البوح الحادي عشر .~
ديم .~
بو جنان [ سكت وعقب قال ] :حد حاول يتحرش فيج ؟!
صدمني السؤال ما كنت متخيلة أنه يسألني . .
مرت ببالي كل اللي حصل لي . .
أنا: هيه . .
بو جنان: توقعت هذا الشيء ممكن تخبريني كل شيء صار !
أنا غمضت عيوني و سردت له كل اللي صار . .
بعد وفاة أمي الكل تأثر أبوي اللي كان متعلق فيها وايد ما قدر يقعد بمكان هيه مب موجودة فيه . . فكثرت سفراته كان يخلينا بروحنا بالأيام أكبرنا خالد كان يدرس بالجامعة عقبه حمدان كان تقريباً بالثانوية وأنا كنت بعمر 11 سنة تقريباً في صف خامس
في مرة من المرات تعرض لي السواق وساعدته الخدامة حاول يقرب مني بس ما خليته . .
ركضت منه للبيت ما خبرت حد باللي صار بس ما رحت المدرسة أسبوع الكل يحسب إني مريضة . . أو أدلع أو بعدني ما نسيت أمي . .
أخواني كانوا صغار ما كانوا يعرفون . .
حريم أعمامي بعاد وكل وحده لها بيت ما كانوا اييونا اللي آخر الأسبوع . .
لما رد أبوي قلتله يسفر السواق وخبرته اللي صار توعد له وللخدامة وسفرهم . .
وياب لنا واحد مصري [ ياسر ] كان محترم وكبير في السن وياب معاه زوجته أمينة . .
اللي كانوا طيبين . . وهم الي داروا بالهم علينا
من ذاك اليوم وأبوي يخلي أمينة أو وحده من الخدم اللي ويانا من عمر اتي ويانا مع السواق لو ماكان واحد من الشباب ويانا . .
بس أنا ما كنت أثق فيهم صرت أتصرف مثل أخواني الصبيان ألعب كورة وياهم أحاول أكون خشنة أي حد يتعرض لي أضربه [ أرفع رأسي له ] صرت أشل حديد . .
إطالعني بصدمة : حديد . .
أنا: هيه بس وقفت من زمان لو بتلاحظ عضلاتي بارزة وأحاول أتجنب أي حد أضارب وياه عن أأذيه . .
بو جنان: ما بتحاولين تردين بنت
أنا [ بهدوء ] : تراني بنت
بو جنان : لا قصدي تتركنين حركات الصبيانية
أنا: ودرتهم بس في أشياء ما قدرت مثل الكورة والسيارات ألعاب الأيباد الولادية . .
بو جنان: شكلج
أنا: ترا لو ييت قبل سنة بتنصدم من شكلي ملابسي ولادية وكلها زرقا جواتي ولادية سبورت . . شعري سبايكي نفسهم . .
بس خلال السنة غيرت ستايلي صرت أميل للألوان البناتية شعري خليته نازل وأحاول أطوله
بو جنان: صدق صدق ما كنت متوقع أبد يكون هذا السبب
أنا: وأنت شو سالفتك ؟!
بو جنان [ يضحك ] : سالفتي !
أنا: هيه . . ليش ما تزوجت بعد أم جنان . .
بو جنان : لو قلتلج سالفتي بتنصدمين . .
أنا: قول . .
بو جنان: لما كملت 23 سنة تزوجت بنت وحده من ربيعات أمي الله يرحمها وكانت حالتهم المادية عادية نفسنا أنا كان راتبي بسيط 3000 درهم إذا ما أقل كنت مخلص أول ثانوي بس كانت عادي وياي لين ما ربت بجنان وعبدالله . .
أنا: عبدالله !
بو جنان: هيه جنان عندها أخو أكبر منها بسنة . . بس
[ قاطعته ]: مات
بو جنان: لا خذته أمه وخلت لي جنان . .
أنا: ليش تركتك ؟!
بو جنان: تعايرني لأنه ولد عمي سلطان عنده أملاك وأنا ما عندي . . كله تبيني أشل منه . .
وصلت السالفة أنه مرة حرضتني أسرق منه بس ما رضيت . . من ذاك اليوم وهيه تغيرت . .
ما تهتم بعبدالله ولا جنان . . مهملة بيتها ومهملتني . . لين ما طلبت الطلاق . .
وشلت عبدالله معاها . . لأنها تبيه سند لها . . وخلت البنت لأنه مسؤوليتها كبيرة ع قولتها . .
أنا: وكيف صرت دكتور ؟!
بو جنان: بعد ما طلقتها . . سفرني أبوج ع حسابه إهنه لأني وايد تأثرت . . ما قصرت علي . . عطاني بيته . . ماله . . لين ما كملت دراستي . . ودخلت الجامعة وشديت حيلي وصرت دكتور مثل منتي شايفة . .
أنا: بس ليش ما تزوجت . . مب كل الحريم نفس بعض
بو جنان: عفت الحريم . . مرة وحدة كفاية . . وبعدين حياتي لجنان وبس
أنا: حتى ولو باجر جنان بتعرس وبخليك روحك . . يبالك حرمة تشيلك
بو جنان: ع يدج
أنا: ع يدي . .
بو جنان: عندج فون ؟!
أنا: لا ما أحتاجه . . أمم بس عندي ايباد ولاب . . عندك مسن !
بو جنان: مسن مال أول . .
أنا: بس حلو . .
بو جنان : يوم بتردين البلاد أبا أتواصل وياج . . ما اباج تردين لسوالف الأولاد
أنا: زين . . بعطيك إيميلي وضيفني . .
بو جنان : ويت بفتح اللاب . .
[ فتحه وفتح المسن . . ايميله فاضي ] . .
بو جنان: عندي هذا الايميل محد يعرفه . . وعندي ثاني للجامعة . .
أنا: زين
بو جنان: كتبي ايميلج
كتبت ايميلي . .
بو جنان: زين . . خلاص أتفقنا . .
أنا: أمم هيه
[ اندق الباب ] . .
جنان: باباتي . .
بو جنان: حياج حبيبي . .
جنان [ تتطالعني ] : شقى قدرتي عليه وما طلع . . أحيد أبوي فضولي . .
بو جنان: ليش ؟! شو مسوية حقي . .
جنان : مشكلة الثقة . . مسوية لك مفاجأة . . قوم معاي
بو جنان : صدق . .
جنان [ تغطي عينه بربطة ]
بو جنان: عن أدعم
جنان: ماسكتنك باباه . .
وديناه لين تحت . .
جنان : جاهز . .
بو جنان: هيه . . بس يا ويلج لو سويتي شيء يخوف
جنان: لاا . .
بطلت الربطة . . وطاحت عينه ع اللوحة . . كان واقف فيها شامخ . . الرسمة تبين صورة فوتوغرافية مب رسمة . . ما شاء الله عليها والله
جنان: ها شرايك ؟!
بو جنان : دامها منج أكيد حلوة . . فديتج
أبويه: الي عنده مثل هالبنت شو يبي من الدنيا اكثر !
أنا: ليش أبويه ما عايبتك !
أرجوان: لا ما عايبنه لأني أنا عنده
[ أطالعتها . . حيوانه متى يات ]
رحت لها وحضتنها . .
أنا: وحشتيني . . يالدبة
أرجوان: أنا مب دبة
الكل يضحك . .
قضينا هاليوم مع بعض . . وختمناه مع حلويات خالوه عايشة وغاية وجوري . . لذيذ . .
.
.
بعد مرور شهرين .~
الكل رد لدراسته . .
سلطان وسمية . . عايشين حياتهم أحلى عيشة الله أكمل فرحتهم بحمل سمية، سلطان متخبل وشالنها ع كفوف الراحة ، وهيه زايدة الدلع عليه ،طبعاً ما يروم يقول شيء ، لأنه ولده أو بنته بين أحشاءها . .
منصور وأرجوان ، حياتهم طبيعية، ما تخلوا من مناوشات من قبل فاطمة ، أحيان تروح بيت أهلها بس مب وايد لأنه منصور صار يمنعها ، لأنه يبيها دوم يمه ، وهيه ما تقدر ترفض له طلب
مريم ، زادت دخلاتها للشات، وضافت الشخص المعروف باسم الفارس ، صارت مدمنة مسن وشات ،وكل يوم تكلمه، هالشيء صار يخليها دوم بغرفتها ، أنقطعت عن أسرتها ، بدعوى المذاكرة . .
عذبة ، قرروا عمليتها بعد نهاية المدرسة والمتبرع هي عليا ، لأنها الوحيدة المطابقة لها ، لا أمها ولا أبوها نفس دمها، بس عذبة قررت يكون هالشيء بعد إمتحاناتهم الفاينال عشان ما تلهيهم عن شيء
ديمة ، زادت محادثاتها مع سعيد [ بو جنان ]، وكل يوم تعطيه تقرير مفصل عن اللي سوته ، لو صارت لها مشكلة هو اللي يعطيها الحل المناسب ، صارت بنت صدق ، شوي شوي قررت تودر البناطلين ،وتبدلهم لتنانير وجلابيات ، شعرها طول شوية بس هالشيء عايبنها ، لأنه هذا هو الشيء اللي يريده سعيد ، ^^
غاية وأهلها ، للحين في بيت سلطان ،وأبوهم أبد ما سأل عنهم ، وصايرة غاية أكثر مع البنات وسهيل مع عيال عمه ،هالشيء أبعدهم عن جو بيتهم اللي كله سكر وسوالف أبوهم . .
مايد ، يحاول ينسى أرجوان ويلتهي بدراسته ، مع انه كل شيء يذكره فيها . .

نالوه [ منال ] في الزيارة الأخيرة لخالتها فاتحتها بموضوع خطبة أحمد لها ما وافقت ولا رفضت فقط أرجأت الأمر لبعد دراستها . .
مها انقطعت عن البنات صارت بس تلاقيهم بالمدرسة وأحيان تكلمهم بالفون . .
بدور قررت تروح لدكتورة نساء وولادة بدون علم خالد بس تنتظر الوقت المناسب اللي يكون فيه خالد برع وفي خفارة من شغله . .
أما الباقي يمارسوا حياتهم بشكل طبيعي . .
.
.
ذياب .~
اليوم أبوي يباني أسير المطار استقبل عمي سعيد وبنته بيقضون الأجازة معانا . .
سلمت عليه تحمدت له بالسلامة وسألني عن أحوال الأهل وبشرته بأنهم بخير وعافية . .
وصلته البيت . .
وسلمته للوالد ورحت أبي أنام . .
أنا: هذا ولد عمك بين إيديك ياابويه خلني أسير ارقد . .
أبويه: شو عداك حسين ؟!
حسين: أبويه أنا جدامك صاحي . . ما راقد
أنا: ابويه الله يخليك راد من خط من دبي . . خل أرقد والله نودان
بو جنان: خله يسير يرقد ما تشوفه حليله
أبويه: زين سير أرقد بس لا تنسى اليوم عازمين منصور وأرجوان عندنا . .
أنا: تراهم أهل البيت . . بيأخذون راحتهم . .
أبويه : ذياب فيك شيء ؟! مريض
أنا: لا الغالي بس ما راقد من أمس الصبح . .
أبويه: سير أرقد ريح . . أنا بطرش حمدان يجابل الغدا
حمدان: ذياب توهقني روحي عندي دوام الساعة 3:00
سهيل: أنا برابعك
أنا: حصلت لك ربيع . . يلا أنا برقد
خليتهم ورحت أرقد صدق صدق تعبان وايد أمس كان عندي امتحان الساعه 8 بالليل وخلصته قريب العشر قايم من الصبح أذاكر ولا ريحت الظهر ولا العصر ويوم خلصته ييت برقد ما رمت أرقد بالفندق يبالي فترة لين أتعود فتميت سهران لين ما دق أبوي عشان اييب عمي سعيد . .
.
.
مريم .~
قاعدة أكلم فارس ع المسن . .
فارس: عمري شفيج ليش خايفة مني ؟!
أنا: مب خايفة بس تدري ما أروم أطول وياك
فارس: زين بطلي الكام أبي أشوفج
[ خفت . . ]
فارس: عشاني مهوي . .
أنا: كامي مسكرة بلصق ما أقدر ابطله . . عن حد يسألني
فارس: ما عندج صور . .
بجوفج أبا اجوف حبيبتي . .
أنا [ أباه ينسى السالفة ] : بتصور وبرويك ..
فارس: وعد
أنا: هي وعد
فارس: أحبج . .
استحيت . .
.
.
أرجوان .~
اليوم عندنا عزيمة في بيت اهلي . . وخايفة لا منصور يقول شيء وما يخليني أسير . .
لبست لي جلابية لونها بنفسجي . . وحطيت بلاشر خفيف مع روج وردي ع شفايفي . .
وعقيت الشيلة ع رأسي بطريقة مظهره قصتي . . وطلعت
ما جفت عموه ولا خوات منصور . .
همسة: خوات منصور [ امل 18 سنة و هاجر 17 سنة ] وعندهم 5 شباب كلكم مستقرين في بيوتهم . .
بس شفت فاطمة مع بناتها [ حور 3 سنوات ودانة سنة ] . .
كنت بروح غرفتي مابا أحتك ويا فاطمة . .
بس . .
فاطمة: تعالي البيت بيتج لا تروحين . .
أنا: لا عادي برد الغرفة
فاطمة: والله ما رديتي . . تعالي إقعدي . .
رحت وقعدت معاهم . . بس ع طرف
أنا: عموه وين ؟!
فاطمة: راحت تزور وحدة تعرفها والبنات معاها
أنا [ هزيت ] : ومنصور مايا
فاطمة: يعني ما حفظتي دوامه . . هو يوم يروح الصبح يرد اليوم الثاني الصبح جي يعني . . بيرد بنفس الوقت اللي داوم فيه عقب 24 ساعه . .
أنا: اها . . لأنه أهلي مسوين عزيمة اليوم
فاطمة [ تبتسم لي ] : لو تأخر بنتصل فيه وبوديج مع السواق
[ ابتسمت لها ] . . هاي أول مرة أحتك فيها بروحنا .. بالعادة منصور . . عموه . . أو البنات . .
بس اليوم بروحنا . . بس ما يبين عليها شرانية أبد .. عكس كلام عموه اللي دايم يخليني أتخوف من أني أتم وياها روحنا . . عكس لو منصور يكون موجود . . تغار بشدة . . خاصة لو سحبني منصور لحضنه جدامها . . عاد منصور وايد جريء وأكثر من مرة سواه الحركة . . عاد لو بروحنا ما بقول شيء . . بس جدام فاطمة ولا عموه . . ما أقدر
فاطمة: شحالج ويا عموه ؟!
أنا: تمام الحمدلله
فاطمة: خايفة هالشيء يتغير بالمستقبل . . تسويلج مشاكل ويا ريلج . . [ تبتسم ] شراتي . .
أنا: كيف يعني ؟!
[ حطت دانة ع الأرض تلعب مع حور ] . .
فاطمة: ماله داعي أقولج . . وإن شاء الله ما يصير فيج اللي صار فيني . . [ تتطالع الساعه ] الحينة بتي 12:30 وبأذن روحي صلي وتعدلي وإن شاء الله منصور بيي وبوديج
أنا: إن شاء الله
رحت الغرفة . . صليت وجهزت . . لبست لي مخور عشان أخذ راحتي . . وقفت جدام المرايات أحط ميك أب خفيف
[ شوي وحدر منصور قرب مني ] . .
منصور[ يطالعني من المرايا ] : شحالها حبيبتي ؟!
أنا: تمام
منصور: دوم ياربي . .
أنا [ أميل رأسي وأحط البلاشر ] : وأنت شحالك !
منصور: أنا زين حبيبي . . بتروحين بيت أهلج !
