منتدى استراحات زايد - راعي العجراء والخوف والذيب

السلام عليكم ورحمة الله وبركاته
اليكم هذه السالفه
بعنوان راعي العجراء والخوف
سالفه قديمه جدا عمري بالطعش شاربي توه بادي يتبزز لاشفته تقول ورق شوي شاهي منتثر بالارض
وكنت ذاك الوقت ماعرف الخوف اطب بالقلبان تالي الليول اسبح (من زود النظافه) واذا جيت اطلع ادور على فروخة حمام خاصة لاصارت ذيك الليله قماري وماهنا عزكم الله كلب مايعرف شكلي من كثر مالحقتهم ومن كثر ماصوى مني واحد منهم
اذيتهم اذيه واللي امسكه اقطع اذانيه وعطيها كلب اخر ياكلها لما صارت كلابة الحاره بلا اذان لاشفت اذن الجعري اكرمكم الله تقول مقلاع عرجون بجنب حصات من كبر راسه اما البساس لابغت تمر مع أي شارع لازم تاقف بالعاير ولوماهي بحارتنا تتلفت اتشوف انا بالشارع والا لا من زود الحرص عندهن قاعده ماشيت عليها الخوف مليح ومن خاف سلم واكثرهن بدون ذيل مقطعهن لامر من عندك البس (القطو) تقول جيب ربع مفكوكة استبنته تحس انه ناقصه شي ماهوب كامل وانا ماغير هجهجه اروح وجي تالي الليل مع الشوارع والمزارع والدنياء ضلام لا لمبات والا غيرها يمكن كل خمسين بيت تلقى صاحبه حاط لمبه عشرين وات واذا مرينا من عندها تجهر العين من قوتها ماتعودنا على النور ومن زود الضلام وكان الوالد رحمها الله مايرسل الا انا من بد اخوتي اروح من قريه لقريه وسط الفلايح والا البيوت اقطع كيلوات ليل والا نهار وماعرف اقول لا سم وابشر وامرك لو اني توي لاحق كلب 16 كيلو ابنص واحد ومره لحقت كلب وهو يلتفت علي وهو يركض ويناضر فيني واحس انه يقول ول من طول نفسهالمهم اروح واقضي لوازم اهلي بالرغم من انشغالي بهذه الحياة الله يرحمهم مايقدرون مشاغليويوم صار مره من المرات ويطلع واحد من ربعنا ويصيد هاك الذيب اللي كبرالثور من كبره رجلينه قصيرات من الشحم تقول ددتسن مركب له كفرات عربية افغاني ومحمل عليها بلك المهم وهو يجيب الذيب معه للديره يبي الناس يشوفون كبره هذا اللي عاثي بغنم الخلق طايح بالمفاطيح وانتم عارفين سالفه تجر سالفه عن الذيابه وانا قاعد اتسمع ودي اني لاحقه قبل مايموت قال واحد من الموجودين يقولون اللي ياكل كبد الذيب ماعاد يخاف من شي يطلع ذيبقلت انا اباكل كبدته كود يروح عني الخوف وانا اجيب السكين ومزع جنبه وقطع شوي من كبدته وانا اكلها ماشفت شي الى الحين بس حسيت اني ذيب ماكل الكبده ماغير ودي اقنب مثل الذيب مجرد احساس ويوم صار من باكر وجاء حزة النوم وانا اخذ غدفة امي واربطها برجلي واربط رجل امي معها اخاف تقوم وتخلين صرت اخاف من كل شي ماهو من اضلالي اخاف صار اضلالي ينز(يرتاع) قبلي ثم انز انا بعد ضلالي الى ارتاع واذا بغى يرسلني ابوي لم محل لوهو قريب قلت ماجسر اخاف ولاشفت بس كعشر جلدي ومن هذاك اليوم الى الحين والخوف محيط فيني مافتح الباب الا والشغاله معي والا ارسل واحد من العيال الصغيرين يناظرون من عند البابمرات اقول لاعادها من ذيب ولاعادها من كبده ومرات اقول اشوى يوم اكلت الكبده عقلت من ملاحق البساس كان الى الحين وانا الاحقهن ومابي جهد شيبت ياركيباتي انهن يصرصرن وانا منسدح وشلون لواركض بساقت بس كان يتفصلن مايمسكهن الا الجلد
انتهت السالفه
وقبل الختام سبحانك اللهم وبحمدك لااله الا انت استغفرك اللهم واتوب اليك
ارجوا ان اكون وفقت بسردها لكم كما ارجوا ان اكون ماضيقتكم بطول السالفه والسموحه
مع تحيات اخيكم
راعي العجراء
ابو جلنبوا