منتدى استراحات زايد - ابو صفوق والهروب من المدرسه

السلام عليكم ورحمة الله وبركاته
الله يحيي الجميع
هذا ياطويلين العمر تذكرت سالفه يوم قريت سالفة قوافي وهي قديمه مدري عام كم
وهي عن السقوط او الطيحان
درست بلندن مدرسه داخليه يعني النومه والقومه بالمدرسه وبيوم فيه واحد من ربعي قال
خلنا ننحاش بعد وجبة العشاء ونسوي نفسنا نيمين مثل العاده ونطب من الشباك على الحديقه ونروح للحديقه العامه نتمشى او ندخل سينما او اي شي المهم نبي نفرك
المدرسه يخلونا ننام من الساعه ثمان كنا طلبه بالمتوسط تقريباً
المهم تعشينا وطلعونا للغرف ننام
رقينا ومخطط الهروب كامل مكمل ما يبي له إلا التنفيذ
يوم ضمنا ان الطلاب نامو وكنا اربعه بالغرفه انا ورفيقي سعوديين والثالث ايطالي والرابع باكستاني
المهم مع الشباك وبهدوء طب رفيقي وانا احتري مثل ما اتفقنا انه يصفر او اي شي يدل على انه طب الارض واكيد بيطيح فوق الورد المهم مارد علي ولا اقدر اصوت له يقومون الاثنين اللي نايمين
قلت ايه هذا شكله يبي يروج ويخلين وانا اللي اجيك طيران من الشباك واطب ما دريت الا انا ورفيقي بسطل زباله تقل خزان من كبره وفاضي لكن وصخ وعجزنا نطلع من البرميل لين جا الصبح وشافنا المزارع لابارك الله فيه وعلم علينا ووقفونا وصرنا عبره بهاك اليوم وغسلونا الساحه الرئيسيه كعقاب
وعقبه أدب وخط مستقيم من الفراش الله يعزكم للحمام ثم لصالة الرياضه ثم للقاعه اللي هو الفصل ولا نتحرك عن هالاماكن إلا للغرفه اللي نصلي به فروضنا وهي داخل المدرسه ويقالك انه ابعد مكان رحنا له بعد الهروب
وانتظام لين تخرجنا من الثنويه
وسلامتكم
عاد سامحونا على السالفه ودي اسولف بس ما اعرف
اخوكم
ابو صفوق