شباب أصلاً هاي مو ثوره وخلونا نصارح بعضنا وبسنا هرار على روحنا
 

لحد يجي يكتب يقول لي إنت مخابرات او قاعد تحبط ومن هاالكلام اللي ما يودي ولا يجيب

هادي اصلاً لا هي ثوره ولا شافت ثوره بعد

اللي إحنا فيه الحين باالضبط يسمونه إحـــتـــجـــاجـــاتــ

أول مره أشوف ثوره الناس تروح اشغالها بسلاسه والناس كلها تطلع للمجمعات وبعض المطاعم إذا تروحها ما تحصل بارك أصلاً والمكان فُل وخصوصاُ قسم العوائل وتعال إنطر دورك عاد ..

تعودنا على السيناريو اللي يصير كل يوم

حرق إطارات وياريت كل يوم بعد

بس إذا جودوا واحد سياسي مثل نبيل رجب الله يفرج عنه أو شخصيه مهمه معروفه وخوب باقي المعتقلين ماليهم إلا الله .. مافي لا فعاليات ليهم ولا شيء جنهم أولاد البطه الحمره ..

ويعني هل بإعتقادكم حرق الإطارات ستسقط الحكومه ! لا بالله ما راح تسقط ولا بعد 100 سنه

خلونا نصارح بعضنا ولا نقص على روحنا أكثر

هادي ما هي بثوره

هادي إحتجاجات متفرقه

والروتين الإسبوعي حفظناه عن ظهر قلب

ننتظر يوم الخميس والجمعه عشان نسكر القرى باالحطب والحجاره ويجون الشغب ويطلقون الغاز المسيل للدموع كعقاب جماعي للقرى

ويش السالفه ؟

هذا اللي قدرتون أو قدرنا عليه ؟

ما يصير جذي يا حلوين

الثوره هي قلب النظام وعمليات قويه تشن على مصالح الحكومه الرئيسيه المُركزه والضربات الموجعه والوقوف في الساحات وما أقصد طبعاً مهرجانات النفيش مالت الوفاق لأن سبب دمار البحرين هي مهرجانات الوفاق اللي ما منها لا فايده ولا عايده

أول مره أجوف ثوره يجيبون فيها حصنه بونيه وبيت هزاز ! واللي باط جبدي لون الكراسي يا أخي .. أزرق في ازرق كأنه نادي المنامه الله يغربل إبليسكم ..

عموماً

يالله رايح العمل الحين وأتمنى ما أجوف تاير محروق في الشارع