مــــــــــــــرن ثــــــلاث أســابيــع .. كانن ممــــــــــــلات بكل ما للكلــمه من معنــى .. كنا نتزهـب فيـه لـ عيد الاضـحى من سوق لين سوق .. من كثر الملل لفينا دبي وبوظبي والشارجه وعيمان .. ماخليـنا سوق فيهن ما سرنا له ..


اليـوم الملـجه .. نحن مب متعدليـن واايد .. أولاً لأنه ماشي حفلـه عوده بس نحن و قوم عميه .. وثانياً انهـم مابيخلون ريالنا يشوفونا يعني الكشـخه من أساسها مالها لزمـه .. انا كنت لابسه كندوره مغربيـه لونها "أوف وايت" .. عليها شك وفصوص .. ومتعدله شوي .. والريم لابسـه مغربيه زرقا وطالعه عليها تجنن .. بس اللي تفاجأنا به دخول ابويه علينا ..


ابويه: تعالن بناتيه المطوع يبا يتخبركـن ..

يدوه: أسميه مختلف هالمطوّع بعد .. شعنه ما اييبلهن دفتر ويوقعن ونفتك ..

ابويه: لا اميه الحين المطاوعه كلهم جذيه لازم يسألون البنت عن رايها ويسمعون موافقتها عشان لا تكون مغصوبه ولا شي .. يالله تعالن بناتيـه ..

قمنا انا وريموه عقب مالبسنا شيلنا .. وقلوبنا تدق طبوول وقابضات في ايدين بعض بقوو ..

الريم: حمووده انا زايغه احس بطنيه يعورنيه . . خلاص مابا أعرس بقول حق المطوع مابا ..

حموده: شرايج نسويها ونفتك .. أحس راسيه يفتر من الزيـغه !!


وصلنا عند الميـلس .. هبط ابويه قبلـنا .. ونحن كل وحده خذت نفس عميق و سمّينا وتغشينا وهبطنا .. كان فالميلس ابويه وعميه وخالد وعلي وسعيد .. ماحد غريب .. تمنيت انه ابويه "الصدقي" يكون موجود فهاللحظه .. ترحمت عليه وكتمت عبرتيه بابتسامه من تحت الغشوه ..


يلسنا عدال بعض في مكان قريب من المطوّع .. أول شي بدا بـ ريموه .. اللي قبضت في ايديه ورصت عليها بالقوو ..

قالت بعـد سكووت طويـل وتكرار السؤال مرتين عليها : موافقـه ..

المطوّع: هل انتي مغصوبه يابنتي ؟؟

الريم: لا ..

المطوّع: متأكده ؟

الريم: هيه متأكده ..

مد لها المطوّع الدفتر ووقعت .. ويا الدور عليّه .. رصّيت على ايد الريم .. طالعت خالد .. كان مبتسـم .. فرحت يوم شفت ابتسامته ..

وقلت : موافقه ..

المطوّع ماتخبرنيه اذا كنت مغصوبه بما اني جاوبت بسرعه .. عطونيه الدفتر ووقعت .. وبـ جذيه استوت حرمة هالـ "مبتسم" اللي مجابلنيـه .. !!!

ظهرنا من الميلــس بسررعه .. وهبطنا داخــل .. واستقبلونا بالتبريــكات والتصفيــق .. خلاص بعد عرسنا ماعدنا ضمن "البنات" نحن الحين "حريم" ..

للمره الثانيه استوا شي ماتوقعناه ..! زقر عميه الريم لأنه علي ملزّم يشوفها .. وخالد نفس الشي ملزم يشوفنيـه .. فـ عطونا 15 دقيقه لكل وحده تيلس فيا ريلها .. أول شي كان دور ريمووه ..

ترييناها حوالي نص ساعه وأكثر .. شكلها حلت لها اليلسـه .. خلاف هبطت عليـنا وهي ويهها أحمــر ..

سلامه: اوووف طالعوا الويه كرتون طماط ..!!

الريم: جــب ..

فطوم: هاه اعترفي شو سويتوو؟؟

الريم: مسوّدة الويــه شو هالرمسه بعد ؟ ماسوينا شي ..

سلامه: علينا ؟؟ ماعليه خبر اليوم بفلوس باجر بلّووشـــي !!


زقرنيه عميه فهاللحظه .. كنت أضبط مكياجيه في فترة غياب ريموه .. ظهرت وانا قلبيه يدق .. مب عارفه شو شعوريه .. خايفه فرحانه متوتره .. ماعرفت اختار أي واحد فيهن .. كيف كل شي استوا بسرعه جذيه ؟؟ الحين انا معرسه ؟؟ توني بديت أستوعب !!


هبطت الميـلس .. كان المدخن تارس المكان بـ دخانتـه .. تميت واقفه أحاول أشوف خالد وين يالس .. لكني شفت شي ابيض يتحرك بين الدخان و ياي صوبيه فـ عرفت انه هو ..

ماوعيت الا وهو لااااصق فيّه وماسك ايديه .. قرّب راسه وهمس في اذنيه ..

خالد: مبروك عليـنا ..

انا احمـــر ويهيــه وذبت في ثيابيـه .. خفّت الدخانه لين اختفت .. سحبنيه من ايديه وويلسنيه عداله ع واحد من الكراسي .. تم ماسك ايديه ويطالع حنايه ..

خالد: ما اتصوّريـن شكثر انا فرحان انج من نصيبيه ....... حبيبي ..

رفعت راسيـه صوبه ..

خالد: تولهت عليـج ..

نزلت راسيه مره ثانيه ..

خالد: ماتولهتي عليّه ؟

قلت بصوت واطي : امبلا ..

خالد: امبلا شو ؟

حموده: يوووه ..

خالد: ههههه يالله قولي ولا ترانيه بشلـج البيت عنديه اليوم مابخليـج تيلسين فهالبيت امرره انتي حرمتيـه الحيـن ..

طالعته باستغراب .. يسويـها والله ..

حموده: خلاص بقول ..

خالد: يالله ..

بصوت واطي : تولهت عليك ..

رفع راسيه بإيده وقال: وانا أحبــج وأعشـقج وماظني حد في هالدنيا يسوااج عنديه ..

مسك ايديه وحبنيه على يبهتيه ..

مافي داعي أوصف لكم شعوريه أظني عارفينه زيـن .. كل انواع القفطه والمستحى تجمعت فهاللحظه ..



&* الجــزء العشــرين *&


.
.
.


" مــرت ســنه الآن .. كانت بالنسبــة لي مليـئة بالسعــادة .. انني الآن حـامـل في شهري التاســع .. كانـت هذه السـنه رغم سعادتي فيها التي فاقت كل وصف .. الا انها أيضاً لم تخلو أبــداً من المشـاكــل .. كانت أغلبـها مع "أم خالد" التي كانت تنتقد كـل أفعالي ولم أجد أي سبيـل لإرضائـها .. فقررت تجاهـلـها والاستمتاع بحياتـي .. "


.
.
.



قالوا تحبه؟ قلت بالحيـــــــــــل~>أحبه<~
وأحب التـــراب اللي وطــت به خطاويــه
قالـــوا غلاتـــه؟! قلــت ياناس صعبــه!!
أوصف غلا اللي عن غلا الروح مغليـــه
سعادتي لو هــي دقايـــــــــــق بقربه
تسوى العــــمر كــله مع كل ماضيــــــــه


في وحــده من غــرف الـ vip في مستشفى "كنـد" أو "الواحـه" .. كنت منسـدحه وأحـس بويـع في بطنـيه .. وسلامه "تحووس" فالحجره .. ويدوه ترتب الفواله في الصاله اللي جدام حجرتيه وعموه وحرمة عميه فياها .. والريم وفطوم الا هابطات ظاهـرات .. وكلنا في انتظار ذاك المنـز اللي بتكـون فيه "بنتيـه" اللي ربيت بهـا من حوالـي ساعتيـن .. تميت فالمستشفى من أمس العصـر لين ربيت اليوم الساعه 7:30 الصبـح .. وأكيـــد بسميـها "مي" بما انه مي يوم ربت سمّت بنتها عليّه ..


شفت كل حد اليوم الا أهـم حد .. "خالد" .. وامه بعد ما كانت موجوده .. مادري وين سار مع انه المفروض يكون موجود قبل الكل .. يت ريموه بكرشتها اللي ضاربه لين خشمها وشكلها بتربي قريب .. ويلست ع الكرسي اللي عداليه ..


قلت بصوت واطي بما اني كنت تعبانه وماروم ارمس وايد : ريموه وين خالد ..

طالعتنيـه وتمت ساكته جنها ماتعرف ..

وخلاف قالت فطوم : دقّولـه من الدوام قالوا يبغوونه بيترخص منهم وبييج ..


ابتسمت واقتنعت برمستها .. عقب شوي هبطت علينا الممرضـه وهي ادّز المنز جدامـها .. كنت منسدحه ويلست .. قربوا المنز عدال شبريتيه .. وايقـت فيه .. شفـت ملاكيه الصغيرونه بعيونها الزرق وشعرها الاشقــر .. حسيت باحساس قوي ومارمت أمنع نفسيه من اني أشلـها .. ما اهتميت بالصدعه اللي حوليه وكل التفديات اللي سمعتها وكل اللي كانوا يبون يشلوونها .. تميـت أتأملـها فتــره طويــله .. وحبيتها على يبهتها وخدودها ..


يدوه: بســج منها عطينيه اياها وابويه عليـج ..

مديت بها صوب يدوه مع اني مابا أخوزها عنيـه ..

يدوه: ماشالله ماشالله .. الله يكفانيـه ويجعمنيه .. فديـتج متى بيي ابوج وبيشـووفـج ..

هبط علينا خالد فجأه ..

خالد: هاذوه يا ابوها !!

يدوه: يامرحبــا يامــرحبا بـ ابو مي ..

تناولها خالد من ايد يدوه .. تـم يطالعـها بـ أحلى نظرات شفتها فعيونه فحياتيه .. حبها بين عيونها واعتفس ويهها شوي .. حطها في منزها ومسك ايديه وقال ..

خالد: حمدلله ع سلامتـج .. سامحيني عاد تدرين بالدوام ..

حموده: أول شي الله يسلمـك .. ثاني شي مسموووووح الغالي ..

ابتسم خالد وعيونه تحمل كل معاني الحب وخلاف طالع صوب الكل وقال: هاه أشوف سميتوا بنتيه من ورايه ماواحيتوا !!

حموده: انا بغيت لها هالاسـم .. عندك اعتراض الشيـخ ؟

خالد: أكيـد لا .. وانا اروم أقول شي أصلاً ؟

يدوه: وانته شو في خاطرك تسميـها ؟

خالد: انا كنت بسميـها نووره ..

حموده: انا هالاسم بالذات أكــرهه أحســه واايد يلوّع بالجبـد واييب المـرض ..

فطوم: هاه أشوفه اعتدل صووتـج من يا خويـلد ولا قبل شوي كنتي تونين ..

طالعناها انا وخالد بنظره وخلاف سحب خالد كـرسي ويلس عداليـه وطالع الكل وقال : ممكن تطلعون ؟ أبا أيــلس فيا حرمتيه شوي ..

طالعته يدوه بنظره تحـرررررق .. وظهروا الكل وهم يضحكون ..

حموده: انته ماتستحي ؟؟ مضيّع المذهب ؟؟

خالد: من شفتج وشفت بنتج نسيـته ..

حموده: وليـش مب بنتك هي بعد ؟

خالد: بنتيه وقلبيه وروحيه ..

وشلها من منزهـا وتم يحبـها وانا مذوبني شكله الحنون فياها .. تم يحبها لين اعتفس ويهها وصاحــت ..

حموده: زيـن جذي صيـحتها شسوي لها انا الحين ؟؟

خالد: رضعيـها بعد شتسويــلها .؟

حسيـت ويهيه احمــــر .. وجنه حد صب عليّه ماي بارد .. نسيت انه الوحده يوم تيب ياهل لازم ترضـعه !! يالله انا شدرانيه ؟ اروحيه ياهل .. يقولون تراهم فاقد الشي لا يعطيه !!

خالد: شفيـج ؟

حموده: مـاشي ..

مسك ايديه وقال بنبره تذوّب : تستحيـن منيـه ؟

ياويلي دخت ورحت فيـها .. قلت بابتسامه: لا ..

هبطـت علينا يدوه وانقذت الموقف بعصاها اللي قومت خالد من مكانه .. ويلست هي مكانه وشلت عني الصغيرونه ..

يدوه: واابويه عليـج بنتج تصيح وانتي قابضتنها اطالعيـنها ؟؟

قلت بيأس : شو اسوي يعني ؟؟

يدوه: رضعيـها !!

ضحك خالد وظهر عنا عشان يخلا الجو لـ يدوه" المتعبله " ..

المهم عـــدّت على خيــر هالمره وتعلمنا كيف نرضّع عقب واااااايد من المواقف المحـرجه جدام يدوه وعمتيه وحرمة عميه .. بس اللي استغربته انه "ام خالد" ماهضلت لين الحيـن .. تكرهنيه قلنا ماعليـه .. بس هاي حفيـدتها .. لو انها شقرا وشكلها شكل انجليـز بس اتم حفيـدتها .. أصلاً هي شافتها عشان تحكم عليـها ؟؟

عقب ماظهروا عنيه لصلاة الظهر اللي كانت قد فاتت أصلاً .. هبط عليه خالد اللي كان توه مصلي ويلس ع الكرسي عداليـه .. قمت انا عشان اتسبح وابدل ثيابيه عفت لبس هالمستشفى .. بس قبل لا اوقف مسكنيه خالد ..

خالد: ويـن ؟

حموده: بسير اتسبح وابدل ثيابيه ..

خالد: انسدحي انتي تعبانه ..

حموده: صدقنيه حبيبي مب تعبانيه ..

خالد: لا تكابرين يبيّن في عيونج ..

تنهدت عقب قلت : هو صدق انا بطنيه يعورنيه بس ماعليه اروم استحمله .. لكني مستحيل اتم ع هالرباده منسدحه وبلا شغله ..


خالد: بسيـر ازقر الممرضات يعطنج شي يخفف ويع بطنج ..

حموده: لا دخيلك بيخلوني ارقد مره ثانيه ..

خالد: مابتتعبيـن من القومه ؟

حموده: شوفتـك وشوفة ميّوتي تخوّز عنيه كل التعب والويع ..

تقرب اكثر و لوا عليّه .. وحسيت كل التعب خاز عنيه مره وحـــده .. بس سمعت اصوات فالصاله كنت ببتعد عنه لكنه ماطاع يفجنيه .. همس في اذنيه ..

