و في يوم وليله اصبحت وحيده - الصفحة 5

Amooon_Alnahdi · #1 01-25-2014, 07:58 PM

البارت الرابع

دقت شهد ع ندو وقالتلها وقرروا يحضرون عرس موزه

-------------------------

الخميس الساعة 2:30

شهد: يلا ندو انا برع طلعي بسرعه

ندو: اوكي اوكي

طلعت ندو وركبت السياره الي فيها شهد والسواق وسلمت عليها

شهد تكلم السواق: وقف وقف عند هالصالون

وقف السواق ونزلوا ودخلوا وحجزوا

ندو: شهود شسوي في شعري؟

شهد: انتي بتلبسين الفستان الاحمر صح !

ندو: ايه بس ماعرف شسوي بشعري ..

شهد: احس لو تسوين فير وتخلينها تحطلج اياه ع صوب بيطلع حلو

ندو: تقولين

شهد: هيه

ندو: اوكي

سوو شعورهم –ندو سوت فير وقالتلها تحطلها مسكه وتحطه ع صوب ,اما شهد سوته استشوار عادي ومن تحت فير – ودقوا ع السواق عسب ايي ياخذهم ويردون يتجهزون لان الساعة كانت 7:33

.

.

عند حميد كان واقف عند المنظره ويعدل عقاله

دق فهد عليه

فهد: ارررحب

حميد: ارحبت

فهد: ها جاهز ولا؟

حميد: خلاص دقايق واكون عندك

فهد: اترياك

وسكر الخط لف ع التسريحه واخذله عطر وقعد يتعطر

وطلع عشان يأخذ فهد ويروحون العرس

.

.

كان يتقلب ع السرير ومتعايز يقوم وما صحاه غير صوت المسج الي وصله

شاف فونه وهو مبتسم ويوم شاف المرسل كشر.

ذياب: قسم بالله محد فاضي كثر شركات ايتصالات كل ثانيه ييطرشون مسج اهلاً بك , سعدنا برؤيتك لا لا مايخص سعدنا برؤيتك لكن زودوها ياخي "وراح الحمام وهو يتحلطم"

نزل من الحمام –الله يكرمكم- وراح بدل ولبس شورت اسود وقميص ابيض وجاكيت اسود

لانه قال بيمر حمود وبيسيرون عند الشباب يوم نزل حس البيت هادي قال بيسير المطبخ يسأل سوني شغالتهم

دخل المطبخ وانتبه ع الي واقفه عند الفرن

ذياب دق الباب عشان يعرف منو هاي لانه من هيئتها مايبين انها شهد فقال يمكن وحده من بنات خالته

ندو لفت وانصدمت يوم شافته وذياب تنح فيها , يمكن مرت 3 ثواني وهو يطالعها

ندو حست انه طوّل وهو واقف: الأخ مطوّل ؟

ذياب: هـ ـا ايه انزين

وطلع

ندو: اففف مالقيت اشوف الا هالمخلوق استغفرالله يارب (وخلصت وطلعت الاندومي فوق)

كلوا وخلصوا وعلى طول كل وحده راحت تلبس فستانها

شهد نزلت من غرفة التبديل

شهد نزلت من غرفة التبديل

شهد: ها شرايج حلو ولا ؟

ندو: ياحيوانه والله تجنيين

شهد: تسلمين

كانت لابسه فستان سكري وطويل في كسرات عليه حزام اسود وفوق يعني تحت الرقبه فيونكه صغيره سوده

عقبها دخل ندو وبدلت ولبست فستان احمر يوصل لتحت الركبه اكمامه طويله وكله دانتيل وشوي منكوش

شهد: اقول ندو اقري على نفسج

ندو: ان شاء الله وانتي بعد

شهد ماحطتلها وايد بويهها بما انها ماشاء الله عليها حلوه واذا حطت ميك اب مابيبرز جمالها .. فحطتلها فاونديشن وماكثرت منه عقب حطتلها بلشر برونز ورسمت عينها بطريقه حلوه كبرت عينها ومسكرا وروج لحمي

اما ندو حطتلها فاونديشن وبلشر احمر بس ماكثرت وايد يعني حمار خفيف وخلت شهد ترسملها عيونها نفسها لان ماشاء الله شهد تعرف بهالشغلات .. خلصت من رسمة العيون وطلعت روعة كبرتلها عينها وحطتلها مسكرا و روج احمر صارخ ..ولبسوا كعوباتهم الي لونها اسود وتبخروا وتعطروا ولبسوا عبيهم وانطلقوا للعرس

.

