منتدى استراحات زايد - الصمت في بعض المواقف شهامه.......

جتني تسلم في سلامه عمى عـين = ياليت ربي فـكـني من ســلامـــــــــه

مدت يمينٍ ساعدتها الشياطــــــن = وزود على ضغط اليمين ابتسامــــه

ثم اكشفت وجهٍ حوى كامل الزين = بدرٍ تجـلى عن سواد الغمـامـــــــــه

وقالت بصوت بحه الهـــــم والبين = والحزن واضح في ثنايا كلامـــــــه

وينك ثمان اسنين مالك عنـــــاوين = ولا لقينا بالوطن لك علامـــــــــــــه

درت البلاد ودرت كل الميـــــــادين = ودرت الشمال ونجد واعلي تهامــه

تركتني واقـفيت مثل الشيـــــــاهين = حطمت قلبي واسود الوقـت ظامــه

هل لا يزال الحب وسط الشــــرايين = والا خذا قلبك فــريد الـعـــدامـــــــه

وتبسمت والدمع وصل الشفـــاتيـن = والحزن ركز بالضماير سهامـــــــه

قالت وانا صامت ولا قلت حــرفين = الصمت في بعض المواقف شهامه

سحبت انا يدي وقفيت بالحيـــــــن = وابعدت عن درب الخطا والندامـــه

حـماني الله في ثلاثٍ مع الــــــدين = العقل والعـفه وخوف المـلامــــــــه

احمد بن عبدالرحمن العريفي
(نديم المجره)