|
راعي العجراء المبعوث الرسمي للدكان(البقاله) اهداء الى العضو الجديد ابوعلي السلام عليكم ورجمة الله وبركاته اليكم هذه السالفه وهي اهداء الى العضو الجديد ابو علي بمناسبة نجاحه من مستوصف محو الاميه للدعايه والمكيانيكا من جامعه عين شمس في حلة بن دايل وتعيينه عضو في خيمة السوالف الشعبيه في مكشات وقد ذكرتني بها عمتي منيفه بعد خروجها من مستفشى الصحه التتفسيه للعلوم والتنكلوجيا من سبايب خطيبها الهيال يوم يطيح من الخيل وقد ردت لها الذاكره بقوة ربع قيقا لفتره محدوده 15 ريال للساعه الواحده والعرض مستمر حتى نفاذ الكميه والمصيبه ان الهيل طاح من الخيل وعمتي منيفه هي اللي صار عندها ارتجاج بالمخيخ الايسر بالركبه اليمنى وادخلت على اثره للمستفشى اليكم السالفه قبل اسنين واجد على وقت بيوت الطين وقد كان عمري بالطعش مدري تسع مدري ثمان اسنين وكان عندنا عزيمه ومجتمعات بنات عمومتي وبنات خوالي وبنات الجيران وبنات حارس المدرسه جايت مع اهلهن وانتم عارفين ذاك الوقت القرش له قيمه مابالك الريال ويوم صار العصر قالو البنيات تروح للدكان اللي هي البقاله الحين مكنا نعرف الا الدكان البقاله عقب ماتطورنا وخطت شواربنا سمينها البقاله تشتري لنا حلاو ولاجيت ونعطيك قرشين لك عن روحتك للدكان قلت مايخالف وهم يجيبون ورقه وقلم وكل وحده تكتب اسمها وتكتب طلبها وكم دفعت اللي قرش واللي اربع قروش حتى صار اللي معي اكثر من ريالين عاد وش طلباتهن حلاوة عود (حلاوة مصاص ) واللي حلاوة برميت واللي حلاو قطن واللي كاكاو وكل وحده تمد رجله قدر اقروشه وانا اروح للبقاله منطلق بقوة 7 درجات بمقياس رختر واول ما شريت بقرشيني حلاو والباقي شريت فيه كورة صب بريالين وانا اجيك يمهن وعطيهن الكوره يوم شافن الكوره اللي تصبح واللي تضحك بنات وجايب لهن كوره والله من زين الدبره ياراع العجراء وهن المسيكنات كل وحده تتلعمط بالسانه تحتري حلاوها قبل مايجي وانا اعطيهن الكوره واطلع وخليهن يصيحن بعضهن الى الحين مادة السانه عقب ذاك التلعمط تحتري حلاوها صارت عاهه فيها المهم ماعلي منهن الكوره ماهيب مقسمة بينهن يوم راحوا وتفرقوا ولا الكوره بالبيت خوش مكسب انتهت السالفه وارجوا ان اكون وفقت في سردها لكم وقبل الختام سبحانك اللهم وبحمدك لا اله الا انت استغفرك اللهم واتوب اليك دمتم بالف عافيه والله يحفظكم اخوكم ابو جلنبوا والسبانه |
| الساعة الآن 05:15 PM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir