منتدى استراحات زايد - حل لتسريب فريون تكييف السيارة

السلام عليكم ورحمة الله وبركاته

الحمدلله رب العالمين ، وصلى الله على نبينا محمد واله وصحبه اجمعين
اللهم تقبل صيامنا وقيامنا واجعلنا ممن تغفر لهم وترحمهم وتعتق رقابهم من النار

كل عام وانتم بكل خير مقدما

حبيت اطرح بين ايديكم موضوع عن مشكله كثير منا يعاني منها ولا يجد لها حل الا بالحالات النادرة وبتكاليف باهضة لحل المشكله.وهي تسريب فريون مكيف السيارة.

دايم تصير معنا هذي المشكله ونقول بنروح لكهربائي تكييف ونزود فريون المكيف ، وهذا شي خاطئ ، لان الفريون موجود في دائرة مغلقة ، فإذا تناقص فهذا دليل على وجود تسريب ، ولكن من اللي يحط يده على مكان التسريب؟؟، ووين تحصلون عامل يكلمك بكل امانه ويقول لك فيه تسريب.
انا اليوم رحت لورشة بخضرية الدمام وسألت عن سبب للمشكلة ودلوني لورشة الرشيد، قلت بروح ورشة الرشيد مانيب خسران شي، ويوم رحت وطريت المشكلة قالوا لي العمال انتظر المهندس احمد(اردني)رجل محترم وخلوق جدا نحسبه كذلك ولا نزكي على الله.

وصل المهندس احمد وقلت له المشكله: اخوي احمد عندي مشكله في التكييف مدري ليه ما يبرد.
قال: عندك تسريب، المفروض الفريون مايتناقص لانه في دائرة مغلقة، مثل هواء كفر السيارة ، ما ينقص الا اذا فيه تسريب له.(احترم الامانه عند هذا الرجل)

قلت له وش الحل؟ قال بفحص لك بطريقة الليزر 350 ريال
بنزود المكيف بالفريون وبنحقن معاه مادة وتروح تستخدم السيارة 3 الى 5 ايام وبعدها ترجع ونشوف من وين التسريب ونعلمك، اذا يتصلح صلحناه او تجيب القطع المطلوبه لتغيير القطع اللي تسرب، وفي كلا الحالتين يتم احتساب تكاليف شغل اليد على حسب الشغل المطلوب.
طبعا الوكاله (عبداللطيف جميل الله لا يوفقهم) يفحصون بهذي الطريقة وبمبلغ 3000 ريال يقولون لك اترك عندنا الموتر مدة 3 ايام

قلت له هذي المعلومه وقال هذا خطا ، لانو بعض التسريبات ما تتضح الا مع حركة السيارة واهتزاز الاجهزة والمواسير.

قلت له توكل على الله وافحص وبرجع لك بعد 4 ايام، وهو يشتغل بالسياره انا اسولف معه عن التسريب و هل طريقة الكشف ناجحه ووش مدى نجاحها ، قال لي تعال ، وخلاني اشوف عدد كبير من الثلاجات والقطع الي عنده اللي غيرها للزباين ووضح لي اماكن التسريب.

فاحذروا يا اخوان من الكهربائيين الي يزودون لكم الفريون والسلام وتشوف نفسك كل شوي حاط لك فريون بـ 200 ريال ويصمل معك مده محدده ثم يخلص، اذا التسريب قوي فأعرفوا ان الفريون بيخلص خلال ايام ، واذا التسريب بسيط فما يمديك تخلص الصيفيه ويجي الشتاء ومن عقبه الصيف وتشغل المكيف وتكتشف انه مايبرد.

وفق الله الجميع لكل ما يحب ويرضى
ولا تنسونا من خالص دعائكم