منتدى استراحات زايد - الدب يوم جاء الجد صار فشقه

السلام عليكم و رحمة الله و بركاته

مساكم الله يالخير

سالفه حقيقيه تقرقع في خاطري وكل ما نويت اكتبها انسى

السالفه طالعين لاستراحه تحت ديراب قبل تقريبا 20 سنه لحد يقول شايب بس كان عمري 25 او ازود شوي
يوم الدعوى مواطير ولابه كهرب انا و مجموعة شباب ومعنا واحد من الشباب دب و قليل حركه و كسول كنا اخر الشهر وظلمه ما تشوف يدك تعشينا و كان كل سواليفنا عن الجن و كنا ناويين على هالدب اكل و مرعى و قلة صنعه ما يحرك الرابظه ولا يساعد في شي

اتفقنا مع واحد من الشباب يقوم يتمشى هو وياه وانا بنتوزا في البرحه اللي ورا الاستراحه و نرجمهم بالحصى و انت عاد شف شغلك هبل به الشخص اللي اتفقنا معه هو راس الحربه في فريقنا اسرع من الفشقه و مسمينه عجاج

الدب هذا دايم يمسك لنا حارس او يحكم ما يحب كثر الحركه زول

ما نطول عليكم بالسالفه بدينا نرجمهم و هالاعصل هبل بالدب الجن جونا الجن جونا يقول خوينا انا قلت الجن والا ما قلته و اهج وشوي الا الدب شغل التيربوا ويمرني مثل الفشقه و يقول شوي الا محضر عند باب الاستراحه و يرجف الباب رجف بغى يخرعه قال له خوينا شوي شوي على الباب ابطمر الباب و افتح لك اكيد الشباب رافعين على التلفزيون و ما سمعو قال الدب اي هين و الله ما تطمر
انا متفقين مع باقي الشباب ما يفتحون الباب لين نرجع
لان الاستراحه على شارعين وهو اول مره يجي معنا وانا ما نبيه يكشفنا ريضين فيه المهم فتحنا لهم الباب كنا ما سوينا شي الا هالدب صدره تقل منفاخ ضوا راقي نازل و ينصى الزير و يشرب غضارتين ما من الروعه و يجينا في المجلس موقف شعر راسه من الخوف و نساله وش فيك قال الجن رجمونا قلنا طبيعي هذي ديراب كلها سكن ما تشوف الاراضي رخيصه ما كلا يبيها المهم يقعد يحولق و يقرا المعوذات و اية الكرسي و هو يرجف لين سرينا

عزمناه الاسبوع اللي بعده و قال مشغول و نشبنا فيه و عيا لين علمناه السالفه قال مدام ذي السالفه ابعلمكم ان لي تقريبا اسبوع انوم مع اخوي في غرفته من الحلوم و الهواجيس

اسف على الاطاله و ان شاء الله تعجبكم

.