طلعاتي بالدمام على
 

السلام عليكم
هذه الايام والحمد لله السمك موجود في الدمام طلعاتنا على الاغلب تكون بالرق تسمى النيوه عند الطبعانه او صوفيا ندخل البحر بعد العصر على الساعه 4 ونرجع على 10مساء يكون معاي واحد من الشباب
اغلب الصيد الشعري واحيانا كم حبة بالول هامور
واذا كان القمر موجود ياسلام الجو رهيب ونتاخر شوي بالليل والقهوه والشاي والتمر والماء البارد وسوالف على ذكريات وشوي على تحدي بالصيد عشان الحماس هالله هالله
نرجع البيت تعبانين واقول خلاص ما ابغى انزل البحر ب10ايام ومايجي اليوم التاني الا وانا مشتاق للبحر واكان في شي بداخلي يتحرك ويقلي قوم ياولد وسع صدرك وعلى طول امر سوق السمك بالخبر اخد الطعم والعده المذكوره وعلى البحر اجهز الطراد ويارب
وسلامتكم