أنا: هيه بروح [ اطالعه ] لا تقول ما بنروح . . منصور والله إشتقت لهم وايد
منصور [ ضحك وعقب قال بهمس ]: وأنا ما إشتقتي لي ؟!
أنا [ أحط روج وردي وأقول بهمس ] : وايد
منصور: وايد !!
أنا: هيه
منصور : تحبيني ؟!
أنا: كملنا شهرين مع بعض . . وما تعرف أحبك ولا لا !
منصور : شو اسوي بج ؟! ما تعترفين . .
أنا: أحبك وايد . . تولد بي من يوم صغيرة . . ونما فيني مع الأيام . . لما التقيتك . . رد الحب . . وصار بدال المرة ألف
منصور: تحبيني بدال المرة أللف !!
أنا: هيه . .
منصور: روحي لبسي عباتج خل أوديج بيت أهلج . . عن ترا أخربها . . [ وغمز لي ] . .
أحرجني والله . . صديت عنه ورحت لبست لي عباة سادة . . واسعة مع شيلة سودا عليها نقش خفيف لونه أحمر . .
منصور: بوصلج وبرد اهنه ارقد . .
أنا: انزل تغدى أول عقب رد
منصور: مالي خاطر . . برقد
أنا: [ أقعد ع السرير ] : عيل ما بسير دامك ما بتي
منصور [ يبتسم ]: قومي بتغدى وعقب برد
[ ابتسمت . . حسباله بخليه يرد شو !!! ما بخليه روحه بالبيت وفاطمة موجوده . . كيفي لا تتطالعوني ]
جهزت وهو بدل كندورته بوحدة ثانية لونها بني . . وحط غترته وعقاله
منصور: يلا سرينا
.
.
مايد . ~
وصلت البلاد الصبح . . عندي أجازة اسبوع
قررت أقضيها إهنه . . كلمت أميه أخبرها اني وصلت . .
بس قالت لي : [ الوضع ما يطمن بالبيت . . أبويه ما يبي يشوفني . . ]
يعني شو ذنبي ؟!
يوم أني حبيت . . مب كفاية حب حياتي راح من يدي . .
بس ما عطيتهم أي إهتمام . .
أمي قالت لي أروح بيت عمي سلطان . . إهناك بيستقبلوني أحسن إستقبال
قلتلها لا تخبر أبوي إنه كلمتني خفت لا يسويلها مشاكل . .
واحينه قاعدين بالميلس مع الشباب . . وعمي
حمدان: يا ريال بلاك ؟!
أنا: ماشي [ أحط إيدي ع راسي ] مصدع
حمدان: احينه بنتغدى وخذ لك بندول وأرقد . . الله يهديك واصل من سفر لا راقد ولا شيء . .
ذياب [ اي ويقعد ] : يوعان
عمي سلطان : بينحط الغدى احينه . . ما يصير ينحط قبل الضيوف
صديت ع حمدان : منو الضيوف . .؟!
حمدان : منصور
تصنمت . . ما توقعت . . أصلاً كان المفروض أحط ببالي دامني ببيت عمي ألتقي فيه . . ولا فيها . .
بس نسيت نسيت ما حطيت ببالي
ذياب: خلك ريال . .
أنا [ أقوم ] : بسير داخل
سهيل [ يهمس ] : لا تسوى جي . . عشان محد يحس بك . . خلك طبيعي
أنا: ماقدر
سهيل: حاول وبتقدر . . لا تخلى قلبك يغلبك
حمدان: صدقه
عمي سلطان: بلاكم ؟!
حمدان: ولد أخوك مصدع
عمي سلطان: سير ييب له أكل عشان عقب يرقد ويريح
ذياب [ فج حلجه ] : أبويه !! أنا ولدك مب هو . .
حمدان: الناس مقامات
ذياب [ يبوز ] : لو أرجوان إهنه جان ما خلتكم تسوون بي جي !!
[ يدق الجرس ]

عمي سلطان: هذوا النسيب وصل . .
دقيقتين وكان موجود
قرب ووايه الكل . .
يا صوبي مد يده . . مديت يدي
منصور: مايد !
أنا [ حاولت ابتسم ] : هلا
منصور: شحالك ؟! متى الوصول
أنا: الصبح
عمي سعيد: وأنا ما سألت عني !
منصور: أرجوان مخبرتني أنك بتي [ يطالعني ] بس ما قالت مايد بيي
ذياب: يمكن ما تعرف
منصور: شحالها الدراسة . . ؟!
أنا: زينة . .
حمدان: تدريبه طب . .
منصور: هيه أدري خبرتني أرجوان . .
ابتسمت يعني هي تسولف عني . . ما نستني . .
منصور: بس عسى شاد حيلك
أنا: الحمدلله
عمي سلطان: وأرجوان ما ناوي تخليها تكمل !
منصور: عمي شو تباها لندن وهي ع ذمتي . . لو تبا تكمل إهنه تكمل ما بمنعها . .
عمي سلطان: زين خبرها تكمل . . هيه وايد شاطره
منصور: هيه ما قالت لي تبا تكمل . .
أنا: بس يظل هالشيء بخاطرها فاتحها بالموضوع . . وجوف رايها
ذياب: هيه يالنسيب أختي أعرفها . . مستحيل تفرط بدراستها . . بس يمكن تبا تأجلها شوية عشانك . . بس لا تحرمها
منصور[ يضحك ] : مستحيل أحرمها من دراستها . . بس بلندن لا . . إهنه
عمي سلطان: حقك . .
ما توقعت أبد أنه ريلها بيتكلم عنها جدامنا . .
وأنه بيقول هيه تتكلم عني . .
.
.
ديمة .~
قاعدين بالصالة مع خالوه عايشة وخواتي جوري ونانا . . وجنان وغاية
محد غريب . . كانوا عيال عمي عبدالله يبوون بس غيروا رايهم وبيون ع المغرب
قبل شوية خلصوا توصيل الاكل للميلس لأنه الرياييل يتغدون قبلنا . .
وعقب نحن . .
خالوه عايشة: أمينه . .
أمينه: نعم يا ست عيشة !
خالوه عايشة: كل شيء تمام بالميلس !
أمينه:أأه . . كل حاقة متل ما أولتيلي عليها . .
خالوه عايشة: زين وديتي لريلج ؟!
أمينه: أه
خالوه عايشة: زين لا تأكلي بالمطبخ مع الخدامات . . روحي إكلي مع ريلج
أمينه: إن شاء الله . . عايزة حاقة ثانية ؟!
خالوه عايشة: إيه خلي الخدم يودون دلال القهوه والجاي . . أدريبهم الشباب لازم جاي ولا قهوة إتيب لهم راسهم
أمينه: ديلوقتي أوصلهم . . [ وراحت ]
نانا: صدقج خالوه . . هلكني منصور من القهوة . . بعد الغدا . . بعد العشا . . العصر . . لو أنا شربت بس فنيان العصر ما برقد بالليل . . ما عرف كيف هو يشرب وايد ويرقد . . !
خالوه عايشة: متعودين . .
نانا: صدقج خالوه . .
جوري: نانا اليوم بنروح المول بنشتري وجي تعالي ويانا
نانا: بجوف منصور أول
أنا: نانا من زمان ما طلعنا مع بعض . . حرااام تعالي
نانا [ بابتسامة ] : بجوف منصور قلت
خالوه عايشة: هيه جي أباج لازم المرة ما تطلع بدون مشاور ريلها . .
غاية: ماماه بروح معاهم ترا . .
خالوه عايشة: زين قبل لا تسيري تعالي بعطيج بيزات
أنا [ بتردد ] : خالوه أنا قررت إني اتحجب ..
خالوه عايشة: هذي الساعة المباركة . .
أنا: بس خايفة يعلقون علي . . يعني . . أأأ [ وسكتت ]
خالوه عايشة : ما عليج منهم . . خليهم علي اللي يتكلم يا ويله
نانا: اليوم يوم بنطلع تلبسين شيلة . .
أنا: أوكي
نانا: وبنأخذ لج طويل . . يعني ما يصير تتحجبين وتلبسين قصير
أنا: أمم اوكي
جوري: أصلاً ديمة صايرة تلبس طويل . . ودرت البنطلون والتي شيرت مالها
جنان: بيي معاكم عقب ما أقول لأبويه
أنا: إيه ما بخطي خطوة من غيرج . .
.
.
سلطان .~
بعد ما تغدينا . .
قعدنا يميع نسولف . . أمي ومها يتابعون المسلسل مالهم . .
مريم راحت دارها تقول عندها مراجعة عندها امتحانات . .
ميرة قاعدة ع ريلي وتشرب عصير . . وسميه قاعدة يمي . .
راشد: كل يوم مسلسل ..
مها: يعني شو تبا تشوف ؟!
راشد: أي شيء ثاني !!
أبويه: سير ذاكر أحسن لك
راشد: ليش مها ما تذاكر ! مالي خص هي تذاكر عقب بذاكر
أمي: والله مها تذاكر بدون محد يقولها . . مب أنت لازم أنا أقعد ع راسك عشان تذاكر
راشد [ يقوم ] : أنا بلعب بليستيشن . .
أبويه: والمذاكرة !
راشد [ يروح ] : عقب أبويه عقب
أمي : والله متعبني هالولد مول ما يرضى يذاكر
أبويه: تدرين به ولد . .
أمي: بس سلطان ومايد ما تعبوني كثره
أبويه: جوفي المسلسل . . مابا عقب يوم أجوف الاخبار ولا مباراة تقولي بجوف الإعادة ما جفت كل الحلقة
أمي [ إطالعته وابتسمت ] : إن شاء الله . .
ابتسمت عليهم . .
ميرة: خلصت العصير
أنا: بالعافية حبيبي
شليت الكوب وحطيته ع الطاولة وصديت صوب سمية . .
كانت تأكل ليمون . . وجدامها صحن كله ليمون !!
أنا: ما بس من هذا !
سمية: عايبني . . اشتهيه
أنا: بس مب زين وايد !!24 ساعة ليمون . . ما صرتي تأكلي أي شيء ثاني
سمية [ بدلع ] : أشتهيه . .
وأنا شلي ذابحني غير هالدلع . .
أنا [ بهمس ] : قربي مني . .
سمية [ حطت صحن الليمون ع الطاولة وقربت بخجل ]
ميرة [ تطالع سمية ]: إيييه خوزي منيه . .
سمية [ بغياض ]: مابا . .
ميرة [ تحط إيدها ع خدي ] : هذا سلطوني مالي
سمية [ تحط رأسها ع جتفي ] : هذا سلطوني مالي
ميرة [ تحاول تخوزها من جتفي ] : مااااااااااالي
سمية [ تطلع لسانها ]: أنننننه مالي
ضحكت ع حركاتهم . . طفلة وربي طفلة . .
أنا: سموي لا تطلعين لسانج . .
سمية [ تخوز رأسها وتبوز ] : ما تشوفها تقول أنك مالها
ميرة [ استانست يوم خوزت راسها فحطت إيدها ع رقبتي ] : ماااااااااالي
سمية [ شوي وبتصيح ]: قولها إنك مالي
ميرة [ تعقد حوايبها ]: مالي قلت
سمية [ تترياني أتكلم ] . .
أنا: أنا حق ميرة . .
ياي أقول وأنا بعد حق سمية . .
بس هيه سبقتني وقامت . . ركضت ع الغرفة فوق . .
أميه: شفيها !
تنهدت . . تغار بشده من ميرة . .
أنا: هيه وميرة يضاربون علي
أبويه: هات هالبنية عندي . . سير راضى حرمتك ..
أميه: هيه مب زين لها الزعل . . تراها حامل
[ صدقهم والله هيه ع ادنات الدون تتعب . . ]
حطيت ميرة بين أمي وأبويه ما كانت تبا تهدني بس أبويه بعدها عني وتمت تصيح . .
يعني ميرة متعلقة فيني بزيادة . . وسمية من حملت زادت في دلعها وتحط رأسها برأس ميرة الياهل . .
صعدت لها فوق جفتها بالحمام [ عزكم الله ] ترجع . .
رحت لها وحضنتها من ورا وهيه ساندت ظهرها علي بحيث أنه رأسها ع صدري . .
أنا: شفيج ؟!
سمية [ غمضت عيونها ] : طلعني برع أحس مب قادرة أمشي . .
مشيتها للسرير وهي متساندة علي . . سدحتها ع السرير . .
أنا: حاسة بشيء .!
سمية: أحس بلوعة . . سير ييب لي ليمون . .
أنا: مب بس من الليمون قوليلي كم وحدة كلتي اليوم . . ولا عشرين وحدة !!
سمية [ تحط إيدها ع بطنها ] : ها ولدك ما أدري بنتك . . مب أنا
أنا: فديتهم وفديتهم أمهم بعد . .
كنت بطلع بروح أييب لها ليمون أمس أمي قالت لي ما يصير أمنعها من شيء تشتهيه لأنه بيأثر عليها وع الياهل . .
سمية: وين بتسير ؟!
أنا: أييب ليمون !
سمية: لا لا ما أشتهيه احينه أباك أتي يمي . . أباك أنته
تشققت من الوناسة . .
رحت لها ع طول . .
أنا: شو تبين فيني ؟!
سمية [ بدلع ] : ببوسك !
أنا : صدق ؟
سمية [ تهمس ]: هيه صدق . . قرب
غمضت عيوني وقربت منها أتريا بوستها ، حسيت بشيء رطب ع خدي . .
وفجأه صرخت . .
أنا: أأأه
بطلت عيوني بدال لا تبوسني عضتني مسكت خدي وأفركه يعور أطالعها بعيون حادة وأتوعد لها بداخلي
أنا : أنا تعضيني . . أنا !!
سمية [ تتطالعني بتحدي ] : هيه أنت . . أنت مال ميرة . . مب مالي عشان أبوسك . .
أنا: سموي والله كان ع لساني أقول ومال سمية بس أنتي سبقتيني . .
سمية: قص علي . . [ وبوزت ]
قربت منها . . وسحبتها بشويش لحضني ولميتها
أنا: فديت المبوز يا ربي . . هالحمال وايد قالبنج علي . .
سمية: تحمل ها ولدك
أنا: فديتج يا ربي سمية اليوم بالليل خفارتي وبرد باجر بالليل
سمية [ تبوز ]: بتوديني بيت أهلي
أنا: إذا ما تبين عادي تمي إهنه مع أهلي
سمية: لا بروح عند أمي مشتاقة لها ولحضنها . . [ تشققت ] الله بنام بحضنها اليوم . .
أنا [ أزخها بقوة ]: متشققة ع حضن أمج وأنا تعضيني . . !
سمية [ تحاول تقوم ] : هدني هدني
أنا: ماشي روحة عند أمج . . ماشي نوم بحضنها
سمية [ تصرخ ] : اااه بطني
بطلتها خفت من صرختها خفت لا يكون صار فيها ولا بالياهل شيء . . !
سمية ركضت عني بعيد وهيه تضحك . .
أنا: صدق سمية صدق . . تقصين علي . .
سمية [ تطلع لسانها ] : تستاهل . . عيل تمسكني جي . .
أنا [ عصبت فيني ]: ياهل تطلعين لسانج جي . . كم مرة أقولج عييب عيب . .!
سمية: مب عيب عادي [ ترد تطلعه ] وبعدين أنا مب ياهل
أنا: عيل منوه لازم أنا أنشف له شعره [ أقلد صوته ] شو أسوي ما أعرف أنشفه , , [ أرد لصوتي ] أنا هذا صح ؟!
سمية [ تهز رأسها ] : صح حبيبي
أنا [ أفتح لها حضني ] : تعالي حبيبي يوم بتنامي عند أمج بتتولهين ع حضني
سمية [ أتي لي ] . .
أدريبها مهما سوت مالها غنات عن حضني . .
مثل الطفل يروح يلعب طول اليوم بس بنهايته يدور أدفئ حضن عشان يغفى فيه . .
.
.
ذياب.~
الحينه الساعة 4:30 العصر صار لي ربع ساعة أتريا البنات ايين وهن بعدهن . .
يعني سنة بالبيت شو يسوون يطلعون . . !
أنا: أوف متى بيوون !
عمي سعيد: ما عليه تريا تدريبهم بنات . .
تقرب تومي أرجوان معاها جوري
نانا: تأخرنا عليك !
أنا: لا عادي . . وين الباقي
نانا: كاهم يايين . . أنا أخرتهم قعدت أبدل . . وأكلم منصور أستأذن منه
أنا: زين يلا ع السيارة
[ تغشت وشلت مني المفتاح ]
توني ألاحظ نانا تتغشى يوم تطلع يمكن منصور هو اللي يبا ها الشيء ..
عمي سعيد: أنا بيي معاكم . . فاضي ما عندي شغل
أبويه: هيه فاضي . . إلا ساير يدور له بنت يعرس عليها . .
عمي سعيد : والله لو أبا أعرس ما بسير السوق أدور . .
أتي ديمة وياها غاية وبنت عمي جنان . .
ديمة: منو يبا يعرس
أبويه: سعيد
جنان: والله هذي الساعة المباركة يوم أجوف أبويه معرس . .
عمي سعيد : طوفن جدامي يلا . .
أبويه: هالله هالله بالمعرس ما أوصيكم عليه
ديمة: بعيوننا المعرس
ضحكت عليهم وعمي سعيد حسيته منحرج وهو يوجه نظراته لديمة . .
مب هينه هالبنت من يومها جريئة . .
صح لاحظت شيء ديمة لابسة شيلة . . !
ولابسة تنورة بعد . .
شو السالفة خواتي الثنين متغيرات وتوني ألاحظ
صدق كنت لاهي ولا داري عنهم
.
.

تابع البارت الحادي عشر . .
ديمة.~
صار لنا ساعه نحاوط بالمول بدون ما أشتري شيء . .
نانا: يعني أنا اللي ما كنت حاطة ببالي شيء إشتريت . .
غاية: تدرين فيها ذوضها صعب
نانا: زين ترا باجي نمر خياط العبي نفصل لج عبي
أنا: نانا مابا ألبس عباه
نانا: بلا لازم . .
أنا: زين لازم . .
غاية: ترا بديت أيوع
ذياب: نمشي نأكل شيء من الكوفي شوب
نانا: لا منصور ما يرضى أروح كوفي شوب
أنا: وين أيام أول . . كله كوفي شوب . . واحينه ممنوع حتى ويهج غطيتيه
نانا: عسى الله يبليج بريل يغار عليج
أطالعت ع طول سعيد [ بو جنان ] ماعرف لا تسألوني . .
أنا: زين روحو أقعدوا بمكان وأنا مع جنان بنكمل . . مابا أكل شيء
جنان: زين راعي أني أبا أكل
أنا: هههه تبين
جنان: لا . . [ تبتسم ] بروح معاج
جوري: أنا بعد بروح معاكم
ذياب: زين روحوا بس جوري الله يخليج خلي عينج ع فونج وأي شيء يصير خبرينا
جوري: أوكي . .
مشينا مع بعض . . ودخلنا محل للملابس . .
جنان: ديمووه صدقيني أبوي متغير . . واقع بحب . . [ أطالعني ] أعرف هالشيء حاسة والله حاسة
أنا: زين ما تبينه يحب ويعرس
جنان: بلا أبي . . بس أبا اعرفها . . يعني ماباه يتعلق فيها بدون عرس . . أيي لي يخبرني عشان أخطبها له . .
جوري: يمكن أحساسج غلط . .
جنان [ تهز رأسها ] : لا لا في اشياء تغيرت . . أبويه قبل ما يحب يقعد ع اللاب و من سافرتوا أنتوا كله ع اللاب يتكلم . . حتى مرة جفته يحطي سماعات . . يرمس وحدة أنا متأكدة أنه يحبها هو أعترف لي . .
بلعت ريقي . . هالبنت أنا . . بس كيف يحبني . .
مشيت عنهم وقمت أشل لي أي شيء وأحطه بالسلة . . وأفكر باللي قالته جنان
جوري: غريبة . . شوفيج ؟!
أنا : مافيني شيء . . بس تعبت . .
جوري: مبين صوتج متغير وشكلج بعد
جنان: شوفيج ؟! [ بخوف ] تعبانة شيء
أنا: لا . .
جنان: خلنا نروح عنهم عقب بنرد
أنا: زين
رديت السلة باللي فيها ومشيت معاهم وأنا أفكر . .
سعيد لو يحبني . . ترا أنا تعلقت فيه وايد . . أخاف انصدم بأنه ما يحبني . . أو يعتبرني بنته بس . .
سرحت وايد وما حسيت إلا وأنا داعمة بحد ..
كنت منزلة راسي وأجوف كندورة بيضا . . يعني أنا دعمت بواحد ..
يا فشيلتي . .
رفعت رأسي ولفيت ع ورا . . جفت جوري وجنان يطالعوني بخوف . .
خايفين يكون فيني شيء
جنان: أخوي أسفين البنت تعبانة ومب حاسة ع عمرها
الشاب: لا عادي مسموحة . . وسلامتها ما تشوف شر
جوري [ اتي لي ] : ديموه شو فيج ؟! شكلج أبد مب طبيعي
أنا: ما فيني شي والله [ ابتسم لها ] ليش مب مصدقتني
جنان: لأنه ابتسامتج غبية والله مصطنعة . . فيج شيء مب طبيعي
تنهدت . . شو أقولكم .. وقعت بحب واحد كبر أبوي . . وقعت بحب ولد عم أبوي اللي بمثابة عمي . .
الشاب: جوري . . هذي أنتي
اطالعت جوري والشاب . . يأخي ملامحه مب غريبة . .
جوري: عبدالله . . يعني دامك عرفتني ماله داعي تحرجني طوَف كأنك ما شفتني
عبدالله: لا والله . . لازم نسلم . . [ يبتسم ] شحالكم ؟!
جوري [ ترد له الابتسامة ] : تمام . .
عبدالله عبدالله . . ملامحه مب غريبة . . واسمه بعد
صديت ع جنان . . ويت ويت هذا مب أخو جنان . . اللي خبرني عنه سعيد . .
.
.
حمدان .~
قاعدين بالميلس بعدنا ما غيرنا قعدتنا
قعدنا نسولف بعد ما ذياب راح يودي البنات السوق . . وهو يتوعد فيني . .
عسب أنا قلت لأبوي أني تعبان وخل ذياب يسير . .
صديت صوب سهيل ومايد . .
سهيل: مايد لا احاتي أبوك . . سير تسامح منه وبيرضى عليك
مايد: سهيل مابا أتعذر من حد

سهيل: مايد اسمع الرمسة . .
مايد [ يتنهد ] : زين
أبويه: أنا بسير أريح شوية عقب وعوني لصلاة المغرب
أنا: إن شاء الله أبويه
اندق الجرس وعقب دقيقة ..
ياسر: يا عم سلطان . . في واحد عايزك برع
أبويه: منوه الريال
ياسر: هو العم سالم أخو حضرتك
أبويه: سالم أخويه . . خله يدخل
ويدخل عمي . . وأطالع سهيل اللي تغيرت ملامحه . . صار له فوق شهرين مب شايفنه أبد
وفوق هذا ما سأل عنهم . .
أبويه: حياك يا أخوي . . تفضل
عمي سالم: أنا مب ياي أتفضل [ يطالع سهيل ] ياي أخذ حرمتي وعيالي
سهيل: احينه ابوي احينه ياي لنا [ يطالع أبوه ] خلصت بيزاتك وياي تبا تردنا عسب خرابيطك . .
عمي سالم: يا ولد رح خبر أمك اتي وياي يلا
خالوه عايشة [ اللي وصلولها الخبر ] : أنا مالي روحة معاك
عمي سالم: عايبتنج القعدة في بيت أخو ريلج شو !
خالو عايشة [ تبتسم ] : عايشة براحة أنا وعيالي ما ناقصنا شيء الحمدلله
عمي سالم : مكانك بيتي [ يقرب منها ] امشي معاي
خالوه عايشة: مابا أمشي . . ويا ليت ورقة طلاقي توصلني . . انا قبل كنت ساكتة عشان عيالي . . بس احينه قدرت أأمن لهم مستقبل بعيد عنك ما عدت بحاجة لك
عمي سالم [ منصدم من كلامها ] : تبين أطلقج
خالوه عايشة: هيه [ بتحدي ] احينه ولا ترا بخبر عليك الشرطة . . ياي تتهجم علينا بالبيت وكله سكران
أبويه: يا عاشة أستهدي بربج كل شيء وله حل
عمي سالم [ بخوف ] : تبين تتطلقين بطلقج . . بس بنتي أباها وينها
خالوه عايشة: مالك خص ببنتي . . مالك بنت عندنا
عمي سالم : بنتي أباها بعرسها
خالوه عايشة [ بخوف ] : لمنوه
عمي سالم : لواحد أعرفه بخاطره ويبيها
خالوه عايشة: أكيد واحد من ربك المخمة . . ولا من وين لك ناس عدله
عمي سالم : هيه ربيعي عبيد يباها . . هيه بخاطره
خالوه عايشة: والله بعدني بصحتي وعقلي ما تخبلت أزوج بنتي لواحد كبر ابوها ولا وكله سكران ومب حاس بدنيته
عمي سالم: البنت مزوجنها يعني مزوجنها
سهيل: أبويه هاي بنتك .. تعقها هالعقة !
أبويه: سالم الريال زاخ عليك شيء
عمي سالم [ بخوف ] : لا شوب يزخ علي . .
أبويه: البنت في بيتي وبين خوانها ما بتطلع منها غير معززة مكرمة . . وكان الريال يطالبك بفلوس بعطيك
عمي سالم: البنت بنتي أنا أبا استر عليها . .
مايد: عمي انا بأخذها وبالمهر اللي أنت تطلبه
أطالعته منصدم . . أخر شيء أتوقع أنه يقوله
.
.
أرجوان .~
قاعدين بكوفي شوب بطاولة ع طرف . . قاعدين بحيث أكون مواجهه اليدار
بطلت الغشوه . . وقعدت أشرب لاتيه . .
ذياب: مرتاحة ويا ريلج
أنا: الحمدلله وايد مرتاحة
عمي سعيد: الحمدلله . . أهم شيء الراحة
غاية: هذوم وصلوا
ديمة . . جنان وجوري قعدوا بعد ما يابوا لهم كراسي
ديمة [ ساكته مادري شفيها ] . .