منتدى استراحات زايد

منتدى استراحات زايد (http://vb.ma7room.com/index.php)
-   منتدى أخبار المواقع والمنتديات العربية والأجنبية (http://vb.ma7room.com/forumdisplay.php?f=183)
-   -   نهاية المزح الشين (http://vb.ma7room.com/showthread.php?t=950802)

محروم.كوم 07-07-2012 04:20 PM

نهاية المزح الشين
 
السلام عليكم ورحمة الله وبركاته ,,

اسعد الله صباحكم / مساكم بالخير ..

هذي القصة يرويها علي من يقول انه عايشها ..

الزمن .. تقريبا 1418 هـ
المكان ..القصيم

كان فيه شاب يبي يتزوج .. بيوم زواجه قالوله ربعه ليش مانطلع كشته خفيفه قبل عرسك؟ لنا ربع كاشتين بنمرهم ناخذ فنجالين ونسري .. الرجال وافق وطلع معهم ..
وهم يمشون في البر وهو ماغير يسألهم : وين الربع ؟ وهم ماغير يقولون : قريبين قريبين ..:)

ابعدوا بالرجال ..
لين وصلوا للنقره الي كاشتين فيها الجماعة .. نزلوا وتقهووا , واخذوا العلوم وضحكوا ومزحوا , ايه عرس الرجال اليوم وتعرفون هالسواليف , وهو كل شوي يقول لخويه يالله سرينا , يارجال سرينا وراي تزهب خبرك عريس , وخويه يقوله اصبر بدري..

بدا خوينا يخاف , حس إن السالفه فيها مقلب .. :(

آخر شي قال للربع ياجماعه هذا مهب مرجعنا .. ترا اليوم زواجي ولا هوب وقت مقالب .. وهم ماغير يضحكون عليه ويقولون له بدري تونا .. يوم قربت العين تغيب , عرف ان مافيهم فايده , قال لو محد قايم يوصلني بروح على رجلي .. قالوله الله يساعدك ..:)



في مكان ثاني ..
اجتمعوا الناس للزواج , والكل حاضر , الا المعرس خوينا مايدرون وينهو فيه !!
هذاك الوقت حسب الراوي تقريبا بداية عصر الجوالات , والي معه جوال مهب على كل حال يشتغل .. مشاكل ابراج وهالامور خصوصا إن خوينا بالبر يعني ماحولك إرسال ولا شي .. :(

كل شوي ابو العروس يمر على ابو العريس ويقوله : وين ولدكم ؟؟ وهذاك يرد عليه : والله ياخوي ماخلينا احد ماسألناه , لكن ان شاء الله بيجي ونعرف وش السالفه !! :(

قاله ابو العروس : شف ياخوي .. الي هذا اوله ينعاف تاليه .. خلنا نتمم الليله على خير قدام الرجاجيل والناس .. وباتسر ان شاء الله الصبح نفك القربه ..

وابو العريس ساكت وش بيقول ؟! طبعا ماله وجه لا يهرج ولا يتكلم .. :(


نرجع للعريس ..

قام يمشي على رجليه لين وصل الخط , يوم وصل الخط جلس يأشر لحد ماوقفله راعي عربجيه وقاله تكفى وصلني الديره , وصله الديره راعي العربجيه ماقصر , ويوم يدخل على بيت اهله والساعه 12 من الليل !! :(

ابوه قاله: انت حي ولا ميت ؟ أنت صاحي ولا مجنون ؟؟ ؟
قال لأبوه : اسمع يايبه الي صارلي .. وعطاه السالفه ..
قاله ابوه : اجل نام أنت الحين , والصبح ان شاء الله نمر خالك , ولعل الامور تسهل ان شاء الله :) ..



يوم صار الصبح , راحوا للرجال , قاله ابو العريس : لا تقاطعني , خلني اقولك السالفه كلها من اولها لآخرها , والي تامر فيه انت انا حاضر , بس خلني اقولك السالفه بالأول والحكم لك .. :)

يوم عطوه السالفه , قالهم ابو البنت : شوف ياولدي , انا ماعندي مانع , لكن الفشيلة الي صارت لنا قدام العالم والناس ماتروح شربة ماء , لازم ناخذ حقنا وافي !!