خالد: هاي اميه انا موصنها تي .. خليها تشوفنا جذيـه يمكن تتأدب وتيوز عنج ..

قلت له بنفس مستوى الصوت: استـح هاي امك ..

خالد: حبيبي ماعليـج منها .. انسي الدنيا كلـها .. انا مشتاقلـج .. من اسبوعيـن ماشفتج ويوم ييت بشوفـج ربّيتي والدوام بعد نغّص عليّه .. خلينيه ماتهمنيه هاي الدنيا كلها ..

حموده: حتى بنتـك ؟؟

خالد: وحتى بنتيه .. مب انتي اللي يبتيها ؟ خلاص انتي اغلا عنها ..

حسيت اني تقفطت يوم سمعت حس ام خالد قريب فالصاله وترتب الاشياء اللي يابتـهن .. أقصد المجاب والدلال وسلال الحلاوه ..

رفعت راسيه صوب الباب الخشبي القصير مال الحجره .. شفت ام خالد اطالعنا وخلاف استحت على ويهها وظهرت .. ضحكت بصوت واطي في اذن خالد وقلت ..

حموده: يحليلها امك طلعت تستحي ..

ضحك خالد بصوت عالي وابتعد عنيه وانا ماودي يبتعد .. توجه صوب المنز ولحقته ولزقت فيه .. وقفت على صبوع ريوليه لين وصلت ويهه .. حبيته على خده وهبطت الباب اللي يودي على غرفة الملابس والحمام "الله يعزكم" .. تسبحت وبدلت ثيابيـه وكشخت شوي .. أول ماظهرت شفت ام خالد تحط فلوس تحط مخدة مي .. أوووه من وين طاح عليها الكرم مره وحده ؟؟

ام خالد : حمدلله على سلامتـج يا بنتيـه ..

قلت بمجامله : الله يسلـمج عموه ..

ام خالد: ماشالله على هالشقـيرا .. فديـتها والله انها غزيّل ..

شفت فعيونها نظرات حـب وعطف وحسيت انها تقول الكلام من قلبها .. شلت مي اللي كانت راقـده .. حبتها على خدودها وقربتها منها ولوت عليها بالخفيف .. ابتسمت يوم شفت شكلها جذيـه .. انشالله تكون ولادة مي نهاية الخلافات امبينا ..

ام خالد: يالله ولديه الشيفه اييب هالغزال واااايه فديـتها .. ماتنلام ماخذه الحلاه من امها ..

ابتسمت لها يوم طالعتنيه باعجاب ..

حموده: عيونج الحلوه عموه ..

ام خالد: سامحينيه يا بنتيه ع اللي صار من بينا من قبل .. تبين الصدق انا اعترف انه كان عقليه انه صغيــر ..

حموده: لامحشوومه عمووه ..

ام خالد: انتي مسامحتنيـه .. ؟؟

حموده: مسمووحه يا عمووه ولا تظنين اني بزعل عليج انتي غاليه عليّه بس تبين الصدق ماروم اقول حسبة اميه اخافج تعصبيـن عليّه ..

ضحكت عليّه ام خالد ..

ام خالد: لا لامابعصب .. فديــتج انا والله ..

ولوت عليّه ..

هبط علينا خالد ..

خالد: ها تراضيتوا ؟؟

ام خالد: هيـــه فديـت حمووده والله .. وفديـت بنيتكم الصغيرونه .. الا شو سميتوها ؟؟

قلنا انا وخالد مره وحده : مي !

ام خالد: يالله ماحيد حد من طايفتنا مسمي هالاسم .. من وين مضوينه انتوا ؟

حموده: عموه هاي ربيعتيه سمت بنتها عليّه وانا بسمي بنتيه عليها ..

ام خالد: ومتى بتسمون عليّه ؟؟

خالد: انشالله الدفعه اليايه ..

ضحكوا خالد وامه وانا احترق ويهيه ..

خالد: انزين الريم حرمة علي حامل بتوأم بنات خليها تسمي عليــج ..

ام خالد: لا لا .. انا ابا من بناتكم حليــوااات وشقر !!

ضحكنا انا وخالد عليها ..

خالد: يالله تعالـي بتاكليـلج شي ..

حموده: انزيـن ..

وظهرنا من الحجره وانا تميت احوط فالمكان اطالعه .. كان مثل الشقه .. أول شي عند الباب اللي يدخلوبه من برع شي يدار كله مرايات وجدامه كراسي .. وخلاف شي المطبخ ومجابلتنه غرفة الطعام .. وخلاف تي الصاله .. وعاليسار حجرتيه اللي لها بابين باب صغير وباب عووود كان مسكر ومحتل مكان كبير من اليدار .. ومن عقب الصاله شي حمام ومغسله وبعدين شي الباب اللي يودي صوب الممر داخل المستشفى.. يعني قبل 24 سنه انا انولدت فهالمستشفى .. والحين ييت اربي ابّنتيه فيـه .. !!

يلسنا فالصاله جدام الدلال و المجاب اللي فيها من كل انواع الاكـل .. وسلة الفواكه والحلوى حسيته جنه يوم العيـد !!

تميت آكل وخالد يشرب وام خالد اطالعنا ..

حموده: هبشي عموه ..

ام خالد: لا لا ماشتهي .. توني متغديه ..

العصــر .. كنت يالسه ع الشبريه وحاطه مي في ثبانيه .. وخلاف ظهرت وتميت أحوط بها بما انها كانت تصيـح .. كانت ام خالد عنديه وتساعدنيه .. فهاللحظه انفج الباب ودخلوا كل العايله .. عمومتيه وعمتيه وحرمة عميه والبنات وعلي وسعيد وخالد .. ماشااالله كيف بيسدهم المكااان ؟؟

قمت ووايهت عمومتيه .. وسلمت على علي وسعيد من بعيد .. الحريـم هبطن داخل حجرتيه بما انها في مساحه عوده وكراسي وزوليه مفروشه فالدعنه .. وهبطت انا فياهم اما الرياييل عقب ماشافوا مي وشبعوا منها وأذّن عميه في ذنها يلسوا فالصاله ..

اما عندنا نحن .. كانن يايبات هدايا حق "مي" .. أكياس "بيبي شوب " و"تاب ألويا" و"بوسيني" > ماحصلوا له غير هالاسم ؟؟ أسميهم صدق مايستحون ع ويوههم !!


ويدوه يايبتلي دلة الحريروه .. ويايبين أكـل من المطعم بعد بما انهم ماتغدوا .. فججوا قراطيس الاكـل ويلسنا ع الارض ناكل .. مادري شو فيّه اليوم آكـل واايد .. مايسد اني غديت دبه من عقب الحمل وبعدنيه بمتن أكثر بسبة الاكل .. لازم اضعف ولا بنتفخ أكثر !! صح انه عايبتنيه خدوديه هاللي منتفخه شوي .. بس اخافنيه امتن اكثر وماروم اسيطر على عمريه !!

فهاللحظه صاحت مي .. ربعت لها فطوم بما انها ماكانت تاكل فيانا .. وخلاف قمت انا وغسلت ايديه وشليت مي عن فطوم .. شفت واايد فلوس تحت مخدتها .. ماشالله كنز !!

