساعه ثماااااان ليش ماوعيتيني قبل و ترووح الحمام تتغسل ام مهره: والله وعيتج بس انتي مش راضيه تنشين مهره: انزين روحي روحي انا بتلبس ام مهره: احط لج ريووووووق؟ مهره: لا مابا شي بس اظهري عني ام مهره: ....... ع راحتج و تظهر عنها متضايجه ------------- المغرب دشت روضه حجرتها و اتذكرت التلفون لما طلعته من الكبت اتفاجأت ان سهيل متصل بها 84 مكالمه .. روضه: خيييييييير كل هالمكالمات ؟؟ شو عنده بسم الله .. و فهالوقت سهيل يتصل روضه: ارد والا لا ؟ اممم برد شو بيسوي يعني؟ ألوووو سهيل: انتي وين ؟ من الصبح وانا اتصل بج ماتردين "وكان معصب" روضه: متعجبه؟ نعم وليش تتصل ؟ سهيل: شو ليش تتصل؟؟ مره ثانيه يوم اتصل بج على طول ردي فهمتي؟ روضه: تبتسم .. لحظة لحظة انت منو ؟؟ وليش ارد عليك ؟؟ سهيل: شو منو بعد ؟ قلت لج سهيل روضه: قلت لي؟؟ سهيل سهيل: يالبيه .. هيه نعم سهيل البارح خبرتج روضه: هاا البارح ؟؟ متى ؟ سهيل: بالليل يوم رمستج قلتي لي بتنامين روضه: ؟؟؟؟ تتطالع تلفونها صوب المكالمات المستلمه !! صدق انا رديت عليه اوويه شو قلت ؟ انا يوم راقده اخربط ف الرمسه ... سهيل: الشيخه وين سرحتي؟ روضه: ولا مكاااان .. اسمحلي انا كنت راقده وماعرف شو اقوول و بالغلط دقيت على تلفونك ف لو سمحت لاتتصل بي لانك تزعجني سهيل: أفاااا والله .. ليش عاد ؟ روضه: انا مش من هالنوع واذا تبا تتعرف دش الجات و الا رقم لك وحده ع البلوتوث يالله مع السلامه ... و تبند التلفون سهيل: سكرت بويهي ؟؟ مو مشكله وراااج وراااج ---------------------- مهره تتطالع غاليه باحتقار غاليه: خير ليش جي اطالعيني؟ مهره: ليش ؟ ماتعرفين يعني؟ غاليه: لا والله ماعرف مهره: تروحين لعمر و تشتكين علي غاليه: لحظة لحظة .. انا ماشتكيت عليج و لا رمست عنج بشي مهره: جذااابه عيل منو خبره اني ارمس بالتلفووون ؟؟ محد غيرج انتي خبرتيه غاليه: والله العظيم مش انا ولو بخبر عليج جان قلت له من زمان من اول ما داومتي هنيه مهره: ماصدق.. انتي امسات كنتي معصبه و ظهرتي عني اكيد رحتي له غاليه: والله اني رحت الكافتيريا مهره: عيل منو خبره ؟؟ والله بتخبل.. لحظة الحين عرفت غاليه: شوو ؟ مهره: هذا الفرااااش هو اللي خبره .. قالولي بس ماكنت مصدقه غاليه: شو قالولج وشو مو مصدقه مهره: خبروني ان عموور الزفت يقول للفراش يسوي جوله استطلاعيه ع الموظفين عسب يشوفنا شو نسوي غاليه: معقووله ؟ ماتوقع د. عمر يقوله يمكن من نفسه يسوي جي؟ مهره: اتوقع من عمر كل شي غاليه: لا ماعتقد اكيد الفرااش يبا يثبت نفسه يدام عمر عسب جي يراقبنا ويفتن مهره: يصير .. والله لأراويك يا شمسااااااااان -------------------- اليوم الثاني شمه ورورضه روحن الجامعه شمه ترمس سيف: سواااف بس عااااااااااااد روضه تدخل الحجره: مللتي فينا سيف وسيف افففففففففف ماصارت عاد شمه: لحظة لحظة .. انتي شو مشكلتج ؟؟ يومين ماكلمته خليني اخذ راحتي الحين روضه: علينا ؟ يومين ما كلمتيه ؟؟ والله انج جذابه شمه: كلمته بالسريع يعني روضه: يعني لازم تقولين له كل التفاصيل اففف منج لوعتي بجبدي شمه: خلاص انزين.. سيف حبي بعدين برمسك اوكي ..باي.. هااا بندت التلفوون ارتحتي؟ روضه: لا حااسه بضيج و كتمه بصدري شمه: ليش فديتج؟ شوفيج روضه: مادري والله.. شمه: صدق روااض شو صار على هذاك اللي غلطي برقمه؟ روضه: اسكتي وانا راقده اتصل ماعرف كيف رديت عليه ومدري شوقلت له شمه: الله يغربلج تحفه انتي روضه: اتخيلي اتصل بي 84 مكالمه شمه: شووووووو.؟؟؟ ماصدق روضه: والله العظيم .روحي انصدمت وعقب رديت عليه اونه يهزبني يقول مره ثانيه ردي لما اتصل بج و اسمه سهيل شمه: اسمه حلوو.. و بعدين شو صار؟ روضه: شو بيصير يعني ؟ قلت له لاتتصل وبندت التلفون شمه : ماعندج رومانسيه مالت عليج روضه: انتي مينونه ؟ أي رومنسيه واحد ماعرفه اقوم اسولف ويااه شمه: وشو فيها يمكن محترم وولد ناس روضه: اسكتي الله يخليج أي محترم ف هالزمن؟ الله يستر علينا و عليه ------------- |
السلام عليكم ورحمة الله وبركاته الصراحة القصة روعة وطررررررر ياريت اتكمل الباااارت با اسرع وقت ومشكور ^^ |
part 3 حارب يرمس حمد ع المسن حمد: حرووب ليش قاطع ؟؟ ولا تسأل حارب: شو اسوي ياخووك ؟ مشاااااااغل والله حمد: اشحال الوالده و روضه؟ حارب: الحمدلله بصحه ويسلموووون عليك حمد: افففف هالشهر متى بيمر والله انه كريه حارب: الله يعينك.. كم سنه باقي لك عسب تتخرج؟ حمد: باقي لي كورس واحد و اتخرج حارب: والله مرت الاربع سنوات بسرعه حمد: أي بسرعه ؟؟ تراني انا ف الغربه و انا احسب الايام و الساعات حارب: منو ضربك على ايديك وقالك سافر؟ حمد: تدري ان الوالد كان يتمنى يشوفني مهندس ومابغيت اخيب ظنه حارب: انزين الدوله فيها جامعات و كليات ادرس هندسه يعني تغربت بالفاضي حمد: شو اقووول .. ما فكرت بهالشي قبل .. كنت اقول شهاده من امريكا يعني قويه حارب: الله يعطيك.. اترك الدراسه و خبرني فهد بعده وياك حمد: هيه بعده وياي حارب: مدري كيف تتحمله ! ممل و احس انه نذل حمد: لاتقول جذا عن الريال .. انا ماشفت منه الا كل خير حارب: اخاف تنصدم به و تقول كلامك صدق يا حارب حمد: لا ان شاء الله ما نصدم بأحد ------------------- مهره ترمس بالتلفون دخل عليها اخوها راشد راشد: مهرووه من متى عندج تلفونين؟ مهره: هااااا انت من متى هنيه؟ و كيف تدخل من غير ما تستأذن؟ راشد: والله دقيت الباب و من متى ؟؟ اممم من دقيقتين مهره: انزين شو تبا ؟ راشد : سلامتج حاطين عشا و قلت بزقرج .. صدق من متى عندج تلفونين مهره: من اليوم ليش فيها شي؟ راشد: لا بس ماله داعي تلفونين مهره: له داعي .. واحد للدوام و الثاني للربع راشد: قصدج ربيعاااتج ؟ مهره: هيه هيه ربيعاتي عيل منو غير ربيعاتي راشد: محد قومي نتعشا و لاتقولين مابي لان ابوي بيعصب مهره: اوكي انت روح وانا بيي وراك .. و ظهر راشد مهره : الوووووو لالا هذا اخوي الصغير.. ماعليك منه ، يقولي حاطين العشا .انا مابا اتعشا . بسولف وياك عقب برووح و بهالوقت يرن تلفونها الثاني .. امممم خلاص بروح عن يحشرووني بعدين بكلمك... و ترد ع التلفون الثاني : هلا وغلا وينك ؟؟ من الصبح وانا اترياك؟ ليش قاطعني؟ لالا انا زعلانه منك.. بتراضيني؟؟كيف؟ اشووفك ف شقتك ؟ لالا قويه عمري ماطلعت ويا احد .. انزين نتلاقى ف موول ، مطعم ؟ أي مطعم؟ اهاا عررفته خلاص اشوفك هناك نص ساعه واكوون عندك ------------------- الساعه 12 بالليل روضه يالسه ف البلكونه وكانت وايد متضايجه و حاطه اغنيه خالد عبدالرحمن آهات :- آهات من طول العنا طاولتني .. ونفسي من الفرقا وحالي سخيفه .. جارت علي من الفراق وقصتني .. غزت ولكن مانوت بالنكيفه.. همومها اللي شفت منها كوتني .. هذا الذي خلا حياتي مخيفه.. باكر يروعني وانا فيه فتني .. واقول ليت الغيب يبخل بحيفه.. خير السعادة بالهوا خالفتني .. خالفت معها عيد قلبي وريفه.. هبت هبوبن بالنيا عطشتني .. وكم غالي قبلي ظما من وليفه.. بهالوقت اتذكرت تلفونها لما دشت الحجره كانت شمه راقده .. خذت روضه تلفونها من الكبت و كانت تتطالع الرسايل و المكالمات و كانت نص المسجات من سهيل و متصل لها 7 مكالمات روضه ف هالوقت كانت بعالم ثاني مهمووومه لدرجه انها تريد تبكي و كانت تقرا مسجات سهيل .. -" والله انج غير عن البنات و هالشي يعيبني فيج .." -" ردي علي والله ماريد منج شي بس ابا اسمع صوتج" -" يا شوق!!! سر عنده و قله: إني رفيقه لو يطول الزمان! ياشوق!!! سر عنده وقله: إن قلبي لشوفته يتقطع مثل الحبال! ياشوق!!! سر عنده وقله: حبي له يتعدى أحجام الجبال!" - " ليتـــك تحــس بلهفــة خاطـــري في غيــــابـك حتـــّي الشفـــايف تهمــس بشــووف وأنيــن: يا قلـــب ويـــنهم احبـــــابك ؟!؟ يا تـــري نســـوا الوصـــل وشــوقك والحنيــن؟ شو يبا هذا بعد ؟؟ ليش يزعجني ، قلت له ماعندي هالسوالف.. و دشت الحجره عسب ترقد لكن ماياها رقاااد تمت تتقلب للساعه 2 ونص حست بتلفونها و كان سهيل متصل .. روضه: ألووو سهيل: هلا روضه: اهلين.. نعم ؟؟ بغيت شي؟ سهيل: ابا ارمسج روضه: وليش ترمسني؟؟ ياخوي قلت لك مارمس حد لا تزعجني سهيل: والله بعد هالمكالمه مابتصل بس اسمعيني ابا ارمسج روضه: انزين انا سهيل: دخيلج .. دخيل والديج بس هالمره روضه: ....... اوكي و ظهرت من الغرفه سهيل: ليش ساكته ؟ روضه: ماعندي شي اقوله .. وانت قلت بتتكلم مش انا سهيل: لا تعصبين انزين كلتيني روضه: .......... قول شو عندك سهيل: احس بج ضايقه.. شوفيج يالغلا روضه: مافيني شي قول شو عندك ياسهيل سهيل: ووويه ماكنت ادري ان اسمي جذا حلوو الا لما نطقتي به روضه: ........ توهقت .. شوهالرمسه ؟؟ اذا ماعندك شي انا ببند االتلفون سهيل: وانتي كله تبندين بويهي؟؟ ويهي احترق تكسر تحطم ارحميه شوي روضه: هب ويه كل هذا استوى فيه وبعده موجود سهيل: هيه بعده .. انزين خبريني ليش متضايجه ؟ روضه: مدري والله حاسه بكتمه و خنقه سهيل: من شو ؟ حد ضايقج والا زعلج بكلمه؟ روضه: لا والله بس يمكن اني تذكرت الوالد الله يرحمه سهيل: الله يرحمه .. لا تضايقين بعمرج ادري غالي عليج لكن ادعي ربج ان ينور قبره و يجمعج وياه ف الجنه ان شاء الله. روضه: آمين الله يسمع منك .. المهم خبرني انت ليش تتصل بي ؟ سهيل: والله ماعرف شو اللي خلاني اتصل؟ حسيت انج غير عن باجي البنات و انج من عايله محترمه روضه: من عايله محترمه و تزعجها؟ ؟ غريب امرك .. انت مبين عليك مغازلجي و راعي سوالف و حركات. سهيل: ههههههههه كل هذا مره وحده ؟؟ لالا مغازلجي ع الخفيف و اعرف شوية بنات بس روضه: شوويه .؟؟؟ بذمتك كم بنت عرفت للحين؟ سهيل: ويلااااااه خليها مستوره احسن .. رووضه: ماشي الا تخبرني سهيل: والله وبصراحه من غير ماجذب عليج .. من كان عمري 14 وانا ارمس بنات من بنت لبنت يعني قولي تقريبا عرفت 40 او 50 بنت .. روضه: ....... منصدمه .. نعم ؟ من كان عمرك 14 ؟؟؟ وين اهلك مايدرون عنك؟ سهيل: أي اهل؟؟ اهلي اشوفهم لما اريد بيزات وووبس روضه: بس لما تبا بيزات تشوف اهلك ؟ دنيا غريبه والله سهيل: شوفيج يابابا انتي ما تعرفيني ولاتعرفين اهلي ف مابتعذريني روضه: ليش انت ولد منو ؟؟ من أي قبيله سهيل: انا سهيل بن محمد بن ........ الـ ...... عرفتيني ولد منو ؟ روضه: منصدمه لكن مسويه نفسها عادي .. والنعم سهيل: نعم بحالج .. عسب جذا انقهرت انج ماتردين علي وانا البنات يتمنون نظره مني ! روضه: الحين تشوف نفسك لأنك ولد ..... لعلمك ماتهمني البيزات ولا المناصب ولو على قولتك البنات يموتن عليك هذوول صدق فاضيات وماعدهن سالفه |
سهيل: "عصب" ماعندهن سالفه ؟؟ ليش طايح من عينج ؟ روضه: ماكنت فيها عشان اطيح .. سلم على ربيعاتك و الا اللي تشتريهن ابيزاتك ..بااااي سهيل: هذي ليش عصبت ؟؟ انا ماقلت لها شي !! والله انا متعب عمري وياها .. طااااف اللي يابها اييب غيرها .. مابتصل بخليها تترجاااني عشان اكلمها.. عيل انا سهيل تبند بويهي و تذلني .. بتشوفين يا ... شو اسمها؟؟؟ --------------- نروح لسيف .. سيف ساكن ف الشارجة وهو اصغر اخوانه ويدرس ف تقنية الشارجة تخصص بزنس أي تي و متفووق ماشاء الله عليه.. سيف يرمس ربيعه عبدالعزيز ع المسن .. "عزوز يدرس ف بريطانيا " عزوز: اشتقت للبلاد يا سوااااااااف سيف: هيه والله البلاد مب شي من دووونك عزوز: خرااااااااااااااط .. هذا انت ويا الحب وناسني سيف: لا والله دوم على بالي ماتنسى عزوز: كيف عرفت شمه ؟ سيف: من المنتدى .. سجلت ف منتداي و عيبتني الخواطر اللي تحطها نفس المشاعر و الاحاسيس اللي تييني .. ضفتها ع المسن و بعد معاناه سولفت وياها و تعودنا على بعض و حبيتها ... النهايه عزوز: يا حظك سيف: ليش؟ عزوز: اتمنى تكون عندي حبيبه تحس فيني و تخاف علي و اتداريني .. سيف: قوم تعرف لك على بريطانيه .. خخخخخخخخخ عزوز: وووععععع خلنا على بنات البلاد احسن.. الا ماخبرتني ما فكرت تخطب شمه ؟ سيف: والله فكرت بس بعدني ادرس تدري يبالي سنه لي اتخرج و عقب اشتغل يعني الموضوع مش سهل عزوز: هيه والله يباله .. بس لاترووح عنك البنيه سيف: هذا اللي احاتيه .. شمه بدويه اخاف اهلها يجبرونها على احد من اهلها عزوز: الله يعينك يا سوااااااااااف ----------------------- اليوم الثاني الظهر شمه وروضه ف الكليه .. شمه: بلاااااااااج مسطله روضه: مارقدت يا شمامي شمه: ليش؟ روضه: حسيت بضيجه و كرهت عمري شمه: افاااااااااااا وانا بنت عمج شو مضايق بج روضه: ماعرف والله و سهيل الغبي زادني شمه: شو يخص سهيل؟ روضه: اتصل بي البارح و قهرتني رمسته شمه: شو قال بعد ؟؟ روضه: يقول انه يكلم 40 او 50 بنت و اهله مايعرفون عن شي وفوووق هذا صدمني انه ولد ............. شمه : هااااااا ماصدق يمكن جذااااااااااب روضه: يصير بس مبين من كلامه انه صدق .. تدرين شو سويت؟؟ بندت التلفون بويهه شمه: الله يغربلج يا روااااااااااااض هذا بيطيرج روضه: فديتج لو هو ..... انا فلاحيه عيووني مايرووم يسوي شي شمه: فديت الفلاحيه انا .. والحين شو ناويه تسوين روضه: ولاشي .. طااااااااااااااااااااااف شمه: مادري بج والله سوي اللي يريحج بس لازم ما ياثر عليج وعلى دراستج روضه: طالعو منو يرمس ... انتي قولي لعمرج هالرمسه شمه: فديتج الامتحانات بعد اسبوعين لازم اشد حيلي شوي عشااان ارفع راس ابويه روضه: هيه والله لازم ندرس .. ومانخلي سيف و غيره و اقصد سهيل يأثرون علينا شمه: صدقتي يا بنت عمي ----------------------- |
ها البارت الصراحة كان خطيييييير نبغي انجوووف التكمله لا اطول علينا ^^ |
part 4 نرووح لحارب .. يالس بغرفته و يفكر باللي شافه البارح .. دشت عليه امه ام حارب: حارب يمه شو بلاك يالس رووحك حارب: ماشي فديتج ام حارب: بشوو تفكر يا بوويه حارب متردد يخبر امه والا لا .. اخر شي قرر انه يخبرها و يريح ضميره حارب: يمه البارح ظهرت ويا سالم و تعشينا ف قصر الهند ام حارب: انزين وبعدين.. حارب: تدرين شفت مهره هناك ومعاها واحد ام حارب: ......... منصدمة ما تعرف شو تقول حارب: نحن يالسين تحت وهم شكلهم مخلصين وشفتهم نازلين من الدري و ايده بايديها .. ف البدايه تحريت انه خطيبها بس اللي تعجبت منه انه طلع سلطان اخو سالم ربيعي ام حارب: هاااااا .. و مهره كيف عرفته؟؟ حارب: مادري مادري .. مول ماتوقعت من مهره انها توصل لهالدرجه ام حارب: تتذكر كلام ام حمد و ام مهره عن مهره لما كانت ف بيتهم .. ما كانت متوقعه لكن اذا الحين بتصدق أي شي ينقال .. حارب: يمه بتخبرين امها؟؟ ام حارب: شو اقوولها؟ بنتج راعيه سوالف و تظهر ويا شبااااب؟؟ ماقدر حارب: صح قوية ف حقها بس لازم نتصرف نسوي شي.. ام حارب: ماخبرتني سالم شو سوا لما شاف اخوه ويا مهره.؟ حارب: سالم متعود على صياااعه سلطان يعني كان شي عادي بالنسبه له .. وانا ماقالت له اني اعرف مهره ام حارب: خلني افكر بعدين بخبرك شو نسوي -------------------- غاليه: مهره شوبلااااااااج مستانسه؟ مهره: اممممممم تعرفت على واحد حلوو و وسيم و كلامه يذوووووووووووب ، شكلي بودر الباجين عشااانه.. وفوق هذا البارحه عزمني ع العشى غاليه: ..... واهلج يدروون؟ مهره: روحي زين . شو يدرون ما يدرووون تبينهم يذبحوني؟ غاليه: اذا تدرين انهم بيذبحونج ليش تسوين هالسوالف؟ مهره: اووووووه اسكتي سديتي نفسي الله يسد نفسج انتي محد يكلمج احسن غاليه: احسن و احسن .. على فكره عندج مناوبه من العصر للساعه 11 بالليل مهره: لا ماريد غلوووي فديتج بدليني غاليه: تووه تتحرطمين علي و الحين تتفديني ؟؟؟ ليش مواعدتنه اليوم؟ مهره: مقهوره من غاليه .. هيه مواعدتنه و يمكن انروح ميناء السلام غاليه: يا عيني ميناء السلام .. بس ماعتقد تظهرين لان اليوم مناوبتج مهره: الله يغربلج .. و تظهر عنها ----------------- بالليل شمه و روضه يتعشن .. يرن تلفون روضه روضه: اووهووو هذا شو يبا متصل؟ شمه: منو هاااااا؟ لاتقولين سهيل روضه: هيه هو ليش في غيره ؟؟ شمه: لاتردين روضه: منو قالج اني برد اصلا .. كملي عشااااااااااااج عشااان ندرس شمه: سوااف من العصر ماتصل بي روضه: منو يقول بنسوي لهم طاف؟ شمه: مقدر رواااض هذا حبي روضه: مالت عليج وعلى حبج .. وانا اقول شمووه عقلت شمه: ههههه حرام عليج وانا مينونه الحين؟ روضه: اصلا مافيج عقل شمه: جب جب انتي العاقل الحين -------------- نروح لبيت بو حمد يالسين بالصاله و يتعشوون .. بو حمد: ندى شوفيج بابا؟ ندى: مافيني شي ام حمد: من الصبح على هالحاال ماتكلم احد ولاتاكل شي بوحمد: ليش ابويه شي مضايقج والا احد زعلج ندى: لا والله مافيني شي .. ونشت عن الاكل ام حمد: ماعرف هالبنت شو سالفتها لا أكل ولا شرب بوحمد: يمكن مشتاقه لاختها ام حمد: يمكن والله .. اليوم ماكلمت شمووه مادري بها شو سوت بوحمد: الله يوفقها بامتحاناتها .. ما بتنزل هالاسبوع ؟ ام حمد: لا والله ماعتقد تقول تبا تدرس بوحمد: ع راحتها بس لو احتايت شي تخبرنا ام حمد: ان شاء الله باجر بكلمها بوحمد: حمد بيرد بعد اسبوعين؟ ام حمد: هيه فديت ولدي تولهت عليه .. البيت مايسوى من غيره بوحمد: هيه والله حمد غير .. حنون وقلبه طيب ام حمد: ربي يرده بالسلامه بوحمد: آمين ------------------ نروح لبيت بومهره .. راشد: يمه تدرين ان مهره عندها تلفونين؟ ام مهره: لا والله ماعرف .. راشد: امسات دخلت عندها عسب ازقرها ع العشا كانت ترمس بالتلفون و حذالها تلفون ثاني سألتها من متى عندج تلفونين وحق شو ؟ قالت للدوام ام مهره: انزين يمكن صدق للدوام ؟ راشد: انزين تلفون واحد يسدها لي يعني رقمين ؟؟ وبعد كله حابسه نفسها ف الحجره و اذا ظهرت ماتخبر احد ولاتقول وين رايحه ومتى بترد ؟ ام مهره: راشد لاتسوي لنا سوالف .. عن يسمع ابوك هالرمسه و يمنعها عن الدوام مره وحده راشد: والله يسوي فينا خير .. هالبنت من اشتغلت اتخبلت مدري اللي وياها خربوها و الا شو اللي صار بالضبط ؟ ام مهره: ............ تدري ان بنتها تسوي شي بس ساكته وما تتصرف ولاتقول لها شي راشد: وين سرحتي يا أمي؟ ام مهره: وياااااااااااك يا بووويه .. تعوذ من ابليس ولاتشك باختك ترى مافيها شي.. راشد: شاف ان ماشي فايده يرمس امه .. خلاص رووحي بتصرف ------------- |
الساعه 2 بالليل روضه تدرس و شمه تكلم سيف ع البلكونه .. فهالوقت اتصل سهيل روضه: اوهووو هذا صدق آذاني ... وردت ع التلفون ... نعم سهيل: حي بهالصوووت .. في ذمتيه انه وحشني مووت روضه: ف خاطرها وحش يبلع وافتك منك .. خير شو تبغي؟ سهيل: ليش معصبه ؟؟ وبعدين البارح ليش بندتي التلفوون بويهي؟ روضه: انت ليش تتصل؟؟ والله انك حشرتني لاتتصل دخيلك طفرت بي سهيل: أفاااا والله .. لهالدرجة منزعجه مني؟ روضه: هيه واكثر من ما تتصور سهيل: ..... بس انا ابا ارمسج والله ان ذبحني صووتج روضه: ف خاطرها تقول انا متعقده من صوتي مادري تجذب على منو؟؟ لو سمحت لآخر مره اقولك لاتتصل والا بعطي الرقم لاخوي سهيل: عطيه والله عادي .يعني شو بيسوي؟ روضه: مع السلامه و تبند بويهه التلفون .. سهيل: افففف على هالعناد تخليني اتعلق بها زياده ... بس ليش انا متعلق فيها و ذال عمري؟؟ عندي غيرها ملايين .بس لالا انا ابا هذي ----------------------- مرت الايام و بدت امتحانات روضه و شمه وبهالوقت راشد و ندى خلصت امتحاناتهم ام حمد: شمووه فديتج كلمتي ندووي؟ شمه: هيه يمه بس ماترمس شرات قبل ماعرف شوبلاها ام حمد: والله اني احاتيها ما عرف شوبلاها .. لا اكل ولا شرب وماتيلس ويانا مووول شمه: ليش كل هذا انزين شو مستوي؟ ام حمد: والله مادري شوفيها فديتج كلميها شمه: ان شاء الله بكلمها الحين ام حمد: لا الحين راقده كلميها العصر شمه: العصر عندي امتحان .، خلاص برمسها بعد امتحاني ام حمد: ربي يوفقكم و يسهل امتحاناتكم شمه: آآمين روضه: شو مستوي شموه؟ شمه: ندووي متغيره من كم يوم ماتكلم احد ولاتاكل روضه: اخاف عشقاااانه شراتج شمه: ندوووي ماعندها هالسوالف يالدبه .. اكيد فيها شي بس شوو ؟ روضه: ماعرف والله شمه: سهيل مايتصل بج ؟ روضه: امبلا يتصل بس مارد عليه و كل يوم فوق 10 مسجاااااااات شمه: والله انه غريب ماتسوين له سالفه بس ليش بعده يتصل؟ روضه: مادري به ؟ ---------------------- حمد: فهووود ماباقي غير 4 اياااام ونرد البلاد فهد: هيه مرت الايام بسرعه حمد: شو بسرعه الا كانها سنه مش 6 شهوور فهد: لا تبالغ .. المهم شو ناقصك الحين ؟ حمد: ابا اخذ هدايا لأهلي ماخذت لهم شي فهد: انا بعد ماخذت لهم شي حمد: عيل شو رايك نظهر العصر عسب نتشرى فهد: اوكيك والله ماعندنا شي حمد: عاد الله يعينا على الحريم .. بيحشرنا هذا حلو وهذا هب حلوو فهد: هيه والله نحن مانعرف لاغراضهن حمد: افكر اخذ لخواتي مكياج فهد: وانت تعرف شو ينفع وشو ماينفع ؟ اصلا تعرف للمكياج حمد: وانا شو دراااااااني ؟؟ بنسأل فهد : اخاف يشكوون فينا ؟ يقولون رياييل داشين محلات حريم حمد: الله يغربلك يالهرم اسكت فهد: هههه حموود لايكون انت .. حمد: اتخسي ريااال غصبن عنك لو انت شاك بعمرك هذا شي ثاني فهد: لا حشى علي ... خلاص انا بروح و نتلاقى العصر ------------ حارب و سالم يالسين بالمقهى ... حارب: سلووم اشحال سلطان اخوك ؟ سالم: الحمدلله بصحه وعافيه حارب: بسألك منو هذيج اللي كانت ويا سلطان هذاك اليوم سالم: أي وحده فيهن .؟ تعرف سلطان عنده 20 وحده حارب: يوم كنا ف قصر الهند سالم: اللي عرفته ان اسمها مهره تشتغل ممرضه حارب: ......... مقهووور سالم: ليش يعني عيبتك ؟ حارب: لالا سالم: انا اقوول بعد هالاشكال هب من مستواك حارب: ليش تقول هالاشكال؟ شو بلاها البنت سالم: الله يستر عليها حارب: خبرني شوبلاها؟ سالم: هذي كانت ربيعة منصور ولد خالتيه وشافت سلطان جان يعيبها و تعرفت عليه .. و الحين ودرت سلطان عشان مادري منو بعد .؟ يعني تتنقل من واحد لواحد حارب: منصدم كل هذا يطلع من مهره؟؟؟ انزين وسلطان شو سوا لما تركته ؟ سالم: عادي.. هو يعرف انها من هالنوع يعني يظهر وياها كم يوم و عقب يعرف غيرها .. يعني الاثنين نفس الطينه حارب: الله يستر علينا وعليهم .. تم حارب يفكر ف بومهره و امها و ان شو موقفهم لو عرفو عن بنتهم .. --------------- |
part 5 شمه روحت الامتحان و تمت روضه روحها تدرس .. تعبت و راحت للبلكوونه عشان تغير جو.. كان الهوا بارد و السكن هادي .. اتذكرت سهيل روضه: غريبه من امس ماتصل ولا طرش لي أي مسج ؟ يمكن صار له شي ؟ امممم اطرش له والا اسال عنه ؟؟ لالا شو يخصني؟ اصلا انا اباها من الله .. بس امممممم ماعرف والله اوهوو بطرش مسج وخلااص ، ف طرشت له تصـّـور كــذا .. و حنــا بعــاد .. يصيـــر شــي ما تتوقعــه .. يا خذ امــــانتــي رب العبــاد .. و يختفــي صوتــي و ما تسمعــه .. تصـّـور لو يجــي هاليــوم .. و تنــدم على ما فــات .. و تتحســر على فراقي .. و تــزيــد في صــدرك همــوم .. و تبـكـــي فراقــي .. بس .. بوقــت متأخـــر .. قلـــي وقتهـــا بـتكـــون مرتــــاح ..؟؟ و لما وصل لسهيل التقرير توقعت روضه انه بيتصل لكنه ماتصل ولا سوالها سالفه .. انصدمت انه ماسوالها سالفه و تمت اتحاتيه ، يمكن استوى به شي ؟؟ قامت اتصلت فيه لكنه مارد و اتصلت مره ثانيه سهيل: .. أألوووو روضه: سهيل سهيل: هااا .. منو؟ روضه: ليش ماترد علي ؟؟ شو بلااااااك؟ سهيل: نش من رقااده وتوه يستوعب .. هلا كنت راقد فديتج روضه: حست انها غبيه لنها اتصلت و ندمت .. اهاا انزين بخليك مع السلامه سهيل: لا والله ما تبندين .. انا ماصدقت اسمع صوتج .. بس غريبه ليش متصله؟ روضه: اممم ماتعرف شو تقول .. لا بس سهيل: بس شو ؟؟ تكلمي يعلني افداج روضه: بصراحه كنت احاتيك و قلت بتخبر عنك سهيل: فديت اللي تحاتيني .. والله ان فيج الخير يوم سألتي عني روضه: حاسه انها توهقت .. انزين خلاص كمل رقادك سهيل: ماريد روضه: ليش؟ سهيل: ابا اسولف وياج ابا اعرف انتي منو و شو قبيلتج ؟ روضه: ... ريم الفلاحي سهيل: عاشت الاسامي يا شيخه الحريم.. كم عمرج ريمووه؟ روضه: 22 سنه وانت كم عمرك؟ سهيل: انا بعد 22 سنه روضه: العمر كله .. تشتغل يا سهيل؟ سهيل: ليش اشتغل ؟؟ عندي بيزات تكفيني ل100 سنه يدام روضه: بدينا بالخقه اففففففف .. سهيل: والله مش خقه .. وبدت بينهم السوالف ، تعود سهيل انه يتصل لروضه كل يوم وهيه تعودت عليه ------------------ خلصت الامتحانات و روضه و شما ردن البيت .. ف بيت بوحمد الكل مختبص ام حارب: فديتج شموووه خبري البشكاره تنظف الميلس و الصاله لان بالهن تنظيف ام حمد: هيه والله صدقتي شمه: ان شاء الله خالوووه الحين بخبرها روضه: ندى بلاج متضايجه ؟؟ ماحس انج مستانسه بردت حمد ؟ ندى: بدون نفس .. بالعكس مستانسه ام حمد: تتطالع ام حارب .. مادري اشفيها هالبنت من شهر على هالحال ام حارب: مافيها الا العافيه .. و تخزها بعينها يعني لاترمسين يدام البنت روضه: عادي خالووه يمكن نفسيتها تعبت من الامتحانات ام حمد: ماعرف والله .. بوحمد: الحريم شو مسويات ؟ حارب: ياربي البيت صدق معتفس .. هب حمد بيينا اللي يشوف البيت يقول شيخ بيي ام حمد: فديتك ولدي شيخ ربي يحفظه شمه: اوهوووووو حشرتنا امايه ... ندري تحبين حمد خلاص لاتذلينا روضه: مشكله اللي يغارون مر اليوم بسرعه و الساعه 2 بالليل وصل حمد المطار و حارب وبوحمد راحو المطار يستقبلونه. حارب: عمي هذا حمد .. ويأشرون لحمد حمد: هلا ابوويه ويسلم على ابووه وولد عمه ويردون البيت ف البيت الكل يتريا و وصلو الرياييل الساعه 3 و ربع بالليل .. حمد يروح لأمه و يحضنها وام حمد تصيح شمه: بدا الفلم الهندي . متى ايي دورنا وانسلم ؟؟ بسكم من الصيااح ام حارب تسلم على حمد و تتحمد له بالسلامه شمه: وحشتنا ياخوووي والله البيت مايسوى بدوونك روضه: لازم الغايب له وحشه ... حمد: ندوووي ليش ساكته؟؟ والا فيج رقاد؟ ندى: هاااا لالا مابرقد -------------------- اليوم الثاني .. الساعه 9 الصبح تلفون روضه يرن شمه: رواااااض نشي ..روووضه روضه: هااااا شمه: تلفونج حشرنا ماروم ارقد روضه: تتطالع التلفون .. هلا سهيل سهيل: وينج ريمووه ؟؟ من البارحه ماسمعت صووتج والله تخبلت روضه: سوووري اتشغلت شوي سهيل: هذا مش عذر ع الاقل طرشي لي مسج روضه: حقك علي.. بس صدق انشغلنا بردت ولد عمي من السفر سهيل: ولد عمج ؟؟ لايكون شفتيه ويلستي وياه ؟ روضه: هيه .. سلمت عليه ويلسنا كلنا بالصاله نسمع اخباره وسوالفه سهيل: ..... "مقهور" يعني مسوية لي طاف بسبت ولد عمج ؟؟ روضه: لايرووح فكرك بعيد حمد شرااات اخوووي سهيل: اوكي اوكي انا بخليج روضه: سهيل شو بلاااااااك ؟ سهيل: ماشي .. مع السلامه روضه: باي.. شوبلاه هذا ؟؟ حشى مايسوى علي ؟؟؟ شمه: هااا خلصتي مكالمتج المزعجه ؟ روضه: جب جب شمه: شوبلاه سهيل بعد روضه: ماعنده سالفه .. اونه ليش ماسألتي عني و عصب لما عرف اني سلمت على حمد وسولفت وياه شمه: هذا غيوووووووور روضه: قولي ماعنده سالفه شمه: تحبينه رواااض؟ روضه: لا ماحبه شمه: شووو ؟ عيل ليش تكلمينه؟ روضه: لأني احس ان هالانسان ضايع ومحتاااي احد يساعده شمه: والله انتي اللي ماعندج سالفه.. ليش تعلقين الرياال بج و انتي ماتحبينه روضه: قلت لج ابا اسااعده لان هالانسان صدق ضايع حياته مالها معنى شمه: ماقتنعت بهالرمسه .. المهم قومي بننزل تحت تلاقين قوم امي يتريوونا روضه: اوكي بروح اتغسل شمه: وانا بوعي ندووووي ---------------- |
ف بيت بو مهره .. ام مهره: مهاري يمه اليوم بنروح بيت خالتج ام حمد عشن نتحمد لحمد بالسلامه مهره: اووه مالي خلق بومهره: شو مالج خلق؟؟؟ روحي سوي الواجب ويا ولد خالتج راشد: مهره من متى تعرف الواجب و العيب؟ مهره: انت اسكت محد رمسك ام مهره: ماتستحون تتضاربون يدامنا؟؟ انا قلت بنروح يعني بنرووح مهره: اففففففف غصب يعني؟ راشد: هيه غصب بتروحين ويانا ام مهره: يالله قومي بدلي ثيابج عسب نروح مهره: هااا الحين؟ بومهره: هيه الحين لان مو متفيج اوديكم عقب مهره: وانت متى تفيجت ؟؟ اففف عايلة تلوع بالجبد و تروح غرفتها تبدل ثيابها ف بيت بوحمد الكل يالسين بالصاله .. ام حارب: حارب يمه قوم بنروح البيت روضه: ليش يمه خلينا يالسين ام حمد: ليش مستعيله ؟؟ خلكم ويانا ام حارب: لا يمه بسنا من البارحه وياكم ماخذتو راحتكم بوحمد: شوهالرمسه يا ام حارب هذا بيتكم و مكانكم حارب: ماتقصر عمي حمد: خالووه دومها مستعيله و وسواسيه بعد .. عيل انتو مخربين علينا؟؟ شمه: هيه والله خالوه وسواسيه روضه: بلاكم حاطين على امايه ؟؟؟ ماتستحون ام حمد: هيه والله ماتستحوون ام حارب: خليهم ياختيه ماقالوا شي الا سوالف حارب: لالا هذي مش سوالف وانا عصبت ،امي قومي بنرووح هذيل مايبوونا حمد: لا والله اسوولف ورفجه ياخالووه ماتظهرووون عنا ام حارب: الراي راي حارب حارب: ماتشرف اتم حمد: يالهرم غصبن عنك بتم وانت تضحك بعد "اباك ف سالفه عقب" شمه: هاا شوو؟؟؟ أي سالفه ؟؟ امي لايكون حمد متزوج ونحن ماندري ام حمد: فال الله ولا فاااااالج حمد: هيه امي ماكنت بخبرج بس شموه خربت المفاجأه.. انا ماخذ صوماليه الكل : هههههههههههه خسك الله قول امريكيه ف هالوقت ام مهره وعيالها وصلو .. البشكاره تدخل الصاله وتخبر ام حمد ام حمد: ختيه ام مهره وصلت .. شباب روحو الميلس ام مهره: السلام عليكم ام حمد+ ام حارب : وعليج السلام و الرحمه مهره: السلام عليكم شمه: وعليج السلام و سلمت عليها روضه: هلا مهره شحالج؟ مهره: الحمدلله الحريم ييلسن بالصاله و تبدا السوالف .. البنات يسولفن و مهره ساكته ماتتكلم مهره: خالوه عيل وين حمد ؟ ام حمد: ف الميلس فديتج مهره: بروح اسلم عليه الكل استغرب من رمست مهره .. ام حمد: تفضلي البيت بيتج وانتي هب غريبه طبعا مهره حاطه مكياااج ولابسه بنطلون وقميص و الشيله ع نص الشعر دقت الباب و دخلت الميلس كان حمد يالس صوب الباب مهره: السلام عليك.. اشحالك حمد ؟؟" مدت ايدها تسلم عليه" الحمدلله على سلامتك حمد: الله يسلمج .." و متردد يمد ايده و اخر شي مد ايده عشان مايحرجها "اشحالج انتي؟ مهره: يسرك الحااااااال.. نورت الدار بوجوودك راشد: مهره روحي صوب الحريم خلاص مهره: وانت شو حارك ؟ اسلم على ولد خالتيه و اتخبر عنه فيها شي؟ راشد: لا مافيها شي .. ف هالوقت حارب كان يرمس ف التلفون و خلص المكالمه رايح صوب الميلس .. عند الباب من داخل الميلس مهره واقفه .. حارب: السلام عليكم مهره: صدت صوب حارب و انصدمت .. لانها تذكرت ويه حارب لما شافته ف المطعم وهيه ويا سلطان. حارب تم ساكت عقب دش الميلس .. مهره من الصدمه ظهرت و دشت الصاله لكن ماتكلمت مول لي ظهرو. ---------------------- |
وربي القصه روعه وننتظر البارت اللي بعده لا تتأخرين علينا حبوبه |
| الساعة الآن 04:12 AM |
Powered by vBulletin® Copyright ©2000 - 2024, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir