منتدى استراحات زايد - الطير وافي وانتم اكبر مكاسيب......ذراع الذيب

السلام عليكم ورحمة الله وبركاته..
مسيتم/وصبحتم بالخير جميعاً..

كيف حالكم عساكم طيبين كلنـ بأسمه ادارة ومشرفين واعضاء وزوار..
اسعد الله اوقاتكم بكل خير..

راح شهر رمضان شهر الخير والبركه ومابقي منه الا ايام معدوده وأسال الله العظيم رب العرش العظيم..

ان يكسبنا اجره وان يجعلنا ممن قاموه ايماناً واحتساباً وان يبلغنا ليلة القدر وان يعتق رقابنا من النار اللهم امين..
:::::::::::::::::::::::::::::::::::::::::

هذا الموضوع عباره عن شكر وتقدير لرجل كريم محب للخير وأمثاله كثير في هالمنتدى الطيب..
ولا أزكي على الله احد من كم اسبوع كان بيني وبين العضو سلطان1 محادثات عن طريق الواتس..

ودايم علومنا وسواليفنا عن الطيور وسألته مره وياليتني ماسألته حبيت استفسر عن اسعار تبوع الجيره..

على اساس ان واحد من خويانا يبيله منها ورد لي سلطان1 (ابوفيحان) قال (وش تبيبها التبوع والله ماتنقل غير الوافيه)

وحلف علي وطلق في اقل من ثانيه:( وانهى الموضوع وهذا الكلام من حوالي اسبوعين..
وارسلي صورها من كم يوم..

هو اهداني جير شاهين وافيه الله يجمل حاله والله يقدرني على رد الهديه وأنا ادري ان هالموضوع راح يزعله
وخاصة اني حاط فيها صورته والله اني ماستأذنت منه لاكنه يستاهل الطيب

واللي مايشكر الناس لايشكر الله..

http://www.mekshat.com/pix/upload01/..._jghyfuhuj.jpg
ابوفيحان ناقل اطيب قرناس

وشاعرنا مكرم الضيف(ابونادر) اعطيته العلوم وماقصر بهالبيتين الله يبيض وجهه..
وابوفيحان يستاهل القاف الجزل واكثر..

مشكور ابو فيحان ياراعي الطيب***ومقبولة(ن) يالقرم منك الهديه

الطير وافي وانتم اكبر مكاسيب**ودايم يديكم بالمكارم نديه

يجزاكم اللي عالم الجهر والغيب***بعداد ماقيلت حروف ابجديه

يامرحبا مليون واكثر تراحيب***قلبي يصافحكم وبعده يديه

والله يوفق ابوفيحان ويوفق شاعرنا ابونادر راع الطيب..

والله يوفق كل من قرى موضوعي ويوفق كل رجال طيب

ودعواتكم لنا هذا الموسم بطرح الطير الطيب