.

وقفت السيارة وطلعت شهد وندو ودخلوا داخل ولقوا بطريقهم ام موزه سلموا عليها وباركوا لها وودتهم عند موزه

عند موزه كانت متوتره وتقرا المعوذات

ام موزه وصلت شهد وندو واستأذنت منهم لانها مشغولة مع المعازيم وطبعاً وصتهم يهدون موزه ويخففون من توترها

اول وحده دخلت هي ندو يوم شافتها ع طول راحت تحضنها: الف الف مبرووك ياقلبي منه المال ومنج العيال

موزه: الله يبارك فيج حبييبتي عقبالج يارب

ندو رفعت ايدها: اممين يارب

موزه: يالملقوفه

شهد: مبروك حياتي الله يتمم عليج
موزه: الله يبارك فيج وعقبالج..
شهد: ههههه آمين ..
.
.
.

اليوم عيد ميلادها ومحد متذكره زعلانه وايد لان عندها عايله بس ماتحس بهالشعور يعني عندها اخوان بس تحس انهم اسم اخوان صحيح تحبهم وتتمنى لهم الخير لكن بعد تتمنى انهم يحبونها ويحسون فيها ويتذكرون ان لهم اخت وحيده تحتاج لهم ولحنانهم

كالعاده كان محد بالبيت غيرها هي وامها كل اخوانها طالعين وابوها قال انه عنده شغله

استغربت لان ابوها نادراً يطلع من البيت اصلاً مايطلع الا للصلاة او اذا بيروح يشتري شي للبيت من البقاله

راحت عند امها الي بالغرفه

ورده: يمه

ام ورده: هلا يمه

ورده: يمه بسألج ابوي وين طلع بالعاده يوم يطلع مايتأخر بس هالمره تأخر وبصراحه خايفه وايد

ام ورده ابتسمت: لا تخافين حبيبتي عنده شغله صغيره بيخلصها وبيرد على طول ..

ورده: وشو هالشغله الي طلعت فجأه..

ام ورده: يابنتي اصبري بيرد وسأليه ..

ورده: بصبر وامري لله ..

طلعت الصاله وقعدت تستنى ابوها الي دخل من مدخل المطبخ وطلع فوق عشان ينادي ام ورده ..

ابو ورده: يلا يا سعاد سوي الي قلتلج عليه

ام ورده: ان شاء الله

طلعت ام ورده وراحت عند ورده

ام ورده: اقول ورده شرايج نروح الملحق نعدل فيه شوي

ورده: بس محد يدخله اصلاُ ف ليش نعدل فيه

ام ورده: ماعليه بس بنعدله وبنظفه حتى لو محد يدخله بعد تخيلي احد يا لا سمح الله والملحق جي خايس ومن سنه مب منظفينه

ورده: انزين يلا

قاموا وطلعوا للملحق اول وحده دخلت كانت ورده

وكان ظلام ما استغربت ولا شكت حتى وتوجهت لمكان الليت عشان تشغله بس اشتغل قبل لا توصل ...

اتفاجئت بأبوها الي حضنها : كل عام وانتي بخير حبيبة ابوج وان شاء الله اشوفج عروس وعسى كل ايامج سعاده وفرح ..

دمعت عيون ورده: حبييبي ابوي وانتي بخير وصحه وسلامه ..

خذتها امها لحضنها: كل عام وانتي بخير ياحبيبتي وعسى يارب كل ايامج سعاده وعسسى الله يبعد عنج كل ضيق يابنيتي ..

ورده صاحت وشدت على حضن امها: وانتي بخير يالغاليه عساني مانحرم منكم ..

ابو ورده مسك يدها وودها عند طاوله فيها كيكه بسيطه جداً وفيها شمعه في النص

ورده: ليش كلفت على نفسك يابوي اصلاً يكفيني وجودكم حواليي فهاليوم ..

ابو ورده: يابنيتي قلت اييب لج هالكيكه و اعوضج عن كل اعياد ميلادج الي راحت وماسوينا لج شي ..

ام ورده: يلا عاد طفي شمعه وقصينا من هالكيك خلنا نشوف ذوق ابوج

ورده: هههههه ان شاء الله

طفت الشمعه وقصت الكيك وعطتهم وقعدوا ياكلون وكانت طايره من الفرحه ..

