|
المــوت عـلى الفـــراق**وقــصـه مـن المـــوروث الـشـعـبـي **مـحــمـــد الــظـاهــري السلام عليكم ورحمه الله وبركاته اخواني اعضاء ,,وزوار ,,ومشرفين منتديات مكشات كل عام وانتم بخير واسئل الله ان يتقبل منا ومنكم صالح الاعمال وحياكم الله بسالفه من سوالف المؤروث الشعبي ,,,,,,,, يقولون كان فيه ولد صغير ماتت امه وهي تولده وابوه مات وعمر حول خمس او ست سنوات واخذه عمه ورباه تربية حسنه وعزه واكرمه وعمه عنده بنت عمرها بسنين الولد كبر الولد وقام يسرح مع حلاله وحلال عمه واذا غابت الشمس رجع للبيت الولد يعشق البنت والبنت تعشق الولد وقبل البنت مالها الا ولد العم ابو البنت وافق على الولد انه يتزوج البنت بس قاله العرس والدخله بالربيع قال تم ووافقة في ايام الحج وقبل اهل الباديه يعانون الامرين ماوصلو للحج قبل اذا ادخلو لديره يدفعون ضريبه ويمشي معهم واحد من اهل الديره لين يوصلهم لديره ثانيه وعلى الموال لين يوصلون مكه الولد والرياجيل الي معه وصلو مكه وتممو الحج ويوم بالرجعه يقولون الولد جاه عدوه ومرض وتوفى وربعه دفنوه في مكان قريب من مكه وبعد مده واقبلو على الديره قالو ما نقدر نواجه افلانه ونقوله ان فلان مات قال واحد وش الحلو يالربع قال واحد الحل عندي نتفرق لمجموعتين عشان نخفف عنها الصدمه قالو تم مشت المجموعه الاول ووصلت للديره واهل الديره ينطحون الحجاج ويستقبلونهم والبنت ما لقت الولد راحت لواحد من خويا الولد وين فلان وين فلان قال فلان يجي المغرب مع الربع التالين رجعو اهل البيوت لبيوتهم وهي جالسه عند حريم يطحنن بالرحى وهي عرفت ان عشيقها فيه شي وتقوم حدا الحريم وهي تطحن بالرحى وتقول ,, عسى حرم ربي من الوبل يسقيه يرفع عنه ما يكرهون العبـادي حيث إن زمل صويحبي باركن فيه مرحوم ياللي له هوينا الحـدادي من أولن ما هو ببالي ولا أطريه واليوم ما له في ضميري ملادي ومن عقبها طاحت على الحريم والحريم يرشون عليها من الماء لين قامت ومن عقبها بشوي والا المجموعه الثانيه وصلت وشافت ذلول رجلها وقامت تاسئل قالو فلان مات وهي تقصدوتقول ,, عـلـم لـفـى عـن مـغـزل الـعـيـن شـنـاع نـقـض عـلـي الـلـي بـقـى مـن جـروحـي حـلـلـت يـا زيـن الـحـلايــا والأطـبــاع حـلـن يـخـفـف عـنـك يــا روح روحــي لـو هـو مـع الـحـيـيـن يـشـرى ويـنـبـاع لا أسـوق بــه مـالــي وأفــادي بـروحــي مـير إنـهـم حـطـوه فـي صـحـصـح الـقـاع وحـطـوا عـلـى قـبـره رســوم تـلـوحــي ومن عقبها طاحت والطيحه هي الطيحه ويوم يقلبون البنت وإلاهي ميته الله الدايم اخواني ,, انتهت سالفتي واعذروني على اي تقصير في السالفه هاذا ما قريته في كتاب رواد الصحراء وهي مشهوره وانتظروني في سالفه اجمل بأذن الله وتقبلو تحيات مـحبـكم مـحـــمــد الـظـاهــري |
| الساعة الآن 04:15 AM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir