مساجلة شعرية بين الرياض وجنيف
 

السلام عليكم ورحمة الله وبركاته :
تحياتي للجميع

الموضوع ومافيه أتصلت بأحد الأخوان وأخبرني أنه برا المملكة - وينك فيه قال في جنيف قلته تكفى ماتشفطني من السماعة في التو واللحظة وضحك المهم سكرت الخط وأرسلته له رساله
وقلت فيها

سلام ياللي كحل العين بجـنيف - الديرة اللي سعد منهو نصــــــــــاها
وانا وسط نجدنً يلهبني الصيف- لفح السموم اللي شديدن لضاها
هنيكم تحت المزون المــــــراديف- والبرق من نوره مولع ســــــــــماها
وانا تحت شمسً تحنذ السراجيف- حتى المكيف قام يدعي علهـــا
عيت تجي لي يالسنافي على الكيف- ماجات لي في غصب ولا رضاها

رد علي الخوي وقال
الك البقاء يامصرف الشعر تصريف - وجنيف تطربني ويطرب هواها
من دونها بعد المدى والتكاليف - يازين شوفتها ويابرد ماها
وفي نجد ضبانً كبارن مشاريف- اقنص من الضبان واركض وراها
ياوش تبي بجنيف ياحيف ياحيف- والكيفران اللي تراطن وراها
عيني عليكم تذرف الدم تذريف- ودي بكم ولاجنيف وغثاها

رديت عن الضب وقلت
الله يحيكم بلاي تكاليف - جهز جنوبك كان دام تبحث علاها
والضب ما خلاه صفق العواصيف- ويقول ذا الديرة وش اللي بلاها
من أولن أختار في العشب وأعيف- والحين لحياني مجيم جماها
يالله دخيلك من شيان الصواديف- لانسان ذمبه عم منهو وطاها
تدري بهاجر خل عنك السواليف - من سام ذا العكرة من اللي شراها
ثم بشتري جنحان تعبر بي السيف- واعبر بحور الأرض وأشبر فضاها
واختار أرضً ماولوها الملاقيف- ولا شوف شبكً حددوبه حماها
لاحول وش ذا ؟ ماء علينا دخل كيف- غروني أهل الصيد ورحنا بيداها
وصحيت من نومي كثير الحواسيف- الطين ملطخني وعيني ملااها
وسعد يحرضكم على كاين ضعيف - وانا همومي بالغه منتهاها

وسلامتكم