.

.

والحين يا وقت زفة موزه

ام موزه: يلا يابنيتي الناس يتريونج

موزه: يمه الله يخليج مابي خلاص هونت

ام موزه عصبت: موزه بتنزلين ولا اناديلج اخوج يتفاهم معاج

موزه: لا لا خلاص بنزل

نزلت بمساعدة امها وشهد و ندو

انفتح الباب وابتعدوا شهد و ندو ومابقت غير امها الي ماسكه إيدها

كانت جميله بمعنى الكلمه

مشت على زفة هاديه تناسبها ووصلت للكوشه صورتها المصوره كم صوره

وبعدها طلعوا شهد و ندو سلموا عليها وباركوا لها مره ثانيه وتصورا معاها كم صوره وطلعوا ..

وحده ورا الثانيه طلعت تباركلها وبعدها قالوا ان المعرس بيدخل

تقطوا الحريم ودخل اخوها وعمها وريلها وابوه

سلم عليها عمها وباركلها وبعدها اخوها حضنها وبارك لها

وسلم عليها عمها الي هو ابو المعرس وبارك لها

وبعدها قرب منها وباسها على جبينها

سعيد باس جبينها: مبروك ياقلبي ..

موزه استحت ونزلت راسها : الله يبارك فيك ..

تصوروا كلهم صوره جماعية وبعدها طلعوا

يت فاطمه اخت سعيد وقالتلهم يقومون عشان يقصون الكيك

راحوا عند الكيك ومسكوا السيف وقصوا الكيك

سعيد خذ قطعه صغيره وأأكلها ونفس الشي موزه بعدها شربوا العصير وردوا قعدوا مكانهم

قعدوا شوي بعدها سعيد قال حق امه انه بياخذ زوجته وبيطلعون

وماعارضت امه

راح سعيد وموزه الغرفه عشان موزه تبدل

كانت ام موزه بتدخل تساعدها بس

موزه: يمه ماودي اتعبج بس اذا ماعليج امر سيري ناديلي شهد و ندو عشان يساعدوني في التبديل

ام موزه: ان شاء الله يابنيتي

سعيد كان برع يسولف مع حميد وشلته

دخلوا شهد و ندو وساعدوا موزه في التبديل

لبستلها مغربي والميك اب خلتها نفس ماهوا لانه طلع حلو مع المغربي

طلعت وسلمت ع الكل وشهد و ندو كان طالعات نزلوا وشافوا موزه متوهقه ماتعرف وين تسير

راحوا عندها

ندو: وين وين يالحبييبه

شهد: ههههههههه شكلج يضحك وانت تلفتين يمين ويسار تبينه ينتبه لج

موزه وهي شوي وبتصيح: جب انتي وياها والله بصييح

ندو: لا لا لا تصيحين والله ماغير اليوم تباتين في بيت اهلج

موزه ضربتها على كتفها: ياحيوانه لا تتفاولين

شهد: هههههه خلاص بسكم وانتي ياحيوانه دقي حق ريلج الي ساحب عليج وفالها ويا ربعه

موزه: ياحماره لا تقولين ساحب عليج والله تحطميني وبعدين استحي ادق احس فشله جدام ربعه

ندو: اففف خلاص خلنا نسولف شوي ويوم بينتبه حضرة جنابه انه تأخر بطيرج عنده

كانوا يسولفون ونسووه موزه ومحد انتبه للثلاث بنات غيره

حميد: اقول سعود ما كأنك نسيت المدام

سعيد ضرب جبهته: اوووه الله يلعن ابليس نسيتوني اياها خل اسير اجوفها

كان متوجه للقاعه بيدخل بس

شهد: اييي جوفي ريلج بيدش داخل

ندو: صباح الخير جان كمل

موزه: جب انتي خلاص انا بسير عنده

سلمت عليهم ودخلت القاعه عند سعيد

شهد: يلا ندو

ندو: يلا

ركبوا السياره وحركوا و ف نص الطريق شهد انتبهت ع الشنطة الي ماسكتها

شهد شهقت: اووووووف

ندو: شفيج

شهد: نست شنطتها عندي ..

ندو: يالييييييييل الي مارح نخلص ..

شهد: شسوي ..

ندو: دقي عليها ..

شهد: ياغبيه فونها بالشنطة ..

ندو: اممم انزين شوفي اخر مكالمه ودقي ..

شهد وهي تفتح الشنطة وتاخذ الفون: استغفر الله العظييم مسكر يعني مافيه جرج ..

ندو: قسم بالله ياشهدوه بفرج انتي والشنطة برع السياره اوووف يعني مالنا الا نرجع ونعطيها هذا اذا ماتحركوا.. وانا فيني رقاد..

شهد: وهذا الي بيصير .. وانتي لاحقه ع الرقاد

ندو: اوووف

قالوا للسواق يردهم للقاعة وتقريباً محد بقى الا المقربين

كان يتكلم بالفون ويوم خلص بيركب السياره سمع اصوات بنتين منحشرات واشكالهم تضحك

يته ضحكه بس ابتسم

ركب سيارته وتحرك قرب منهم كان بيكمل بس حس انهم متوهقات ف وقف قريب منهم

: تحتاجون مساعده

ندو بعصبيه: قسم بالله يا انت لو ماذلفت بشوتك الحين

شهد قرصتها وردت: لا اخوي مشكور

حميد: والله اشكالكم مبينه انكم متوهقات ماعليه اذا تحتاجون شي قولولي وان شاء الله اساعدكم

ندو: ماتفهم انت قالتلك مشكور يعني تقدر تذلف

حميد كان وده يكفخها بس سكت حس انه شهد تبي تقول بس مستحيه

شهد: لو ماعليك امر اخوي ابي اسألك تعرف المعرس

حميد: هيه سعود ربيعي بس ليش تسألين

شهد: اها امم بس شسمه حرمته تستوي ربيعتنا ونست شنطتها عندنا يعني لو ماعليك امر تعطينا رقم سعيد عشان نقوله ..

حميد: حاضر ..

عطاها الرقم وشكرته وركبت السياره هي وندو الي تتحرطم

شهد: اووهههووو خلاص ندو عورتيلي راسي ..

ندو: شهد حرام عليج تعبانه ابي ارقد بتوديني ولا (بصراخ) ولا ترا والله بنزل ورد البيت مشي ..

شهد: انتي الي حرام عليج سكتي شوي خليني اكلم الريال ونخلص من هالسالفه ..

ندو: عندج عشر دقايق تخلصين كل شي وترديني البيت ..

شهد: اوكي اوكي بس سكتي ..

دقت على سعيد الي كانوا بالسياره وتوهم موقفين عند الفندق شاف الرقم غريب وطنشه بس رد يتصل مره ثانيه

موزه: حبيبي ليش ماترد

سعيد: رقم غريب ماعليج حياتي ناس فاضيه

ورد الرقم يتصل

موزه: انزين رد يمكن احد يعرفك ..

سعيد رد: الو

شهد: الو

سعيد ناظر موزه وكأن يقولها مب قلتلج ناس فاضيه: نعم اختي شكلج مغلطه ..

شهد: لا لا مب مغلطه مب انت سعيد !!

سعيد: هيه نعم انا سعيد منو انتي ؟

شهد: السموحه اخوي انا ربيعت موزه ممكن تعطيني موزه ..

سعيد استغرب يعني لو تباها بدق على فون موزه بس قال عقب بيسأل موزه عطا موزه الفون: هاج هاي ربيعتج متصله ..

موزه استغربت وردت: الو ..

شهد: الوا هلا مويز ..

موزه: شهوود شعندج متصله على فون ريلي يالخايسه ليش ماتصلتي علي وبعديني اصلاً شعرفج برقمه

شهد: ياحيوانه انا الي مفروض اصارخ عليج مب انتي .. نسيتي شنطتج عندنا ونحن الي ابتلشنا ..

موزه وتوها تحس انه شنطتها مب موجوده: اويه وانا اقول احس انه في شي ناسيتنه بس ماعرف شو ..

شهد: لا ياشيخه .

موزه: هههه خلاص انزين باجر بمرج وباخذها

شهد: خلاص اوكي

موزه: باي

وسكرت من عندها

ندو: والحين !

شهد: خلاص يابوي بنردج بس انطمي شوي

قالت حق السواق يروح بيتهم اول وبتخلي وحده من الخدم تركب مع ندو ويوصلونها ..

.

.

سعيد: يلا حياتي بدلي وتعالي الصاله عشان نتعشى ..