قال ابو العريس : أما هذي !! خلها علي !! ومالك إلا الي يبرد قلبك انت ياولدي , تجلس معهم شهرين ثلاثه لين ينسون السالفة , ولا تذكرهم بشي , ولا كأنك زعلان ولا شي , وإذا جاء طاريها اضحك معهم , وبعدها لكل حادث حديث .. :(



وبعد ثلاث شهور , قام ابو العريس وقال لولده : لقيت المطلوب..الحين ابيك تعزمهم الاسبوع الجاي بالاستراحه الفلانية وإذا قالوا وش المناسبة .. قلهم بحكم انكم ماحضرتوا زواجي وكنتوا بالبر هذاك اليوم :)

وفعلاً .. تمت العزيمة بإستراحة خارجية , يعني برا المدينة , لا إرسال جوال ولا شي
يوم جاء وقت العشاء , ويقولهم الشايب : تفضلوا تفضلوا يالله حي ربع ولدي :)..

ويوم دخلوا الرجاجيل المقلط يتعشون , ويصوت الشايب لولده (حسب الخطة) , ويقوم الولد من العشاء وهو يقول : لحظة بشوف وش يبي الوالد , وبمجرد خروج العريس من المقلط , إلا ويجي الشايب , ويقفل باب المقلط على الرجال بهدوء بدون ينتبهون , هنا تجدر الإشارة إلى أن الباب حديد وله سقاط (مزلاج) .. :)



اول واحد من الرجاجيل شبع من المفاطيح , قام بيغسل ويكتشف ان الباب مقفل , قالهم : ياجماعة شكله تقفل علينا هنا .. قالوا : وش هالكلام ؟!! قاموا كلهم يحاولون يفتحون الباب .. لكن طبعا الإستراحه تم إختيارها بعناية , خصوصا المقلط ..لذلك مافي فايده :)


الوقت يمر .. كل واحد يحاول يستخدم جواله , حاولوا يكسرون الباب , حاولوا يصوتون لعل احد يسمعهم , لكن للأسف مافي فايدة :)

بعد مرور ساعة .. تزيد او تنقص , إكتشفوا المقلب الثاني , ان الأكل الي هم أكلوه كان فيه هالول !! , وهذا للي مايعرفه دواء شعبي , يخلي الجهاز الهضمي يستنفر , الغرض من إستخدامه عادة هو للي عندهم عسر هضم او آلام من أكل غير نظيف (ولايستخدم الا تحت وصاية لأنه مضر ) لكن إذا تم وضعه لجماعة توهم ضاربين بطونهم بمفطح يصير الموضوع مأساوي .. :(


المقلب الثالث الي إكتشفوه إن المقلط ماكان فيه دورة مياة وانتم بكرامة , يعني مسكر عليهم بغرفة , وكل واحد بطنة مليان من المفاطيح والرز , والهالول يلعب في بطنه لـعـــب :( ...


يقولون كانت ليله للنسيان , يمنع ذكرها مستقبلاً حتى بيناتهم , اما التفاصيل وش صار بالمقلط ماله داعي ذكرها.. :(


يوم أصبح الصبح فتح لهم أحد عمال الإستراحة حسب الإتفاق , وكان وضع المقلط سئ بمعنى الكلمة :( ...

صار فيه شد وجذب بعد هالموقف , وتدخلوا ناس كثار لفك النزاع , وكبرت القصة لكن الحمدلله إنتهى الموضوع على خير ...



العبرة من القصة....
أبعد عن المزح الثقيل بأنواعه .. ولا ترد على مزح بمزح .. وابعد عن الشر وغنيلو :)


الساعة الآن 09:05 PM

Powered by vBulletin® Copyright ©2000 - 2024, Jelsoft Enterprises Ltd.
Content Relevant URLs by vBSEO 3.5.2 TranZ By Almuhajir


1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50 51 52 53 54 55 56 57 58 59 60 61 62 63 64 65 66 67 68 69 70 71 72 73 74 75 76 77 78 79 80 81 82 83 84 85 86 87 88 89 90 91 92 93 94 95 96 97 98 99 100 101 102 103 104 105 106 107 108 109 110 111 112 113 114 115 116 117 118 119 120 121 122 123 124 125 126 127 128 129 130 131 132 133 134 135 136 137 138 139 140 141 142 143 144 145 146 147 148 149 150 151 152 153 154 155 156 157 158 159 160 161 162 163 164 165 166 167 168 169 170 171 172 173 174 175 176 177 178 179 180 181 182 183 184 185 186 187 188 189 190 191 192 193 194 195 196 197 198 199 200 201 202 203 204 205 206 207 208 209 210 211 212 213 214 215 216 217 218 219 220 221 222 223 224 225 226 227