|
هام جدا جدا لأصحاب الـvtc 4800 قبل ما ينحاس القير وقبل الكلافة -المشكلةوكيفية الوقاية السلام عليكم ورحمة الله وبركاته أعضاء مكشات وخاصة أصحاب جيوب الباترول vtc 4800 وقبل ما تقعون في المشكلة وينفك القير وتنحاس السيارة وتخسرون مبالغ المشكلة هاذي معرض لها جميع سيارات قير التماتيك من هذا النوع ولا يفرق السيارة نظيفة أو مكروفة المشكلة اللي حصلت معي أحاول سردها ليستفيد منها الجميع وتختصر مسافات عليهم في نهاية الموضوع تنبيه للسلامة من هذه المشكلة وأعراض أتوقع أنا لبدايتها قبل فترة وأنا طالع مشوار 120 كلم وقفت وطفيت وإذا بالسيارة تفور مع العلم أني مالاحظت تغير على أمبير الحرارة فتحت الكبوت لقيت قربة الألديتر تفور مادة رصاصية ثقيلة خفت أن الزيت خلط بالماء فتحت عيار زيتت المكينة لقيته سليم حملت السيارة على سطحة ثم تبينت الأمور زيت القير له مبرد موجود في الألديتر المبرد من ألمنيوم شد بلد وبسهولة وبدون أي مقدمات ينخرم المبرد ولا يؤثر حسن الاستعمال أو سوءه طبعاً هذا كلام فَنيَّين اثنين لكون المبرد ألمنيوم مع العلم أن المناسب كون المبرد نحاس يؤدي الغرض وأقوى وأصبر وهنا يبدأ مشوار الكلافة يبدأ من ورشة ألديترات بحيث يفك الألديتر والقرب ويرهم مبرد نحاس ثم ينظف الزيت منها لفترة عمل يوم كامل متواصل حتى تنظف الألديترات ومواصيرها من الزيت مع العلم أنه يحتاج تغيير الماء كل ثلاث أيام حتى ما يبقى أثر للزيت عند الانتهاء من الألديتر يستمر مشوار الكلافة مع القير لأن الماء دخل على القير فيحتاج تنظيف ومشكلة تنظيفه أنه يستهلك زيت بكمية كبيرة تقدر قيمة الزيت فيها بـ400 ريال طبعا يستعمل في التنظيف زيت القير العادي اللتر بـ10 ريال ولا زيت القير للباترول خاص نفس زيت الـ bmw اللتر بـ 65ريال وتنظيف القير يكون بطريقة خاصة لأنه لو فك غطاءالقير من تحت ماينزل إلا كمية قليله من الزيت فالحل تشبك المواصير اللي طالعة من القير للألديتر للتبريد تشبك في بعض ثم يعبأ القير زيت وتشغل السيارة ويترك يدور الزيت ثم يفك وينثر وهكذا حتى تنظف السيارة تماماً وهنا أحياناً تنتهي المشكلة وأحياناً يستمر مشوار الكلافة سيارتي يوم أخذتها بعد هذه العملية لاحظت قومتها ثقيلة وإذا بالقير معلق على الرابع وهذي تحتاج إعادة برمجة تقوم بها الوكالة أو صاحب ورشة متميزة ومتخصصة عندنا في القصيم يستاهلون الدعاية خصوصاً أن صاحب الورشة السعودي يشتغل بيده ويتابع عماله بنفسه عارف بالشغلة ومتخصص قيرات ورشة الشيبان في الخضيرا ببريدة يسوي إعادة برمجه للقير حساساته وأحياناً تحل المشكلة وغالباً يستمر مشوار الكلافة يصلح القير ثم شوي ويعلق على الرابع هنا يحتاج تغيير للحساسات طبعاً جديد ما تباع الحساسات إلا بالخارطة حقت القير بحوالي 4500 ريال حسب ما سمعت والحل عند الله ثم التشليح وبما أن هالقطع مطلوبة فليس من السهولة أبداً أنك تحصل فالتشاليح وإذا وفق الله وحصلت تركب الحساسات واحتمال تسلك واحتمال يستمر مشوار الكلافة اللي حصل أن الخراب مازال مستمر فالحل بعد توفيق الله تغيير الخارطة كلها مع حساساتها سواء جديد أو مستعمل بعد تغيير الخارطة مع حساساتها احتمال يكتفي الباترول بهذه الخساير واحتمال يستمر مشوار الكلافة فتكون هناك مشكلة في كلتش الرابع يحتاج فك القير وتغيير وهنا بعون الله تنتهي مشكلة الباترول vtc 4800 الكبرى ويعود الباترول لموقعه المرموق الذي يستحقه هذا تفصيل قصتي مع مبرد الباترول لأنه هو أساس المشكلة ذكرتها ليستفيد منها أعضاء مكشات زملائي أصحاب الباترول للأهمية: - للسلامة من هذه المشكلة أن يغير المبرد فوراً ويرهم ((نحاس)) _حسب توجيه المتخصصين_ لأن الوكالة يضعون مبرد ألمنيوم وهو هزيل من صناعته - قبل المشكلة بيوم لا حظت القير كل ما أهدي وآخذ ملف إذا دعست على البانزين ألاحظ فضاوة في القير كأنه مفضى ثم يلقم وتمشي السيارة طبعاً هذا دليل نقص القير ويمكن أنه يكون بداية المشكلة وقبل كل شيء الحمدلله على ما أراد وقدّر |
| الساعة الآن 10:36 AM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir