منتدى استراحات زايد - قصة السفر بعز القايلة

السلام عليكم ورحمة الله وبركاته

هذا سلمكم الله سالفة صارت علي قبل سنه تقريبا

كنت مسافر من حفر الباطن للرياض وكنا بوقت صيف وانا ماشي بعد الظهر يعني بعز القايله ولا كان بالخط سيارات كثيرة ( ما احد يمشي بذا الوقت غيري) المهم كنت ماشي ومشغل شريط شيلات حافظا كل الشيلات اللي فية الشريط له سنه بالمسجل ( خربان المسجل مايطلع الشريط) وكل ما اشغل السيارة اشتغل هالشريط

وبعد ما تعديت أم رقيبة تجاوزني ذاك الجمس اللي مضلل وماسح طبلونه ( يالله سترك يازين ساهر) شوي الا اشوف قدامي غبار ياربي تستر لايصير حادث (انا بحياتي ماوقفت عند حادث ) ولا احب مناظر الحوادث عندي رعب من الحوادث 0 قربت الا والله الحادث يووووووووه وش الدبره هالحين سيارتين منقلبات ولا فية بالخط غيري لو ماوقفت من يساعدهم المهم تشجعت ووقفت والا الجمس اللي تجاوزني قبل شوي منقلب وبجنبه سيارة ثانية منقلبة ويوم قربت من الجمس الا واحد يحاول يطلع وامسكه واسحبة قال تكفى طلع ابوي قلت اجلس ابوك سليم ان شاء الله وارجع للجمس والقاء الشايب قلت انت طيب قال اية بس الولد وينة قلت ولدك طيب هذا هو معي طلعنا الشايب وجلسته عند ولده ورحت اركض للسيارة الثانية ابطلع راعيها ( خلاص راح الخوف ) جيت السيارة اطالع بالغمارة مافيه أحد اروح ورى السيارة ولا القى احد وين راح السواق اكيد احذفته السيارة يوم انقلبت واروح اركض جهة الخط الثانية واتلفت وسط هالنفود ولا شفت احد وارجع للشايب وولده قلت راعي السيارة الثانية مالقيته اكيد السيارة حاذفته وسط النفود لازم نلقاه قبل يموت الرجال

قال الشايب يابن الحلال تعال مافية أحد لا ادور 0 قلت وشلون مافية أحد السيارة الثانية وين سواقها 0 قال يابن الحلال اركد السيارة الثانية منقلبة لها شهرين وحنا جينا وانقلبنا عندها 0

والله ياخوان هالقصة صارت معي فعلا عسى الله يحفظنا وياكم من الحوادث

وسلامتكم