قصة جدتي والدجاجه
 

السلام عليكم اخواني الاعزاء ..
انا الحقيقه ابقص عليكم قصة جدتي والي ذكرن بقصة جدتي اخوي (قوافي ) لما ذكر قصة عمته والجلال انا تذكرت قصة جدتي والدجاجه ابدا بالقصه واقولكم :
انتم تعرفون الاولين وهم بسطى وعيشتهم على قدهم اما يكون عندهم بقره او عنز يحلبونه او دجاج يستفيدون من بيضه والقصه كان عند جدتي دجاج ويوم من الايام افقدت احد الدجاج واتهمت خالي بااكل الدجاجه هو والزقرت وانتم تعرفون اول يسمون الاصدقاء الزقرت واضنه ماخوذه من الي يلبس غتره او كبك هاذولا هم الي يطلق عليهم اول الزقرت ..جدتي فقدت الدجاجه واتهمت خالي واخوياوه انهم ماكلين الدجاجه واذكر انه محد ياكل الدجاج في ذاك الوقت الى الدكتور احمد نسيم واحمد عبد المتعال هم دكاترة بريده واي واحد عمره من الـ اربعين وتحت مطهرينه هـ الدكاتره وهم مصريين الجنسيه ولا يشرون البيض والدجاج والحمام الى هم من العجز الي يبيعن بقبة رشيد المهم هي على الدجاجه والدجاجه غابت شمسه ولا يدرى وين راحت جلست حول الشهر مفقوده وانتم تعرفون في ذلك الوقت مافيه دورات مياه انما يوجد مايمسى (البرج ) والبرج يبعد عن مجلس العائله حوالي مترين الي يسمى العريش وهو مجلسهم مسدحهم ومردحهم ياكلون به ويشربون به والي يبي يقضي حاجته ينحر هالبرج الي ارتفاعه حوالي متر ونص وله درجتين ولاصار الواحد يبي يقضي حاجته يصير وجهه متجه للعريش وتشوف راسه وانت بالعريش كانه راكب شيول المهم الدجاجه صارت راجنه بهالبرج وطلعت من هالبرج يوم من الايام ومعه واحد وعشرين فرخ وصارت جدتي ذاك الوقت اغنى وحده بالحاره صار عنده واحد وعشرين دجاجه ولا انسى يوم تشققت خشته من الفرحه بـ الدجاجه وعياله وطلع خالي غير متهم هاذي قصة جدتي مع الدجاجه وهي حقيقه والروايات كثيره ولابغيت اكذب مااقدر اولف شي ولكن الحقيقه هي الي تعبر عن الواقع ارجو ان القصه حازت على رضاكم ولي معكم قصه ثانيه ان شاء الله من القصص الحقيقه وليست الخياليه
تحياتي ..