|
راعي العجراء والسيكل السلام عليكم ورحمة الله وبركاته راعي العجرا والسيكل قبل خمسين سنه كان معي سيكل مقاس عشرين نوع (جوبيتر)يعني الاصلي وملبسه تلبيسه شعار (نادي ...؟؟؟ ) حتى مايزعلون علي بعض الاعضاء المشجعين للنادي المنافس عند واحد بشارع العطائف وحاط فيه دناديش عند مسكات اليدين وكشاف وبوري ومرايات وبواري ماليات الدركسون من كثرهن ماعاد لهن محل وحطيت بعضهن بالوطايات (من باب المبالغه) بس ودك تتفرج عليه ولا مريت من عند احد يقول يحقلك ولد نعمه مدري ولد مزنه عاد خذ من الدلع والموقه اعلق البواري كل اصبع على بوري حتى اصبع رجلي الكبير ارعص فيه بوري الوطايه ومن زين منظر السيكل ودك تاكله وتقعد ثلاثه ايام عقبه ماتاكل شي والغريبه حتى السيكل صار فيه دلع لامشى تقول سيقان بنت تخوض بالماء ياشينه يالله من فضلك نعود لموضوع السالفه حتى مانطيل بالكتابه والوصف ثم تطلع علينا عبارة خير الكلام لاتلحسه كله كان لي واحد من اقاربي يسكن في بيت ماتاصله الطيور من رفعه براس طلعه السيارات ماترقاه كود تاخذ عزم من بعيد والطريق ماسفلت ياكفرات السياره ماغير تفحط تقول وليد صغييير ماخوذ منه شي ويفحط برجليه من الصياح المهم كنت كل يوم لاطلعت من المدرسه اشيل سطل لبن اوديه لقريبي هذا يوميا وحاط قريبي كرت حضور ونصراف يعني مافيه امل يجي يوم ماوديت له لبن ويوم صار ذاك اليوم وانا اودي اللبن على العاده ولابطرف الشارع بيت يعمر من الطين تو مابدو يسقفون الدور الاول وحاطين شحنة طين في مدخال الطلعه مثل ماتقول قبل نهايه الطلعه بخمسه امتار وهالبيت على شارعين واحد على شارع الطلعه وواحد على الشارع الثاني واذا نزلت من الطلعه حرف تي T مقابل الطلعه وهالشحنه توها جديده مابعد راح منها شي وشايفها يوم ادف السيكل ارقيه للطلعه قلت اعرف ان السيكل يبي يغرز بهالشحنه وانا اجيك مدحدر مع الطلعه وزياده ادرج لما تخالف رجليني مع الوطيات من السرعه والطين ماهو مثل الرمل الطين قاسي ونا على سرعتي ويوم طب السيكل بالشحنه وانا اجيك مرتفع بالجو بيت الطين اللي يعمر تحتي زود على انخفاض الطلعه يوم ارتفعت عشرين متر في المقابل فبه باب مفتوح نصف فتحه ومدخال البيت (المجبب كان يسمى بالسابق)يروح على طول يمين وانا وسيكلي اصفق بالباب ويحذفن يمين مع المدخل لعل فيه حرمه تكنس المجبب في مكنسة خوص من السعف هي سمعت الصفقه وماتدري وش اللي جاه من الروعه ان جدايلها (قرونها) انهن مرتفعات تقول قرون ظبي وهو يدخل السيكل تحت رجوله وهو يقشه وتطيح علي انا وسيكلي ولامافيه شي مايعورني جروح ودم لما غدى جسمي تقول ساري هنديه وهي اللي تطمر وتقوم واقفه وتلف المكنسه على وراء وخذ يمسط بظهري زود على اللي فيه تبي تبرد حرتها فيني انا جسمي متمزع من الطيحه تقول ثاير فيني لغم وكملت الناقص بالطق زود على ذلك البواري علقت لما خلصت بطارياتهن وانا ارجع اصيح ماهمن اللي فيني من اوجاع انا كل همي السيكل اللي صار تقل علك لحجيه ماتعرف المرتبه من الوطايه وانا ارجع للبيت اصيح ومن عقبه مارحت اودي لبن الى يومنا هذا انتهت السالفه وان شاءالله ماطولت عليكم ولا ضيقت صدوركم وقبل الختام ... سبحانك اللهم وبحمدك لااله الا انت استغفرك اللهم واتوب اليك مع تحيات اخيكم راعي العجراء .... ابو جلميوا كما انقل لكم تحيات عمتي منيفه ام اليتمان السبعه هذاه عندي تسمع وتقول سلملي علاهم دمتم بخير http://www.arab7.com/up/file/1184410047283.jpg |
| الساعة الآن 11:03 AM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir