سؤال للنقاش بخصوص المزاد
 

السلام عليكم
يا أهل مكشات الغالين مبطين عنكم ومشتاقين واسال الله ان الجميع يكون بخير

دار اليوم في المجلس سؤال واختلفنا عليه وقلت اعرضه عليكم ياأهل مكشات
نبي نشغلكم شوي بالصيف ونحاول نجد عندكم الجواب الصحيح واذا احد مر عليه مثل هالامر يمكن يفيدنا وخصوصا ربعنا اهل الحجاز لان عندهم مزاد يومي في الموسم واكيد مر عليهم مثل هالامور

ماني مطولها عليكم:

لو قدر الله وطرحت لك طير وقبل توديه للمزاد كلمك صديقا لك غالي وقال يافلان
انا والله وي اشتري طيرك بس اخاف اظلمه بالقيمه
نزله بالمزاد ولا وقف علي سعر رد لي الخبر اما قلت لك شريت ولا قلت لك بيع ؟؟؟

في مثل هالحاله لو وقف الطير علي سعر هل يحق لي اني اخرج بالطير من المزاد وانا مبيت النيه ابيعه لرفيقي بفرق بسيط

واقول لهل المزاد ماني بايع بالقيمه هذي وانا صادق ابي ابيع بزياده لرفيقي؟
مع العلم ان اهل المزاد بعضهم يزاود علي الطير وجاي من بعيد ولو يدري بالقيمه اللي سام فيها رفيقي يمكن يزيد عليه ؟


بعضنا قال مالك حق تطلع بالطير من المزاد وتبيعه بقيمه انت مبيتها بخاطرك لرفيقك
غشيتهم وخليتهم يزيدون وانت متفق مع رفيقك تبيعه ان جاز له السعر بدون لا ترجع للناس اللي يزيدون ؟


وبعضنا قال مافيها شي اهل المزاد وقفوا علي سعر ورفيقي زاد عليه برا وانا سافط له
وابي ابيعه بفرق بسيط بدون لا رد لهم خبر وطلعت الطير من المزاد ناويه لرفيقي؟



انتم وش رايكم؟:d