موزه مستحيه: ان شاء الله

بدلت ولبس روب نوم وعدلت شعرها ومتوتره وايد بس تعوذت من إبليس وفتحت الباب وطلعت

سعيد يوم شافها بلم.. موزه حرقتها نضراته

موزه نزلت راسها

سعيد: حياتي انا شبعان شرايج نروح الغرفه نسولف

موزه فهمت قصده وعلى طول: لا لا لا انا يوعانه

سعيد: اوفف انزين

تعشوا وخلصوا

سعيد: حياتي يلا بنروح الغرفه

موزه وهي بتموت: حبيبي لا خلنا بالصاله شوي وتعال افتح التلفزيون في فيلم بيعرضونه اليوم وايد حلو ..

سعيد: انا بخليج تشوفين فيلم خيالي احلى من الي بتشوفينه بالتيلفزيون (وشالها وودها الغرفه) ~_^

.

.

ام حميد: حميد حبيبي باجر قوم عمتك بيون عندنا

حميد :اوووف يعني بتيي النشبه

ام حميد بعصبيه: عييب عليكك تقول حق بنت عمتك نشبه

حميد: وانا صاج عند ربي يمه والله العظيم ماشفتي حركاتها قسم بالله لو ما اصطلبت بييها كف على عينها يخليها تحشم عمرها

ام حميد: بسك عاد عالبنت ويالله تصبح على خير انا بسير ارقد

حميد راح يحب راس امه : وانتي من اهله

تِكلمناَ عُنَ الدنياِ وجاءَ طاريُ الولهِ والشوقَ .
ذكرتُ الليٌ بعدِ عنيُ بدونَ شعور انا دمعتِ .

وقمتً ودمعتيُ بعينيٌ اخافِ يشوفهاِ مخلوقَ .

اخافِ يشوفهاِ مخلوقَ اعرفٌ الناسَ ماترحمُ .
عليُ شتمتَ اذا ضيعتُ .
ينادونيُ وانا سامعَ واسويُ نفسيٌ ما اسمعِ .
عزيزُ وما ابيٌ انذلَ ومابيُ انسمعَ لاصحتٌ .
اخافِ انيُ اطالعهمَ ودمعهِ بناظريُ تدمعَ .
مابيهمُ يشوفونيُ الينِ انكَسرتٌ وطحتِ .

_كلمات : بدر حمدانَ ! __DEFINE_LIKE_SHARE__

Amooon_Alnahdi · 02-22-2014, 04:28 PM

السلام عليكم ورحمةة الله و بركاتة

جد جد آسفه بس انا مظطره اوقف الرواية . .
لاني محبطه بشكل كبير . .

يعني لا ردود ولا متابعين . .
اول الايام كان فيه متابعين مع ان العدد
قليل لكن فرحت بشكل وتحمست للكاتبه . .
وكتبت للبارت الخامس و وقفت والحين صارلي حوالي شهر
وانا اتريا ردورد ما بقول ردود عالأقل رد واحد يحسسني ان في احد يتابع مجهودي . .
كان فيني حماس للكاتبه لكن الحين تبخر وما اتوقع ارد اكتب . .
بتريا بعد يعني بالكثير شهر بشوف اذا فيه ردود
ان اكمل ان شاء الله رح اكمل اما اذا مالقيت ف مع الأسف رح اوقف كتابه . .

وشكراً للجميع ֆ' ♥♥
__DEFINE_LIKE_SHARE__

مهـــــــوووووي · 12-04-2015, 11:09 AM

وين التكمله حرام كمليها حلوه الرواية __DEFINE_LIKE_SHARE__

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
الانتقال إلى العرض العادي العرض المتطور الانتقال إلى العرض الشجري

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
وحيده	محروم.كوم	منتدى أخبار المواقع والمنتديات العربية والأجنبية	0	10-11-2011 10:30 PM
الف ليله وليله (1)	محروم.كوم	منتدى أخبار المواقع والمنتديات العربية والأجنبية	0	04-26-2010 03:30 AM
ودي احط لكم كلكم وليمه بس وين تقترحونها	محروم.كوم	منتدى أخبار المواقع والمنتديات العربية والأجنبية	0	05-09-2009 01:10 PM
لم اعد وحيده	\\شموخ الامارات..	شعر و خواطر	1	01-24-2009 06:28 AM
لم اعد وحيده	الزعيـــم العيناوي	شعر و خواطر	8	12-25-2008 05:09 PM