|
النبهاني ورحلة بالطياره بسم الله الرحمن الرحيم اخواني واخواتي المكشاتيه مشرفين وأعضاء وزوار السلام عليكم ورحمة الله وبركاته والله يسعد اوقاتكم بالمسرات قبل كم سنه حول 25 سنه تزود تنقص مدري أعرست وهو العرس الاول والاخير الى الان وصراحه ودي ولا ودي ان اعاود الكره المهم اني اعرست هكا الليله بالديره ومن باكر الصبح اخذت العروس ومشينا للمطار كنت حاجز درجه سياحيه طبعاً رحله داخليه وفيه واحد من الربع الله يذكره بالخير شغال بالمطار وكان هكا اليوم مداوم يوم شافن جاء ابن الحلال وبارك واخذ التذكره وسنّع الامور وركّبنا الطياره درجه اولى قلت له ما يحتاج ياولد خلن على شغلي الاول وتراهن ياصلن جميع قال لي انت عريس ولازم تجخ قدام العروس المهم انحرجت وجلست وهكالوقت الطياره مابه الا اولى وسياحيه بس الاولى تختلف واجد وانا اول مره اركب اولى المهم ربّطونا واقلعنا يوم تواست الطياره بالسما وحنا نفك الرباط ويجيبون تمر وقهوه المضيفه كل ما مرت من عندي تبسم واقول بيني وبين نفسي انا وين وهالامور وين انا هالحين عريس بعدين وش شايفتن فيني - شوده ما توكل فضلتي - المهم قعدت اقدع من هالتميرات واجدّع العبس واتفنجل من الدله المضيفه كثر التبسّم منه واحس ان به ضحكه قويه وده تنفجر من الضحك التفت لفيدتي وقلت يافلانه وش السالفه قالت طاعون ناظر ياقك والعبس اللي تجدعه تراه لوز قلت وابوتس كيف واناظر ولا وش اناظر الشق والبعج اثر يوم اني بصاله المطار انفك زرار الياقه وزريته بس ما جاء بالفتحه اللي مقابله له جاء بالفتحه اللي تحته وصارت الياقه مايله وبعدين عرفت ليش المضيفه تضحك اثره من الياقه المايله وتجديع العبس ( اللوز ) وقلت لنفسي الله يهديك يابو فلان والله يا انا جخيت قدام العروس لا عادت من رحله المهم اني تفشلت وما صدقت على الله اننا ناصل الديره اللي حنا رايحن له وننزل من الطياره وافتك من هالموقف اللي لا أحسد عليه انتهت السالفه واتمنى ان تحوز على اليسير من رضاكم محبكم النبهاني |
| الساعة الآن 11:47 PM |
Powered by vBulletin® Copyright ©2000 - 2026, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir