منتدى استراحات زايد - لحظه وداع جذاب ....... (( مذخور ))

** بسـم الله الرحمن الرحيـم **
السلام عليكم ورحمة الله وبركاته
مرحبا اخواني الاعزاء واهلآ وسهلآ بكم
شريت طير عام 1421 بقيمه12000 ريال وسميته جذاب عقب مهد له
هو اول هدد له الحقيقه شي بمعنى شي جلس عندي 12 سنه مااذكر يوم من الايام كدر خاطري
كل الطبوع الزين فيه (( ركاده – طلع – سبق )) والطير معروف ولاعليه اخلاف
طرالي او حسيت اني مالي رغبه بقني الطيور ورغبت ببيعه وفعلآ اراد الله وبعت
على اخوان لنا من دولة قطر الله يبارك لهم ويرزقهم اطيب منه
درى صاحبي الشاعر أبوسعدون
وكنه زعل علي خصوصآ انه يعرف علوم الطير وقام يهجين
وقال قصيده تحكي واقعي بعد بيع الطير كأننا نتناجى انا والطير
كأنه لمس فيني التأثر بعد البيع
والحقيقه انه كود علي شوي وتأثرت اكثر
وذكرت هاك السنين مع المبروك
واليكم القصيده

يلومني جذاب ويقول كذاب...تبيعني مارضى ولابه سماحي
العشره اللي بيننا عداد وحساب ... فوق العشر ثنتين ماهو مزاحي
قلت انتبه ياطير مانيب سباب ... حلاوتك بالنفس مثل القراحي
مجبور في بيعتك وبيعك للاجناب ... غصب علي البيع دونك كفاحي
ياطير لاتزعل وسافر للاحباب ... قطع سبوقك وانتهض بالجناحي
اكفخ من الدوحه ترى الوجد غلاب ... لو جيتني بالليل تلقى الفلاحي
تلقى مكانك من كفي ومركاب ... وكركك الى شفته يزيد ارتياحي
وش قلت ياطيري نويتن بالاسباب ... والاتبي ننزح مع اهل النزاحي
عطني جوابك مختصر وافتح الباب ... وامغط جناحك وانتهض للفلاحي
وان كان ماجيتن دعيتك بمحراب ... عقب الصلاه الخمس عز ونجاحي
ماهوب ملواح ولا هوب مقلاب ... هي دعوه تاصلك راقد وصاحي
وين الوعد ياطير صمتك له اسباب ... خل التغلي واحتكم للصراحي
الناس لاموني وانا لمت جذاب ... وانته تلومن والملامه كفاحي

وهذه اخر صور لي معه

http://www.mekshat.com/pix/upload01/...3_dsc03770.jpg

http://www.mekshat.com/pix/upload01/...3_dsc03761.jpg

http://www.mekshat.com/pix/upload01/...3_dsc03758.jpg

http://www.mekshat.com/pix/upload01/...3_dsc03765.jpg

http://www.mekshat.com/pix/upload01/...3_dsc03768.jpg

http://www.mekshat.com/pix/upload01/...3_dsc03767.jpg

ارجو ان تنال قبولكم واستحسانكم
والى أن نلتقي وموضوعي الجديد ((من ذكرياتي ))
اخوكم مذخور
القصيم - بريده