منتدى استراحات زايد - رايح رايح لو ما حصلت لي خوي##اثر الدعاء في رد الضايع

السلام عليكم ورحمة الله وبركاته

إخواني أعضاء منتديات مكشات مهوب من عادتي أسولف طبع فيني أستمع أكثر لكن يقولون يا وجه استح

بصراحة استمتعت كثير بهالخيمة خيمة السوالف وقلت لازم اعطي مدام اخذت

وطرالي هالسالفة الي حصلت معي واشوف انه فيها فايدة مناسبة

من عادتي أحب التمشي والمكاشيت وتجيني أحيان رغبة شديدة للطلعات المهم هاك اليوم اهتويت انسق رحلة مع بعض الاخوان كان يوم بوسط الاسبوع وقبل اذان الظهر وابدأ اتصالاتي على اخوايي الي يحبهم قلبك المهم كل ما كلمت واحد اعتذر واحاول يمين يسار لين ما حولك احد وبعذرهم لان الاتصال كان وقته ضيق الوكاد موتري كل علومه زاهبه وادق سلفي الحالي قلت باخليها رحلة استكشافية واروح لوادي عندنا كبير وطويل طوله تقريبا 60 كيلو وآخره وعر ما يدخله إلا الشاصات والمواتر الرفيعة بالحيل وانا موتري لك عليه لكن قلت مادامي الحالي خلني اتفرح على اشياء جديدة

وادخل الشعيب وابدأ اتعمق واتعمق ولا حولي أحد مابلا أنا تقل منيب صاحي لا رفيق ولا ونيس وابتل في الشعيب ابي اوصل آخره من علوه إلين وصلت منطقة كلها حصى حتى إني صرت أوخر الحصى من درب الموتر ودخلت في مداخيل ضيقة الموتر شوي وتحكحك جنوبه لكن عندي رغبة في التقدم عجيبة والله طلعت طلعات فيها تغريز والمكان ضيق وما فيه اتصال وبين جبال لكن شعوري هاك اليوم غريب أحس بمتعه كل ما تقدمت المهم بعد التعمق قرابة 55 كيلو متر في نهاية الوادي والجواد قليلة وقديمة رغم إن الاجواء ربيع لكن المنطقة هذي ما يدخلها إلا قليل

وانا في دربي إلا واشوف ها السواد الي بالارض ويوم قربت حوله إلا وهو محفظة مشهبة منتفة وأقول بخاطري امازح نفسي من الوحدة ابشر بالغناة يابوعاصم هاذي اكيد مليانة قروش ويوم وصلتها قلت خلني اشوف لان من عادتي ما احب اتجاهل شي لازم اتأكد يمكن يصير ظني خطأ المهم وألقطها من الأرض والين حالتها حاله زواياها كلها مقروضة الظاهر من الجرذان وافتحها ابشوف انكان فيها شي واتفاجأ إن مخابي الدراهم فل امهات مية حول ألف ريال أو اقل شوي والبطاقات حقت كم بنك وصرافات وبطاقة عمل ورخصة واستمارة واحوال مستشفى يعني المسكين كل اغراضه في المحفظة ويمكن لو صار تأخير عليها تعثيبها الجراذي وسبحان اللي ساقني لها سوق والله مهوب عادتي إني أغامر ها المغامرة لأني سلكت دروب وعرة بالحيل ولاحولي أحد لو يصيرلي شي محد درى عني

الوكاد إني بعد هذا حسيت إن روحتي هذي يمكن بسبب دعوة هذا المسكين أو دعوة اميمته له وحسيت بمصيبته لان كل اثباتاته بالمحفظة وعشان يطلع بدائل لها يبي يشوف العزاري غير خوفة من إمكانية سوء استخدامها فيما لو حصلها أحد

االمهم يوم لقيتها حمدت ربي أن جعل من ثمرة روحتي اني حصلت حلال اخوي المسلم

في الختام بعض الفوائد والاشارات/

*_ أنا يوم حصلت المحفظة لا حظت إنها سقطت بجوار جادة السيارة في مكان ضيق مما يدل على أنه مهوب منزل لهم لكن سقطت اكيد في ليل اثناء نزول أحدهم فسقطت ولم ينتبهوا لها والمحفظة شيء مهم المفروض تكون في الدرج أو مكان ما تتحرك فيه اثناء النزول.

*-لم أجد في المحفظة أي وسيلة إتصال حتى الرقم الي في الرخصة غير صحيح والمفروض يكون في محفظتك رقم يسهل لمن وجدها في حل فقدت الاتصال بك لأن الاجهزة الأمنية سالفتها سالفة يمكن تتطول ماجاتك

*-من الفوائد أني مريت على نبتة حميض كانت من أكبر الحميض الي شفته من ناحية ورقها كبير ومليان المهم اشتهيتها فاكلت منها رغم اني خفت انها تعطشني اعتقاد من بذلك لكن الي حصل العكس إني لم أحس بالعطش فترة طويلة اضافة إلى أني احسست بنشاط كبير وراحة أظن أنه بسبب الاملاح ولما رجعت قرأت عن الحميض فتبين أنه يعتبر قاطع للعطش وعلاج للدغات العقارب والثعابين

وسلامتكم والسموحة على القصور

أخوكم أبو عاصم