يا راكبن من عندنا فوق شاصي=لسار واقفى يشدي شهاب مقصوص
لمد بالعبله كما الاير باصي=تسمع صفيره كنه الورع مقروص
واليا عرض له جال دنق وحاصي=يطوي بعيد الدو قرشع وبرخوص
عليك بالضلعان لا صرت ناصي=تلقا بها الذريان والطلح واقنوص
واليا لقيت المابره لو هي قاصي=لو دونها حيدن على الضلع مرصوص
عليك بالمتراس واخف البلاصي=واقصر خفيت الصوت واسبرها بابصوص
واحذر يشوفك يبقى باحماه عاصي=اليوم كله يلزم البيت ما يحوص
تزهب وخلك سريع اقتناصي=لا يومي بالمتراس قرطاس مع خوص
وعليك بالمختوم زين الرصاصي=يشق في راسه كما فتحة البوص
واما المخرق ينفرش كالقصاصي=يبقى بجبينه كنه ابريق مفغوص
واذبح رقيبتها يجيها اختباصي=تشوف تاليها تقل باين شخوص
واليا نشف ريقك وجا له غصاصي=فالزم قليل الشرب والعلم مبخوص
حذرا صقيع الما لجاك الخصاصي=تعيش فتره بين الاطباب وافحوص
يا ليت منهو مع بطا الوقت غاصي=يسج في فكره عن الناس ويغوص
في عزلتن ما فيها بعض النغاصي=ياطا على الاقفار بالجيب واخموص
رزقه على اللي عز بعض النواصي=ربن فرق بين القرانيس والصوص
والا المنيه ما جا عنها مناصي=لا بد تاتينا ولا تعطي فروص