غمضت عيونها وسكتت يوم شليتها .. تميت احوط بها شوي واهز بها لين تأكدت انها رقدت وخلاف حطيتها فالمنز ورديـت يلست ..

خلاف روحوا عمومتيه والشباب .. وطرشت الهدايا اللي يابوهن فيا خالد عشان يشلهن البيت .. حسيت بطنيه عورنيه فـ انسدحت ع الشبريه .. ورقدت بدون لا احـس ..

وعيت على صوت حد يوعينيه .. فجيت عيونيه وشفت سلّوم وفطوم واقفات فوق راسيه ..

حموده: هممم شو تبن والله بطنيه يعورنيه ..

فطوم: كلهم روحوا وماتم حد غيــرنا قلنا نوعيـج ؟

حموده: متى روحوا ؟

سلامه: قبل شوي ..

حموده: اهـا ..

فطوم: انتي تعبانه ؟

حموده: بطنيه يعورنيه ..

فطوم: ماعليـج نحن بنبات عندج اليووم ..

حموده: هيه زين يا حياكن ..

وقمت من سداحتيه ويلست .. وايقت فالمنز .. كانت راقده .. ابتسمت يوم شفتها .. ملااااك فديــت روووحها ..

خشيت ايديه شوي شوي تحت المخده .. وظهرت كل الفلوس اللي تحت مخدتها ..

حموده: تعالن بنات اكتشفت الكنز ..

يلسن فطوم وسلّوم ع اطراف الشبريه ..

فطوم: من وين يبتيهن هالفلووس ؟

حموده: من تحت مخدة ميّوه ..

سلامه: يالله عدّي عدّي خلينا بنشوف كم يمعتوا ..

حسبت الفلووس خمسميه ورا خمسميه وألف ورا ألف.. آخــر شي طلعن 5200 .. ماشالله ..

فطوم: منو هاللي مايستحي وحاط 200 والكل حاطين الا 500 وألف ؟؟

سلامه: حد زطــي .. منو هزرج ؟؟

حموده: شدراكن يمكن حد حاط 700 ولا 1200 ..

فطوم: مااادري يمكن ..

فهاللحظــه صاح تيلفونيه ورديت بدون لا اطالع الرقم .. ..

حموده: ألــووووهـ ..

خالـد: حتى ألـووه تطلع من ثمج غير ياويلي انا .. شحالـج ؟

حموده: الحمدلله بس ويع بطنيه لين الحين ماطاع يخوز ..

خالد: وشعنه ماتخليـن وحده من الممرضات تي وتضربـج ابـره عشان يخوز عنج الويـع ؟

حموده: اذا ضربونيه ابره برقد وانا الحين تونيه واعيه ..

فهاللحظه صاحت ميّووه ..

حموده: هاه شفت بنتك يوم درت انك ترمسنيه وعت ..

خالد: فديــت رووحها شليها لاتخليـنها تصيـح واايد ..

شلتها فطوم وتمت تحووط بها لكنها ماطاعت تسكت بالعكس زادت اكثر ..

قلت حق فطوم: هاتيـها ما اطّيـع تسكت الا عنديه ..

يابتها فطوم وحطتها في ثبانيه وتميت أهز بها .. سكتت شوي وغمضت عيونها ..

حموده: ببند الحين لازم أرقدها ..

تنهد خالد خلاف قال : انزين تصبحيـن على خيـر ..

حموده: وانته من اهله .. مع السلامه ..

خالد: مع السلامه غناتي ..

بندت عنه .. وقضيـنا هالليله سهر على صياح ميّوه .. ترقد نص ساعه وتوعي ..

مرّن يوميـن وظهرت من المستشفى .. ورديت في بيت "أبويه" أو "عميه سيف" .. بقضي الاربعيـن هناك ..

هبطت الحجره حصلت المنز محطوط عدال الشبريـه .. ابتسمت .. تذكرت أول مره دشيت هالحجـره .. أبـداً ما يا على باليـه اني بدخلها في يوم من الايام وبيكون فيها منـز لا وبكون شاله بنتيـه ..

حطيت مي اللي كانت راقده فالمنز ويلست ع الشبريه .. صاح التيلفون وكان خالد .. حشا مافيه صبر هالانسان .. قبل شوي دق وقلت له اني عند الحريم وماروم أرمسه .. والحين أول ماهبطت حجرتيه دق ..

حموده: ألووه ..

خالد: أهليــن حياتي ..

حموده: حشا مافيـك صبـر تونيه هابطه الحجره ..

خالد: شسوي تولهت عليـج ..

حموده: حشا ماواحيـــت !!

خالد: يعني ماتولهتي عليّه ..

قلت عشان اغايضه : لا ... بنتيه لاهيتنيه ..

خالد: أفـــا بديت أغار انا .. ترانيه عادي انقز عليج فالبلكونه ..

حموده: جيه قطو ؟

خالد: يا قطو ياللي منسدح في البراميل .. ما شفت خلي يوم كب الزبالة ؟

حموده: انا الحيـن أجب الزباله ؟

خالد: ياليتج تجبينها عشان تظهرين وأشووفج ..

حموده: لا انته رايح فيها ..

خالد: شسويـبج حراام عليـج تسوين فيّه جذيـه ..

حموده: انزين تعاال العصـر ..

خالد: المشكله اني ماروم .. اميه تبا تسير السوق ..

حموده: امك متفيـجه بعد ..

خالد: شراايج اسويلها طاف واييج ..

حموده: لا هاي امك مايستووي .. خلاص باجر عادي ..

خالد: عادي عندج انتي بس انا لا .. انا مشتاقلـج واايد واايد يا حموده ..

حموده: وانا بعد مشتاقتلك بس شسوي يدوه حالفه عليّه اتم هنيـه ..

خالد: ماعليـه انا بستلمها العيووز .. ان مارديتج باجر البيت مايكون اسميه خالد .. أقوول نزلي تحت طالعي جان ماحد هنيه ابا اهبـط ..

حموده: انته هنيـه ؟؟

خالد: هيه ..

حموده: انزين الحين يايتنك .. جان قلت من الصبح انك هنيـه ؟؟

خالد: كنت فالسياره والحين نزلت يالله انتي نزلي تحت ..

حموده: انزين انزين الحين بنزل ..

بندت عنه ووعت ميّوه .. شليتها وظهرت من حجرتيه و نزلت تحت ماحصلت حد .. سرت وفجيت الباب وظهرت خاري حصلته واقف عند الباب ويتريا ..

حموده: سلام ..

ابتسم وتجدم صوبيه .. شل ميّوه وحبها على غزها وتم يلاعبها .. هبطنا فالميلس ويلسنا وهو لاهي بـ ميّوه ..

حموده: ثــرك متولـه على بنتـك هب عليّه .. ياخساااااره ..

طالعنيه وقال : تغاريـن ؟

حموده: أي حد تحبه اكثر عنيه بغار منه حتى لو كانت بنتيه ..

خالد: ياويلي انـا .. الا ويـن العيووز ؟

حموده: من الحين ناوي عليها ؟

خالد: ماروم اتحمـل بعدج عنيه .. انا يوم واحد مارمت اصبر شقايل تبينيه أصبر أربعين يوم ؟

ابتسمت وقلت: يدوه في حجرتها أظني ..

خالد: يالله عيل قومي ..

عطانيه مي وشليتها وقام وتبعته وسرنا صوب حجرة يدتيه ..

دخلنا عند يدوه حصلناها يالسه على سيادتها وقابضه مسباحها وتسبّح ..

دقينا الباب عشان تنتبه لنا ..

لبست برقعها وخلاف التفتت صوبنا .. سكرنا الباب ورانا ويلسنا عدالها ..

يدوه: هاه شعدنك ضاوي الحين ؟ أكيد تبا تشلها فياك البيـت ..

خالد: ماشالله عليج يدوه صـح يبتيـها !

يدوه: ماشي انا اباها تيلس هنيه عنبو من خذتك غدينا مانشوفها الا فالشهر مره !! خلنا نشبـع منها ..

خالد: يدوه أوعدج كل يوم اييبها لـج بس خليها ترد فيايه ..

يدوه: البنت تعبانه مابترد عندك ..

خالد: يووووه حموده انتي تعبانه ؟

حموده: لالا مب تعبانه مافيّه شي ..

يدوه: انزين قولي انج انتي اللي تبين تسيرين .. يالله سيري ولا ابا اشوف رقعة ويهج مره ثانيه ..

حموده: لا يدووه فديـت عيوونج لاتزعليـن خلاص هب سايــره ..

ورفعت برقعها وحبيتها على غزها ..

خالد: دخيــلج يدووه ماروم اتحمل فرقاها ..

يدوه: جان بتسير انته برايك بس بناتيه خلهن عنديه ..

خالد: يالله يا يدوه حرام عليـج خلاص بييبها لج اليمعه والسبت وبخليها تيلس وتبات عندج بس خليها تي عنديه اليوم ..

يدوه: باجر اليمعه تراه ..

خالد: انزين بييبها باجر بس خليها تي عنديه اليوم ..

يدوه: انته ماينرام عليـك خلاص برايك رحمتك ..

خالد: صدق ؟

يدوه: هيه يالله بسرعه قبل لا اغير راييّه ..

قام خالد وحب راس يدتيه وانا لويت عليها وخلاف قمنا وظهرنا كنت بسير فوق بس قبضنيه خالد ..

خالد: وين ؟

حموده: بسير اييب قشاريه وقشار مي ..

خالد: قشارج أكثره هناك يالله تعالي ..

حموده: بس ..

خالد: يالله تعالي ماعليج دامنج لابسه نعالج .. انا مافيّه اترياج بعد لين تيبين قشارج ..

ياب ايده من ورا جتفيه وظهرنا وركبنا السياره ..

حموده: هاه ارتحت الحيـن ؟؟

مسك ايديه وقال : أكيـد ..

ومشيـنا صووب البيـت .. ويوم وصلـنا ماحصلنـا حد غيـر سعيد اللي راقد فالصاله .. تصدقون أحـس هالانسان كان متعلق فـ شويخ ويحبها مادري ليش بس مجرد احساس .. او يمكن اكثر من احساس .. اذكر في عيد الفطر يت تزورنا تسلم علينا .. كانت توها نازله من السياره فيا ريلها وتضحك ومستانسه .. يوم شافها حسيـته انصـدم تم واقف ويطالعها وماتحرك لين هبطت داخل وخلاف مشا صوب سيارته بدون لا ينطق بكلمه .. طبعاً شفت هذا كله بما انه كنا واقفين عداله بس الشيخه ماكلفت عمرها تسلم علينا ..!!!

المهم رقينا نحن فوق صوب حجرتنا بكل هدوء عشان لايحس علينا سعيد ونغثه ..



&* الجــزء الحــادي والعشــريـن *&


بعد مرور 36 يوم بالضبــط .. وبعد ويكندات طويله قضيتها عند يدوه .. كانت اليوم عزيمة طلوع مي من الاربعيـن .. كانت العزيــمه عوووده وماتـم حد من اللي نعرفهم ماحضرها .. الا فطوم اللي كانت مريضه ويلست فالبيت .. بس مااستوا في العزيمه شـي كانت كلها "مجاملات" .. عقب ماخلصـت العزيـمه يلسنا في حجرة سلامه ..

حموده: الا شحااال محبووبج العامـري ؟

سلامه: ياويـل حالي يقولون بيسير يشتغل في بوظبـي شو أسوي بعمريـه انا ؟

الريم: يعني مابتشوفيـنه غير فالويـكند ..

سلامه: هيه عقب ماكنت اشوفه كل اليوم ع البلكوونه .. ياربـــي بتخبــل !!

حموده: وهو مادرا عنج ماحس فيـج ؟

سلامه: مادري .. المشكله ماروم اتخبـر حـد عنه وسالفة شغله سمعتها بالصدفه ..

الريم: امممم اييج راي طبيـه هذا مامنه فايده ..

سلامه: احتفظي بـ رايج حق عمـرج ..

حموده: نحن سوينا اللي علينا بس هو ماطاع "يتلحلح" ..

فهاللحظه وصل مسـج على تيلفون سلامه .. تغيرت ملامح ويهها .. كلنا تقربنا ولصقنا فيها عشان نقرا المسـج ..

" ياشـوق خبرني عن اللي انا اغليه ... عن واحد روحي بحبه شغوفه
اغليــه من بد المخاليـــق وافديـــه ... احس للفرحـه طعم يوم اشوفه
يطلب عيوني يطلب القلـب واعطيه... ارهن حياتي بين ضمة كفوفـه "

" أتمنى انج تكونين عرفتيني .. انا كـل يوم أشوفـج بس ما أظـن انج تدريـن عني .. ممكن ادّقين ع هالرقـم ابغي ارمسـج فسالفه مهمه .. بس كلمتيـن وبسكـر .. دخيـلج لبي لي هالطلـب "


الريم: هــذا هووووه !!

سلامه: ظنـج ؟

حموده: هيه عيل بالله عليـج منو غيره ؟؟

سلامه: يالله ماصدق بس من وين ضوا رقميه ؟

حموده: نسيتي انج مرابعه اخته يالعنز ؟

سلامه: هيه والله معناته هي تعرف والنذله ماخبرتنيه ..

الريم: شدراج يمكن خذ الرقم من دون ماتدري ..

سلامه: هيه والله صدقـج ..

حموده: انزين بدقيــلـه ؟؟

سلامه: لا شو تخبلت ؟

الريم: طرشـي له مســج ..

سلامه: شو اطرش له ؟

الريم: سأليـه منو انته عشان اتأكديـن ..

سلامه : أوكيــه ..

طرشت له سلامه مسـج ..

"لو سمحت اخويه بس منو انته ؟؟"

عقب كمن دقيقه وصلها مسـج ..

" ني سهيــل ولد يرانكـم "

شقت سلّوم الحلج ..

حموده: أوووه من قدج .. شفتي خططيه شو تسوي ؟

سلامه: فديــت رووحج والله انه امريكا تسوي شغل !!

خلاف طرشت مسج مكتوب فيه ..

"شو بغيت اخويـه ؟؟ "

الريم: تستهبليـن أونـج ؟؟

سلامه: بالله عليج شو تبيني أسوي ؟؟

ماوعيـنا الا بصوت تيلفون سلامه وهو يرن ..

سلامه: هذا هو ياويلي شو اسوي ؟؟

حموده: تبيـن نصيـحه ؟ لا ترديـن .. خليـه يترجاج لين ينذل عاره خلاف ردي ..

سلامه: خلاص الشور شورج وانتي اشوارج كلها عدله ..

دق مرتيـن وفالمرتيـن ماردت عليـه .. بس خلاف وقف مادق ..

سلامه: يييه مادق .. اخافه مايدق مره ثانيه !!

حموده: انتي هدي اعصااابــج .. وصبــــري .. الصبــر زيـن ..

هالمره وصلنيه انا مسـج .. وكان من خالد ..

" يالله نزلــي تحت اترياااج "

قلت حق البنات: يالله عيل انا لازم اروّح ..

الريم: المسـج من عند خالد ؟

حموده: هيـه ..

قمت ولبست عباتيه وشليت مي من منزهـا والشنطه الصغيره اللي فيها قشارهـا ..

سلامه: حشــا مستعيــله .. !! لازم حبيب القلب ..

حموده: خليـج انتي في اللي عندج ..

سلامه: والله اخافه مايدق ويطب السالفه ولا يزعل ..

حموده: أراهــنج انه بيدق فلّيـــل ..

سلامه: انزيــن بنشووف ..

حموده: يالله فداعة الله عيل ..

وادعتهن و نزلت تحت وادعت يدوه واللي كانوا يالسين هناك وظهرت صوب خالد .. فريت القشار فالسيت اللي ورا وركبت جدام ..

قال بنبرة طنازه فيها شوي عصبيـه: لو ماييتي بعــد ..

حموده: حشــا شفيـك انا ماتأخـرت ..

خالد: انا معصـب دخيــلج سكتي اخبرج من الحيـن عن اييج شي ماحسبتي عليه خلاف ..

حموده: شفيـك ؟

قال بصوت عالي: قلت لج سكــتي .. تراها واصلـه عنديه ..

سكت عنه عن ايفرنيه من الدريشه انا وبنتيه !! ياربي كيف اكرهه يوم يعصـب !!

كــان مســرع بالسياره .. الصراحه خفت لايدعم بنا ولا شي لاسمح الله لكني مارمت انطق عن يدعم بنا صدق !! المهم وصلنا البيت ..

خالد: نزلي فري البنت عند اميه وتعالي ..

قلت بخوف: انشالله ..

نزلت ونزلت قشار مي وهبطت البيت سلمت على ام خالد وخبرتها باللي مستوي تعاطفت فيايه وشلت مي وانا ظهرت وركبت عند خالد .. أول ما ابتعدنا شوي عن البيت قلت ..

حموده: مابتقول شو مستوي ؟؟

تم ساكت وزاد الســرعه .. خيبه لو ادري مارمست !!

المهم وصلنا في مكان كــله عراقيـب وفااااضــي .. هو كان اراضي للبنا بس بعدهم مابنوا فيه شي .. نزل خالد من السياره وتم يضرب بونيت السياره بقبضة ايده بقوو .. نزلت انا عشان أوقفه اخافه يكسر ايده !!

مسك ايده بكل قوتيه اللي قدرت عليها وقلت: خالد استهدي بالله .. شو مستوي ؟؟

خالد: فطووم الجلبــــه .. !!

شكيت انه السالفه يكون لها علاقة بـ فهد .. بس لا .. من 7 شهور هي قايلتلي انها طبته خلاص وماترمسـه وعقلت ومادري شو .. عيل شسالفه ؟

حموده: شو سوّت فطوم ؟؟

خالد: هاي نتيـجة البزا والبطره اللي مبطرتنها اميه اياها .. مســودة الويــه آآآخ ياليتنيـه أروم أذبــحها وأطفـي هالنـار اللي فيّه ..

حموده: استغفـر ربك شو هالرمسـه اللي تقولــها ..

خالد: استغفــر الله .. استغفر الله ..

ومسح على ويهه .. سحبته من ايده ويلسته عشان يخبرنيـه السالفه .. تم ساكت .. ترييته لين يهدا .. مسكت ايده وتميت ألعب فيـها .. خلاف هدا ونطـق ..

خالد: تصدقيـن شفتهـا راكبـه فيا وااحـد ..

انصدمــت وطالعتــه .. لا يكون ردت حق فهد ؟ ولا هذا واحد ثانـي ؟؟

خالد: كنت راد البيت اليوم قبل الغدا بشوي عشان اشل حق اميه دوا الضغط .. الا أشوف لـج اياها ظاهره من البيـت وراكبـه في سياره غريـبه .. نزلت من السياره ولحقتها قبل ماتسكر الباب .. شفت اللي في السياره وياليتنيه ماشفت .. كان واحد دوم اشوفه يوم نسيـر كارفور .. مسكـتها وكفختــها .. تدرين انها فالمستشفى الحيـن ؟؟

حموده: شووووه ؟؟

خالد: مارمت استحمـل .. فطوم خانت ثقتـنا .. الله يعلم شو تسوي من ورا ظهورنا بعد !! ما اصدق انه ختيه انا تسوي جذيــه !! نحن بشو قصرنا عليها عشان تسوي جذيه ؟

كان يرمس بانكسار وضعف وكانت فيه الصيــحه .. أول مره اسمع هالنبره في صوته .. لويـت عليـه .. وحسيت بدمعته على ثيابيه .. عمريه ماتوقعت اني بشوفه بهالضعف !! عقب ما ابتعد عنيه وتم يمش دموعه بطرف سفرته .. قلت له ..

حموده: بقولك شي بس اوعدنيـه ماتعصـب ..

تغيـرت نظراته للعصبيـه ..

حموده: يالله سترك بقول واللي فيها فيها .. تراها هي تعرفه من ثلاث سنيـن ..

قال خالد بصدمه وبعصبيه : انتي تدريــن ؟؟؟!!!!!

حموده: هيـه .. نصحــتها وقالت ليه انها تركتـه وحلفت ليه بعد .. بس ماتوقعتها ترد له مره ثانيـه ..!!

قال بعصبيـه وهو يشدد ع كل كلمه يقولها : ليـش ماخبرتيـنيه ؟؟

حموده: عشان تسوي فيها اللي سويــته اليوم ؟ حرام عليـك هي بعدها صغيـره ومراهقه وطايشـه ويمكن الجو اللي عاشت فيه هو اللي خلاها تسوي جذيـه !! وانا كنت أبا احل السالفه بهدووء ..

خالد: أي هدووء تراج نصحتيـها ومانفع فيـها !! هاي يبالها تربيه من أول ويديد !!

حموده: عايبنـك اللي سويته فيها ؟ ما رحمـتها ؟ ماكسرت خاطرك ؟ ما أنبك ضميـرك ؟ ما تلومت فيـها ؟

سكت خلاف قال: الحين بس تلومت منها مع انها تستاهل لكن قلبي مايطاوعنيه فيها !!

حموده: أكيـد لنها اختـك .. هي محتايه نصيـحه .. محتايه حد يوقف وياها .. انته بضربـك لها بتخلي خوفها منك يزيد .. وبتخليها تلجـأ لأشياء ثانيه .. اسألنيه انا عن هالشي .. اذا فقدت الحنان بتم ادّوره في كل مكان .. وبترضى بأي شي يملا الفراغ اللي في داخلك .. لاتعاقبـها على فقدها للحنان .. انتوا كلكم قاسيين عليها .. امك عصبيه وابوك نفس الشي وانته .. وسعيد وعلي مالهم خص فيها أصلاً .. والكل يشوفها ياهل .. خبرنيه حق منو تباها تلجأ .. ؟؟ صدقنيه هي ماسوت هالشي من البطره .. الطريقه اللي عاشت بها هي اللي خلتها تسوي جذيـه ..

سكت جنه كان يفكـر فالكـلآم اللي قلتـه .. خلاف قال: انزيـن شسوي الحيـن ؟

حموده: سر ورمسـها افهم هي ليش سوت جذيـه .. حاول تتقرب منها ..

خالد: هذا رايـج ؟

حموده: هيــه .. يالله صوب المستشفى ؟؟

خالد: انزيـن .. فذمتيـه انــج عاقــل ..

حموده: اعجبــك ..

خالد: من زمان عايبتنيه ..

حموده: يالله خلنا نسيـر صوب اختك اللي كسرتها فالمستشفى ..

خالد: الحين بتعايرينيه .. ؟؟

حموده: لا فديــتك ماعاش من يعايرك !!

ضحكنا وقمنا نفضنا عنا التراب وركبنا السياره ..

فالسيـاره ..

خالد: انتي شقايل ترومين عليّه جذيـه ؟ لو حد غيـرج قايل هالرمـسه جداميه ومدافع عن فطوم جان كفخته على ثمـه !!

حموده: انا غيـر والناس غير ولا انته شو رايـك ؟

خالد: مالي راي غير رايــج !!

ابتسمت بس تذكرت فطوم وقلت : الا اقول انته وايد عورت فطوم ؟؟

خالد: لا .. بس اغمى عليـها .. فريتها فالمستشفى وروحت عنها .. ماتم ليه ذهن عقب اللي استوا واللي شفته ..

حموده: انته تروم تسامحها ؟

تنهد عقب قال : مادري .. مادري شو اللي بسويه .. انا الحين ساير صوب المستشفى ومادري اذا كنت اروم اجابلها ولا لا .. صح اني اقتعنت برمسـتج .. لكن احسه صعب اني اسامحها بسهولــه عقب اللي سوته ..

حموده: ماعليـه هي يبالها شوي تتأدب .. انا وضحت لك موقفها من علاقتها بهالريال .. لكني ما اروم اوضح سبب طلعتها فياه لا ومن جدام البيت بعد .. هالشي هو اللي مفروض اتيازا عليه .. لنها جذيه تجاوزت الخطوط الحمـرا !!

خالد: ماشالله حرمتيه مستويه محلله نفسيـه واجتماعيه ..

حموده: شرايك اسوي لي برنامج فالتلفزون .. ؟؟

خالد: لالا استريحي ماعندنا حريم يظهرن فالتلفزون ..

حموده: انته متخلف ..

خالد: وافتخـــر ..

حموده: ههههههههههه ..

خالد: فديت ضحكتج ياربيه .. تصدقيـن انج تنسينيه كل هموميـه ..

ابتسمت وكملنا دربنـا صوب مستشفى "توام" ..

يوم وصلـنا بركن خالد السياره ونزلنا و دخلـنا صوب مال الطواري .. تخبرناهم عنها قالوا انه مرقده ومسويـلها مغــذي .. تبعت وحده من الممرضات عشان توديني صوبـها .. وصلنا .. يرت الستاره وهبـطت على فطـوم اللي كانت مغمضه عيونها تون ..

حموده: فــطووم فــديــتـج شيعورج ؟؟

فتحت فطوم عيونها وقالت: حموده ؟ د د دريتي ؟؟

حموده: هيه خبرنـيه خالد ..

فطوم: ويـنه هو ؟

حموده: واقف برع ..

دمعت عين فطوم وخلاف تمت تصيح و تبااااغــم ..

لويت عليها وقلت : بس يا فطـوم هــدي خــلاص لاتسويـن بعمرج جذيه .. خلج قويه ..

فطوم: شسوي اذا انا مب قويه ؟ اذا انا ماروم استحمل الضغط ولازم أشكي ؟ شو اسوي اذا انا مب انسانه كامله ؟ اذا كنت أغلـط ؟ حرام علــيه والله انه عـق عليّه كــلام ماتوقعت أسمـعه فـ حياتيـه من حـد .. انا ماعورني الضرب .. لا ابـداً ولا حسيت فيه .. اللي طعننيه هي الرمسه اللي قالها ..

أشفقت على حالـها وماقدرت احصل كلمات تسعفنيه فمثل هالموقف ..

صاحت وصاحت وصاحت وفرغت كل مافيـها .. وخـلاف رقـدت .. تأمـلت ويهها الأحمـر .. وآثـار الضـرب .. كسـرت خاطـريه .. بس انا مالوم خالد .. ولا ألومها هي .. انا ألومهم بثنيناتهم !

ظهرت عنها وحصلت خالد يالس ع واحد من كراسي الانتظار ومتساند ومغمض عيونه .. يلست عداله ودقيته ع جتفه .. رفع راسه وطالعنيه جنه يتريا منيه رد ..

حموده: صاحت لـين رقدت .. ماشي دكتور هنيه أبا اتخبره عن حالتها ..

خالد: أظني هذاك اللي واقف هناك (واشر براسه عليه ) شفته يرمس الممرضه اللي هبطت عليكم ..

حموده: بسـير أرمـسه ..

خالد: لاوالله ؟ وانا شو جدامج ؟ طبل ؟

حموده: يييييه يوم أقولـك انته متخلـف ماتـصدق !

خالد: الريال هو اللي يتبدا ع الحرمه هب الحرمه هي اللي اتبّدا عليه وجانه هالشي تخلف فـ أنـا أكـبر متخلـف ..

حموده: يا متخلف .. !

خالد: وأفتـخر !

حموده: فديــتك يا أحلى متخلـف ..

خالد: هههههههههههههههههه فديت عيونـج ..

وقام صوب الدكتور وتم يتخبـره عاد من قرادة الحظ انه الدكتور بريطاني .. ومايعرف شي فالعـربي .. وخالد مايعرف شي فالانجليزي .. حاله وحال شوّاب العزب واحد > فذمتيـه انهم مـلح الحياه ! ..

المهم توليت انا سؤال الدكتور .. بانجليزيتيه اللي "ماتخرش الميّه" .. عـرفت أنـه فطوم نازل ضغطها وعندها فقر دم .. وفوق هذا صدمة عصبيـة .. يقول انه بـاجر نروم نظهرها من المستشفى وهم الحين بينقلونها في حجره بدال مال الطواري .. ويبون حد يوقـع عشان يودونها الحجره .. سار وخالد ووقع عقب ماترجمت له كل رمسة الدكتور ..


يلسنا ع الكراسي لين ينقلون فطوم فـ حجره ..

حموده: الحين شو بتقول لأمك ؟

خالد: بقولها يوم رديت البيت حصلتها تعبانه وقالوا فيها فقر دم ولازم يرقدونها ..

حموده: هيه زيـن .. بس والله اني خايفه عليها ..

خالد: مني ؟

هزيت راسي بـ هيه ..

خالد: ما بسويـبها شي بس خليـها اطّيعنيـه .. أنـا في راسيـه شـي ..

حموده: شو هو ؟

خالد: بيوزهـا سيف ولـد خالـيه ..

مادري ليش اعتفست يوم ياب طاري سيف ..

خالد: هو اليوم فالعزيمه رمسنيه فالسالفه ..

استغربت وقلت : بس انا ماشفت حد من بيت خالك عندنا ..

خالد: هو ياي بروحه ..

حموده: أهــــا .. بس مب جنه أكبر عنها بواايد ؟

خالد: وانتي شدراج بـ عمره ؟

ارتبكت وماعرفت شقول بس تلاحقت عمريه وقلت : تراك انته مره خبرتنيه ..

خالد: صدق ؟ ما اذكر اني قلت لج ..

حموده: شسويـبك يوم انته شيبه تضم وتضيّع ؟؟

خالد: هههههههه ..

تميـنا يالسيـن شوي لين نقلوا فطوم فالحجره وخلاف سرنا صوبها بس خالد ماطاع يهبط ..

هبطت انا عندها ووقفت عند شبريـتها .. تمت اطّالعنيـه .. وخلاف قالت ..

فطوم: بعده هنيـه ؟

حموده: هيه ..

فطوم: معصب ..؟؟

حموده: هو مب معصب كثر ماهو زعلان ع اللي سويتيه ..

فطوم: طحت من عيـنه ..

حموده: لأنج خنتي الثقه حتى انا جذبتي عليّه .. !

فطوم: شسوي عاد .. الكل مطنشني منو تبيني أرمس ؟ ياني ضيق .. ماقدرت اتحمل .. انا عايشه ع الهامش فهالعايله ..

حموده: تفكيـرج هذا بالذات تفكيـر مراهقيـن بعدج ماواحيتي تعقليـن ..

فطوم: وانتي يوم كنتي تظهرين فيا ربعج فـ أمريكا هذا مب شي غلط ؟

حموده: انا ماكان عندي أهل .. كنت غريبه .. شو تبيني اسوي ؟ ماعندي غير هالربـع كنت أعدهم أهليه ..

فطوم: نسيتي سيف ولد خالي يوم كان فياج فـ امريكا شو كنتوا تسوون ؟

سمعت صوت حد فج الباب .. رفعت راسيه .. كان خالد وكـل انوااع العصبيـه والغضـب فعيوونـه .. زغـــت .. أكيـد سمع رمسة فطـووم .. ياويلي شو بيفججنيه منه هذا ؟ ترانيه كنت ناقصه مصايب انا !

يا صوبيه ومطنيه من ذراعيه بالقـوو .. وقال: ثــرج انتـي ساس البـلا هاه ؟

ماوعيت الا بـ طراق حار على ويهيه .. طالعته بكـل صدمه وعصبيـه وظهرت من الحجره ودموعيـه على خديه تحرقه أكثر ماهو محترق ..

طلعت من المبنى ومشيت في على طول المواقف والشارع والسيايير اللي يخطفن كل حد يفج دريشته ويطالعنيه بس انا كنت اطنش وما التفت صوب حد امره .. بس فجاه انصدمت بـ صوت خالد رفعت راسيه شفته يزاعق عليّه ..

خالد: بتركبيـن ولا أمطج من كشتج وأركبج غصـب ؟

حموده: تخسي و تهبي اركب عندك والله لو تموت ..

خالد: وبعد لج عين ترمسين ؟ صدق اللي قال فوق شينه قوات عينه ..!! سمعي انتي بتركبين ومب بكيفج لا غصبن عنج ..

حموده: سـر انقع في أكبر درام تحصلــه جدامك .. وان ماحصلـت هكوه درام الزباله جدامك سر انقع فيه .. عنلااااااتــك من شيــبه !

تنــرفز واايد من هالكــلام واحمرت عيونـه ورصصهن ترصيص .. تمن السيايير يصّيحن له هرانه فـ حرك السياره وظهر من المستشفى بكبره .. شكليه مابتفجج منه اليوم .. مشيت لن ظهرت من المستشفى .. ارتحت يوم ماشفت سيارته موقفه ع طرف الدوار .. ذلّيت عمريه ووقفت تكسي وأول ماييت بركـب ماوعيت الا بحد يمطنيه من ذراعيه وطبعاً كان خالد ..

خالد: تكسي بعد ؟ والله ماركبتي ..

مطيت ذراعيه من ايده بقو لين حسيت انه ايديه بتنفج من الجتف .. طالعتـه بنظره تحررق وركبت التكسي ورقعت بالباب في ويهه ..

فكرت أسير بيت عموه بما انه فاضـي .. بس أكيد خالد بيتبعنيـه .. فكرت اني أحوط فالشوار لين خالد يمل وتلوع جبده .. فكرت أسير صوب مي ربيعتيه بما انهم انتقلوا هنيه فالعين .. فالعوهه تحديداً .. فـ قلت حق الهندي راعي التكسي ..

حموده: روح العوهه ..

الهندي: ماما انا مافي مالوم شو هازا أوهه ..


حموده: يوه نسيت انا بعد .. الفوعه الفوعه روح الفوعه ..

الهندي: زين ماما ..

ماعندي غير مي أشكيلها .. بس مي الصغيرونه اخاف عليها .. بتم روحها هناك .. مابكون فياها .. ياربــــي شســـوي ؟

صاح تيلفونيه .. طالعت الرقم .. كان خالد .. طبيته .. دق خمس مرات وطنشته وآخر شي رديت عليـه ..

حموده: هاه شعندك حرقـت التيلفون شو تبا لعوزتنيه ترااك ..

قال وهو يصارخ : خلي هالتكسي الملعوون يوقف على طرف الشارع لا أتخبــل وادعمكم !

التفت ورايه شفته وايد جريـب منا وعادي يدعمنا في أي لحظه ..

حموده: انته مينووووووووووووون ؟؟

خالد: وانتي خليتي فيّه عقــل يالله وقفي يالله ..

حموده: انزين انزين يبوك انا مب بايعه عمريه وادريبك خبله تسويـها ..

بندت فويهه وقلت : رفيق وقف على طرف الشارع ..

وقف على طرف الشارع ودفعت له ونزلت وركبت عند خالد ..

تمينا ساكتين وانا عني كنت خايــفه اما هو كانت ملامح ويهه جامده وشكله لين الحين معصـــب الله يســتر !

وقفنا عند مكااااااااااان فـــااااااااااضــــي .. ماعرف وين هو بالضبط .. ماعرف اذا كنا بعدنا فالعين ولا طلعنا منها .. نزل هو من السياره ونزلت انا .. تم ينافـخ شوي عشان يهدي عمره خلاف قال ..

خالد: خبرينيــه كــل شي .. كـــــــــل شي ..

تميـت زايغه واطالعـه ..

خالد: لا تخافين يمكن ما اذبـحج ..

صدقوني انتفض كل شي فيّه .. نبرته اللي يرمس بها تزيّغ !

صرخ: بترمسيـــن ولا شــو ..

استجمعت كل جرأتيه وقلت: انته مايحق لك تحاسبنيه ع الماضـي ..

خالد: لا والله ؟؟ لــوح انا جــدامــج ؟؟ انا ريــلج يالبـقره !

حموده: قصدك انك ثور يعني ؟

خالد صدق عصب يوم قلت هالرمسه .. ومسكنيه من شعريه من ورا وتم يهزنيه ..

خالد: بترمسين ولا اجلـع شعرج واخليـج قرعا ؟؟؟ ارمسي لابركتن فيـ .... العدو ..

مب رايم يدعي عليّه ! ياخي يوم انا غاليه عندك هالكثر ليش تسوي فيّه جذيه ؟

حموده: انزين برمـس برمس بس فج شعريه ..