|
لابد ان تكون حكيم ... ياصقار السلامــ عليكم ورحمة الله وبركاته بمناسبة قرب الصيد والقنص فيه سالفه حصلتلنا العام بقولها لكم وبصراحه لابد ان يكون الصقار عاقل وحكيم وصفات الرجوله كامله فيه شرواكم لأنه بيقابل ناس اشكال وانواع منهم ضعيف النفس ومنهم صغير في السن .... وسالفتنا كنا قانصين على وقت الحباري وتقريبن لنا حوالي اربع ايام ماشفنا لااثر ولاجره ودق علينا رجال قال انتم وينكم قلنا بلمكان الفلاني قال بجيكم قلنا حياك ربي الساعه المباركه الرجال ماكذ قنص معنا معرفة داخل المدينه فقط ولا عمره خاونا المهم جانا من بكره تقريبا العصر وقدمناله واجبه وكانت معه شيهانه المهم امرحنا هاك الليله واصبحنا و تقهوينا وافطرنا وعينا من الله خير وكان الهدد لواحد من الربع معه فرخ حر ومعلم على وحده وكان الهدد له ماتحركنا من مكانا الى واحد من الربع قال ابشروبها توها نازله وهذا مطباحه جديد الحبارى عندي تعالو المهم الضيف قال ياربع انا طالبكم الهدد قال خوينا الي عنده الهدد ابشربه والله متغلى عليك المهم الرجال ماقصر جينا عند خوينا ونقص الجره وهذي هي قدامنا تمخطر يازينها ويازين شوفتها المهم قلنا لضيف تقدم هذي هي تدرج قدامنا قال طيروها قلنا ابشر المهم تقدمت وطيرتها له وهو يهد شيهانته وبسم الله ماشاالله وتأخذ معها اشوي وهي تنزلها بالقاع ويوم وقعت الحبارى بالقاع وكوبرت وهي تنشها من بعيد وهي توقع جنبها ويطيرها لها راعيه وتلحقها وتنزلها بس ماتقربها بالقاع توقع جنبها ولا تبيها المهم ويقوم الضيف ويمد البندق على الحبارى وهو يرميها لاهي منسدحه وتطير الطيره يوم شافتها ماتت وتمسكه وبصراحه انصدمنا صدمه متاوقعنها !!!! يعني لو بهذي الحاله لو مامسكنا اعصابنا وحكمن اعقولنا وتعوذنا من الشيطان كان صارت اعلوم ومشاكل بس الحمدلله الواحد يكون حكيم وعاقل في هذي الامور والمشكله لنا اربع ايام ندور ولا حصلنا شي وكان الهدد لخوينا صاحب الفرخ الحر بس الحمدلله هذي مقادير ومقسوم المهم ديورنا وتركنا الرجال يعلف طيرته ويوم علف اخذ الحبارى وروح على وجه وحتى معتذر وماينفع العذر ... المهم بعده رزقنا الله وهدينا طير خوينا وذبح ورزقنا الله... والضيف والله لاقبلته بصراحه مقابل رجال واعلومه غانمه بس التصرف الي تصرفه شي غريب وبعد مده يجينا بالبيت ويعتذر الرجال ويقول يارجال انا لاشفت الحبارى يجيني شي غريب ماحكم عقلي وافقد اشعوري وانا والله تصرفت تصرفي وانا مادري عن نفسي ماحس بالي حولي ... المهم قلناله يرجال حصل خير .. بس هذي السالفه تعلمنا الحكمه وتثبيت العقل عند ميقابلك ناس مثل هذا الرجال الصقار لابد تكون فيه صفات الرجوله كامله .. وهو يوم رما الحبارى قصده يعلم طيرته تصرف خارج عن ايرادته الله لايبتلينا الواحد لشاف الحبارى ينسى كل شي يجيه اخبال وهنا الواحد يحكم عقله ... وسلامتكم ... وكل عام وانتم بخير والله يبارك لنا في رمضان ويجعلنا ممن يغفر لهم يارب .. |
| الساعة الآن 03:00 PM |
Powered by vBulletin® Copyright ©2000 - 2026, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir