السلام عليكم
نقلت لكم هذي القصيدة للشاعر/ يوسف الخليفة،،،
اتمنى ان تنال إعجابكم



قم سو من بيض الدلال المدابيح
والبن الاشقر مثل دمن يسيحي

عزاه من عينن سباته شلافيح
عيا الرقاد لموقها يستبيحي

تخيل بالكنه صقورن مواضيح
ما لومها لو من سببها تصيحي

تبكي على المرباع في ساكن الريح
والطير يفرس والحباري تطيحي

يقبل عليها بالكفوف النواطيح
والخرب بالعرفج يلوبد جريحي

يسطه بقشر الكفوف المرازيح
تسمع له بلطم الحباري فحيحي

يودع لحمها بالعدانه مباذيح
اللي مكوبر واللي تحته طريحي

وقتن به الصقار شال الملاويح
(يدعي به الحر الشعيل الصحيحي)

&ما هوب جيرن دلعوه بمباريح
حدر المكيف مثل فحل الفريحي&

شقر الوحوش بعاليات اللواليح
نطحه سموم القيض يلفح لفيحي

تهفي على الصيده قبل منبت الشيح
تفرس على كيفه بجون فسيحي

واليوم بالعشه قفول ومفاتيح
وقتن على الصقار كنه شبيحي

في واهج الرمضا وحر اللوافيح
ما به غنايم بالمقيض الشحيحي

في حزة الربطه وقفل التصاريح
يعد ريشه ولتمامه طميحي

ان يكتمل ريشه بروس الاجانيح
فهو على نجم النعايم شفيحي

لهبت سقي النسوم اللواقيح
تلقا الرباب بكثرت الما طفيحي

في لايذن ما دوجوه المساريح
ما به من صلوف الذواري لفيحي

ما به يكود صياح فرخ الجواريح
في شوحتن باعلا الطويل السليحي

مقيله لغوفن سواة المقاديح
لزانت الفيه بها تستريحي

هي كيفة القناص ذيك المفاسيح
يطفي وهج قلبن شواه الصفيحي

يريح باله بالنجود المباريح
والضيق عن نفسه يزول ويزيحي