مـرحوم يا من عن عيوني تواريت < رحمة الله عليك يا ابو راكان
 

يــآ قبر سلم على اللي نزل فييك..
مع النبي الهاشمي والصحابه ..
ياخالي ياللي طيبات مماشيك ..
بجيرة الرحمن ياخالي اهنيك ..
الواحد اللي ما يخيب الرجاء به ..
ياخال جعل الغيث يمطر ويسقيك ..
يرش قبرك لين يريع جنابه ..
ما عنك خافي كل ما حل طاريك..
يهل دمعي مثل وبل السحابه ..
وتبكي الحنون وتنتخي بك وترجيك ..
من لامها جعل يضيع صوابه ..
وذي بندقك تبكي وبشتك يناديك ..
وعليك راعي الطيب شقق ثيابه ..
ويبكي عليك العود الازرق ويرثيك ..
المجلس ما بعد صك بابه ..
وتبكي عصاك اللي وزانك تباريك..
والدله الصفراء وباقي زهابه ..
ياخال ليتك تسمع اللي يشاكيك ..
وتشوف عقبك ما جرى له وصابه ..
على النعش سجت عيوني تراعيك ..
واشوف قبرك يوم هلو ترابه ..
وشفت النصايب فوق قبرك تحجيك ..
ياشين هاك اليوم واللي جرى به ..
اقفوا وانا قلبي من الشوق قافيك ..
اقنب من الفرقا قنيب الذيابه ..
يا خال انا لك برفع الصوت وابكيك ..
وقتـ (ن) مضى وياك لا واسفابه ..
لو طالت الايام ماني بناسيك ..
وشلون ابنسى من عطاني شبابه ..
يــآمكه انا عقب احمر العين ما ابيك..
مــكه عقب العود وش ينبغى به ..


رحمـــة الله عليك يا ابوراكان :(