هزاع ومريم

! ĐįƠЯ ƒάṦђịǑη ! · 01-07-2012, 08:29 PM

فاليوم الثاني وبنفس الوقت كان هزاع يتريا البنية توصل وهو بعد عن الفلة حوالي فلتين .... الساعة كانت 1:30 تقريباً ... ( انتوا تعرفون مب كل مرة تسلم الجرة ويشوف هزاع هالدرة ) ... يلس يترياها ويترياها ... وعقب تعب لأن الساعة وصلت 3 والبنت مايت اكيد غايبة اليوم ... .... وبعد اشوي ... ولا جان توصل استيشن بيضا وقفت في باركن الفلة من بره ( برع – خاري ) وتنزل البنية واطيح الغشوة بس هالمرة وهي تعدل الشيلة طلعة جم شعرة من قصتها من دون قصد وهزاع نزل من الاستيشن وواقف يطالع وعايبنه كل شي فيها من عيون وخشم وشعر وجمال ورقة وجسم ( عاد انتوا تعرفون ان هالايام البنات يلبسن عبايات فرنسية مخصرة ..اكيد مبين خصرها بس مب الين هنا وهزاع عنده خوات ويلبسن عبايات فرنسية مخصرة ويعرف اجسامهن وكيف يصيرن يوم العباه فوقهن ) ....... هزاع ما استحمل قام أي كل يومين بس علشان ايشوفها وعقب عرف من اخته متى توصل اليوم مثلاً وباجر والي عقبه وقال في نفسه هذي جدولها شرات جدول اختي عاليوه .... انا بيها بنفس جدول عاليوووه ... وشرات ما قلت الكم قام ايها كل يومين ... عيبته البنية وقال حق امه انها تخطب له هالبنية ولزم عليها وضغظ عليها الين وافقت ... بس كان ناقصنهة شي هو وجود ابوه وياه .... سار عند ابوه واستسمح منه...

محمد :- لا تحاول اتقص علي ... انت ما تهمني ... وبعدين انت مب ولدي ..علشان اخطب لك .....

هزاع :- مشكلتك اهم شي انك اتي وياي وبس ولا ترمس ريح عمرك الا اذا سألك عني او شي كله امدحني و لك مني ما اضايقكك مرة ثانية .... ولا لي خص فيك .... هااااااااه شو قلت ؟؟؟؟

محمد :- شرط مب هاليومين ..

هزاع :- ومنوه قالك هاليومين !!..... انا اباك انت وامي تروحون يوم الخميس عندهم ....

محمد :- وهاذيلا العرب .... نعرفهم احنا ؟؟....

هزاع :- والله ما ادريبك ... يمكن بس اضني امي تعرفهم ... ما شاء الله عليها تعرف الفريج و الحارة و الشعبية وكلها .... الله يخليها ....

محمد :- آآآآآمين ..... بس منوه العرب ؟؟؟

هزاع :- ما ادري بس سألت اثنينة كانوا واقفين فالشارع .... قالولي انه بيت بو سلطان ....واظني انهم قالولي اسمه منصور ....

محمد وهو يفكر :- منصور بو سلطان !..... ..... .... منصور بو سلطان ! ..... لايكون فلتهم الي عدالنا من الحارة الثانية وفلتهم لونها ذهبي ويا حجر اردني ... وضخمه وايد وحوشها عود وايد وعنده اربع اولا ولا خمسة ما ادري ...واضني ان ولده سلطان معرس ..

هزاع :- ليش انت تعرفهم ؟؟؟....

محمد :- هي الفلة ولا لا ؟؟

هزاع :- هيه هي ... انت تعرفهم ؟؟

محمد :- هيه هذا ويانا فالجيش ما شفته ؟؟؟ حتى عياله 3 فالجيش وياه ....

هزاع :- والله ما ادري عنهم ... انا شو دراني فيهم !! .... كل الي اعرفه اني شفت بنتهم ... وعيبتني ..

محمد :- وين شفتها ؟؟؟...

هزاع :- وانا راد من الدوام .......إلخ ..... وهاي كل السالفة ... وبعدين صح انا احيد في سيارة رنج ذهبيه دوم توفق عدالي فالباركنات ... يعني مب دوم بس وااااااايد اشوفها وما لا تذكرتها الا الحين ... واضني ان اسمه سلطان.. لأن مرة من رباعته يالس يزجره ويقوله سلطان بو منصور ... بس المشكلة اني ماتذكرت الا الحين وبعدين حتى رقم سيارته الرنج مب حافظنه ... ..... وبعدين سلطان ساكن في بيت بروحه ؟؟؟

محمد :- اضني هيه ليش تسأل ؟؟؟؟؟

هزاع :- لأني شفتها وهو ينزلها وعقب راح عنها .... وبسرعة ...
نورة :- هيه هو معرس وساكن في فلة عدالهم من الصوب الثاني ...بعدين بنتهم فالجامعة ما اضني بتوافق ....
محمد :- الله يهديك ما حصلت الا العرب ترا هذيلا

هزاع :- جيه شوبلاهم ؟؟؟؟...

محمد :- ما بلاهم شي ... بس هم ما يزوجون بناتهم حق واحد مغازلجي و عليه حركات ....يبون ريال والنعم فيه ..

هزاع :- ليش أنا مب تارس ( مالي ) عينك ..... وبعدين .. أنا بخليها تكمل دراستها .... عادي عندي ...

نورة :- خلاص الخميس الياي بسير عندهم وشوف لك البنية وبشاورهم ...

محمد :- وعقب ردي علي خبر ... ما تخليني آخر من يعلم ... شرات تخطيطاتكم الحين ...

الكل راح في حال سبيله ... هزاع سار حيرته وطبعاً ع النت باللاب توب (والمسنجر ويا البنات) ولا التيلفون ويا ربع العازة الي هم ربعه ولا وحدة من الي مرقمنهن ...

........ بالتيلفون ....

شيخة :- السلام عليكم ..

هزاع :- وعليكم السلام .... هلا ...

شيخة :- اهلين .... شحالكم ؟؟..

هزاع :- بخير انتي شخبارج ؟؟؟

شيخة :- والله اوكيه دامك بخير ...

هزاع :- وينج يالقاطعة لا تسألين ولا تدقين ؟؟؟..

شيخة :- احلف ؟؟؟... لا والله ... اقول هزاع .... انت اطالعت تيلفونك عدل وطالعت مسجاتك مالات الايميل مالك ....

هزاع :- هااااااه ... لا والله ... ما طالعتهم ... اصلاً انا كنت مشغول هاليومين ..

شيخة :- افااااااااااا تنشغل عني .... عيل وين كلامك فالمول هااااااااااااااااه وينه ...

هزاع :- لاااااااا مب قصدي جيه بس ابوي سافر وانا الي رتبت له كل شي .... مب انا ولده العود ...

شيخة :- هيه صدقك ..... انزين اقول هزاع يالله باي اسمع امي تزجرني يالله بسير عندها ما ادري شو تباني ....

هزاع وبسمه مع ضحكه خفيفة واستكاريه :- ههههه هالاهل ما يخلون الواحد على راحته ... يالله عيل اخليج انا بس لا تنسيني عاد ....

شيخة :- افا عليك انا اساك ... انا اتحدى الدنيا لرضاك .... بس خلني احصل الفرصة الي ارمسك بالتيلفون فيها بروحي ... تعرف عاد ما اقدر ارمسك جدام خواتي ... وهن دايماً رزة يبن يعرفن منوه هاي الي ارمسها ....

هزاع :- بنشوف ......... يالله .... اخليج .... باي حبيبتي ..

شيخة :- يالله باي حبيبي ...

......

اليوم الخميس .... حالياً وقت القايلة .... الساعة 9 ونص ......
ام هزاع سارت عند ام سلطان علشان تسلم عليها ...... وبالمرة تستفسر عن بنتها .... وتخطبها ... وتشوفها بالمرة لو انها شايتها جم مرة .. بس بعد تبى تشوفها ...

نورة وهي تدخل الصالة بعد ما دخلتها عواش :- هود هود ... يا اهل البيت العود ....
ام سلطان :- هلا بالغالية .... هلا بحبيبتي ... هلا والله ... وينج يالقاطعة ....
وسارت تسلم عليها ( بالخدود وبالخشم ..كوكتيل يعني ) ... وعقبها سارن يلسن فالدعنة بدل يلسة الكراسي الي تعور الظهر ... وحطن بنات منصور ( بو سلطان ) القهوة الي هن ريم ومريم .. وسلمن على الحرمة الي هي ام هزاع ( نورة ) ... ويلسن شوي بس وسارن ....

ام هزاع :- ما شاء الله على بناتج .... كبرن وصارن عرايس ...
ام سلطان :- صدقج حتى بناتج كبرن وصارن عرايس ... واحنا بعدنا ما كبرنا ...
ام هزاع :- وهي تضحك :- هههههههههههههههه صدقج مب قبل امس احنا والدات ابهن ؟؟؟...

ام سلطان وهي تضحك :- مسرع الوقت ... كبر اعيالنا قبلنا .. جنه الا نسانا ....
ام هزاع :- الا صدق بنتج مريم جم عمرها ؟؟؟؟ مب هي فالجامعة ؟؟
ام سلطان :- هيه فالجامعة وعمرها .................... توها مكملة 20 سنة ....
ام هزاع :- هي أي سنة جامعة ؟؟؟
ام سلطان :- يمكن 3 جامعة لأن بهالصيف بتكون 4 جامعة ...ان شاء الله
ام هزاع :- ما شاء الله على بنتج مواصله ما تاخذ راحة شرات بنتي عالية وبنت عماي حمد ( عالية ) ...وبنت حماي سلطان بعد
ام سلطان :- ما شاء الله عليهن.... وكله يحبن الدراسة ...
ام هزاع :- هيه يبن يفكن عمارهن من الدراسة ويرتاحن عقب ... الي تبا تشتغل بتشتغل ...
ام سلطان :- مب شراتها انا وياج وربعنا ... حتى العدادية ما كملناها والسبه هالربع وهالاهل ..
ام هزاع :- مستعيلين علينا ... يبون الفكة منا ... ما يبونا جامعيات ...
ام سلطان :- تخيلج الله والجامعات الي كانن عندنا ... نادر ما تحصلينها اول والحين في كل مكان ... واذا ما كنتي جامعية ما يبونج ...
ام هزاع :- الا صدق يا ام سلطان ابا اطلب منج طلب ما ترديني فيه ؟؟؟؟
ام سلطان :- افا عليج ما اردج بس ابا اعرف شو هذا قبل ....
ام هزاع وهي مستحية يعني :- بغيت بنتج مريم لولد هزاع اذا ما عندكم مانع ....
ام سلطان :- ما ادري والله شو اقولج ...بس البنية ما خلصة جامعة ....
ام هزاع :- لا تقولين شي ... تخبري بنتج وبس ... وقولي لها ترا هزاع مب مستعيل .. واذا عندج جامعة فالصيف ما عنده مانع بيخلي العرس على آخر 8 وجيه تخلص جامعة واحنا الحين بشهر 2 الحين ...
ام سلطان :- خلاص يا نورة يا أم هزاع بشوار البنية وابوها وبرد عليج خبر ....
ام هزاع :- لا تستعيلون .... عنكم اسبوعين تردون فيه الخبر ..
ام سلطان :- مشكورة ياالغالية بس اسبوع يكفي نعرف راي البنية ...
ام هزاع :- يالله عيل اترخص انا ....
ام سلطان :- تو الناس يام هزاع .... على وين ؟؟؟
ام هزاع :- لا تو الناس ولا شياته .... وبعدين ترا هزاع قايلي انه بشلني الساعة 11 والحين الساعة 11 ونص وبعده ما يا ...
ام سلطان :- شفتي هو ما مستعيل ... بس انتي المستعيلة بطيرين على بيتكم وعلى ريلج وعيالج الي الله يخليهم لج ..
ام هزاع :- آآمين ... بس والله صدق هو الي قالي ... اقول خلينا نتمشى الين نوصل الدروازة ( بوابة الفلة اول البيت ) ....

ام سلطان :- يالله على رايج ... منها ناخذ اخبارج الي ما خذيناها منج ولا خذيتيها منا ونسولف بعد
................... الحريم الي هن ام هزاع وام سلطان لفن دورتين على الفلة وبعده هزاع ما يا ... حرقتهن الشمس. __DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
فيلا فلج هزاع	محروم.كوم	منتدى أخبار المواقع والمنتديات العربية والأجنبية	0	10-19-2011 10:40 PM
للبيع في فلج هزاع	محروم.كوم	منتدى أخبار المواقع والمنتديات العربية والأجنبية	0	09-04-2010 01:50 AM
نوكيا 7110 الجدييم بو شاشه عوده وأريل، متوفر بكمية محدودة	محروم.كوم	منتدى أخبار المواقع والمنتديات العربية والأجنبية	0	06-26-2009 12:10 PM
جديد 6-6-2009: نوكيا بوشاشة عوده وأريل + بوليزر الجدييم بو أريل .. دش وشوف	محروم.كوم	منتدى أخبار المواقع والمنتديات العربية والأجنبية	0	06-06-2009 03:20 PM
الشيخ راشد ولطيفه ومريم وشيخة وفطيم	♕ وليد الجسمي ♕	الشيوخ و رؤساء الدول	24	12-31-2008 05:29 PM