منتدى استراحات زايد - سالفة شماغ الاصلع والبقره 00 النبهاني

بسم الله الرحمن الرحيم
اخواني واخواتي المكشاتيه مشرفين وأعضاء وزوار
السلام عليكم ورحمة الله وبركاته
والله يسعد اوقاتكم بالمسرات
سالفه مقتطفه من مجلس بتصرف
سالفه قديمه ايام بيوت الطين وبعض الجدران قصيره يعني جديّر ماهو جدار والشوارع كانت ممرات ضيقه ورفيقنا الاصلع كان ساكن باحد هذه البيوت وبيوم من الايام رايح يصلي الجمعه وبطريقه صادف له واحد يعرفه سلام عليكم السلام وشلونك وعساك طيب أثرهم بجنب مراح بقر والبقره تمغط راسه وتطلع لسانه وتلفه على طرف شماغ الاصلع وتقولبه وخذ ياعلك رفيقنا يبي شماغه ولا مايمديه عليه
داهمته الصلاة ويمكن ما عنده غيره طبعا من اول تعرفون قل والاحوال ماهي مثل هالحين خيرات وانعام ولله الحمد
المهم راح يصلي وهو مصلّع يعني بدون شماغ والناس بس مشوشة فيه
أيه قضت الصلاة ورجع للبيت وهو بس يفكر بسواة البقره ويفكر وش لون ينتقم منه
فعلاً جت في باله فكره الانتقام واستفزع بخوه وخططوا واتفقوا على التنفيذ بعد صلاة العشاء
يوم صلوا العشاء وهم يروحون للبقره ومعهم مكينة حلاقه حقت الموس ابو تمساح ويجودون البقره ويحلقون راسه على الصفر ورفيقنا عاض برطمه ويقول والله لخلي صلعتس اكبر من صلعتي ياحلال قريح
الربع نفذوا الخطه على أكمل وجه ويوم اصبحوا جت راعية البقره معه ماعون تبي تحلب البقره مثل العاده يوم شافت البقره وهي تجدع الماعون وتروح تصيح لرجله وهي تقول الحق البقره الذيب صالخن راسه
يوم جو للبقره واجتمعو عليه وبرّقوا ولا راسه محلوق بمكينه
منهو 000 منهو 000 مايدرون من اللي فعل هالفعله
المهم تأقلموا مع بقرتهم وقامو يحلبونه كل يوم مثل اول
لكن عقب شهر صارة البقره كدش طلع له شوشه تهولت منه راعيته وقالت لرجله البقره هذي لازم تقلع مداه بالف وادر 00 بعه بكلبٍ سرق اهله المهم ما تخليه عندي بالبيت واعتقد انهم باعوه على القصاب
انتهت السالفه وكل عام وانتم بخير
محبكم
النبهاني