منتدى استراحات زايد - قصيده ابوسعدون بالطير جذاب

-: بسم الله الرحمن الرحيم :-
السلام عليكم ورحمة الله وبركاته
حياكم الله اخواني جميعآ ودامت ايامكم كلها رضا من الرحمن واعانكم على صيام هذا الشهر الفضيل وقيامه
هذي قصيده قالها الشاعر ابوسعدون العتيبي من اهل الزلفي
كان مخاوين في عام1423 وكنا قانصين الدهناء ولاجاب الله شي انكفينا يوم الجمعه وقفنا نبي ندعي الطيور
مابين رجم جبله وام السروج
كلم علي خالد الشريده (( ابوفريد )) قل تبي تدخل يابونايف قلت نعم قال معي طير ابيك توديه على دربك
قلت ابشر انا واقف العيال يبي يدعون طيورهم وعطيته الوصف
جاء وسواليف وانا قاصر الكنود الى اللي يصوت بسرعه الحبارا
كان فيه ربع لنا كشاته مخيمين بمشبك الدهناء مع ام نقي ويتمشون وطارت قدامهم الحبارا
والله ونسوق عليهم الله لايوريكم المطامر
والوقت مسيان
وصلنا
حددو الموقع ارتفعت قلت للربع حولو على رجولكم غابت الشمس
امر يطلع المبروك
هديت
حول على النقره وقع على رطاه
يوم قربت
الى اشوف الحبارى بالارطاة الثانيه يمكن مترين مضايفها حولت وطيرته
وارتفعت ومعه لين ضيعناهن بالدماس
شغلت الجهاز وولعنا انوار السيارت ولقيناه صايد
آمر تفيض قريحته بهذه الابيات

قيد الحباري المسمى بجذاب .... له هده تذكر بكل النواحي
على يسار محمد هده بمغياب .... عقب مغيب الشمس رف الجناحي
عزام جزام للفريسه ولهاب .... متى تهده بالشرك بالفلاحي
طلاع يسبر صيدته وقت الارقاب .... يحقق الصيده واليا هد صاحي
مايكلف الصقاربالطرد واتعاب .... يردد الصيده وهي بالمراحي
ماتطلقه يمناك لو الذهب حضاب .... في كف صقارهيزيده نجاحي
بكف ابونايف يماري بالاصحاب .... النومسه بفعول ماهي مزاحي

عاد دري اني بعت الطير بعد ماقنصت به 12 سنه وزعل علي وكمل القصيده على نفس الوزن والقافيه
سوف تجدونه بالموضوع الثاني

((لحضة وداعيه ))

وهذه بعض الصور للطير

http://www.mekshat.com/pix/upload01/...3_dsc02975.jpg

http://www.mekshat.com/pix/upload01/...3_dsc03026.jpg

http://www.mekshat.com/pix/upload01/...3_dsc04000.jpg

http://www.mekshat.com/pix/upload01/...3_dsc00913.jpg

http://www.mekshat.com/pix/upload01/...3_dsc00914.jpg

http://www.mekshat.com/pix/upload01/...3_dsc00917.jpg

http://www.mekshat.com/pix/upload01/...3_dsc00918.jpg