|
.......جاك الفرج يامنتظر طلة اسهيــــــل......راشد سالم المنصوري...... القصيده التاليه متداوله في ظهور سهيل لولد خالي الشاعر : راشد بن سالم المنصوري ................................................. جاك الفرج يامنتظر طلة اسهيــــــل .....................أيام ويذعذع نسيم البـــــــــرادي برز زهابك وانتبه للمعاميــــــــــــــل .......................وختار من صفر الدلال الجـــدادي خذ ماتبيه وزود البن والهيـــــــــــــل ....................يكفيك لين تعود صوب البـــلادي وأوصيك في العزبه ام الفناجين .......................زود عددها لا تصير أقتصـــــادي وختار خوة طيبين الرياجيــــــــــــل .......................الي لهم رغبه بقطع البيــــــادي أهل العلوم الطيبه والتماثيـــــــــــل ......................الي سوالفهم لجرحك ضمــادي من طيبهم تقول ذولا مهابيـــــــــــل ....................أهبال طيب ولا عليه انتقـــــادي أنصو ديار عمها وابل السيــــــــــــل ......................جانا خبرها والعلوم ابو كــــــادي حيا وفيها للحباري مداهيـــــــــــــل ....................شئ قديم وشئ لفو أجـــــدادي تغانموها بدهم كنه الليــــــــــــــــل ......................غريب لون ومايل للســـــــــوادي العام فعله واضح بالتفاصيـــــــــــل .....................عليه شرط إنه إلا هد صــــــــادي ولا أشقر سوات لون الغناديــــــــل ........................لا شفت وصفه قلت ماهوب عادي من قال فيه تقول خل الأقاويــــــل ........................هذا هوى بالي وغاية مـــــــــرادي من فعله الهارب تشوف الغرابيــل ........................يموت في طرد المقفي أعنـــــادي وبعد الغروب أيزين وقت التعاليــل .......................كل يقول أفلان بالفعـــــــــــل زادي سوالف ماهيب كذب ودهاويــــــل .......................ماهي علوم أمجمعين الــــــدوادي رجالهم يفيد هرجه الى قيــــــــل .......................ولا سمع لهروجهم واستفـــــــادي ماهوب إلى صكت عليه الحلاحيل ........................يجيبها لا ضاق من كــــــــــل وادي والصبح تلقى جمعهم بتكاميـــل ......................ساعة ينادي للفلاح المنـــــــــــادي أيام نقضيها بحل وتراحيــــــــــل ...................وهل الولع قالوا ربيع الفـــــــــوادي توارثوها الناس جيلِ بعد جيــــل .....................واجب عوايدنا القديمه تعـــــــــــادي والعذر مني في ختام المراسيل .....................ختامها يعبى بمسك وزبــــــــــادي وصلاة ربي عد وبل المخاييـــــل ....................على نبي للمخاليق هــــــــــــادي |
| الساعة الآن 09:06 PM |
Powered by vBulletin® Copyright ©2000 - 2026, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir