منتدى استراحات زايد - قصة الثلاث طلاب

بالرغم من عدم انتسابي لصرح التعليم غير ان معظم اصحابي معلمين
عشان كذا تلقاني اكن للتعليم والمعلمين بصفة خاااااصة الود والمحبة وافخر بصحبة بعض المنتسبين له شرواكم
وقصة اليوم صارت لثلاثة طلاب ايام الكلية كانت تجمعهم الزمالة والصحبة والسكن
ويروي لي هذي القصة صاحبي واللي الان مدرس والحمدلله سيرته واخلاقه تسبق اسمه
يقول في ليلة من ليالي الاختبارات يوم هود الليل وكنا في اخر سنة في كلية التربية كلن ماسك كتابه بيد والملزمة بيد والاوراق ملي الارض كنها بسطة جرجير وشاهي مكبوب وبرادي لو تشوفه ما تشرب منه لو ان اللي فيه دوا غير الكاسات اللي كنها عيال بسه شي بادريق وشي باشماخ وشي كاسة جبنة سائلة غير التلفزيون اللي انتله علاقات ملابس والسفره جرايد
المهم مالكو باطوالها ما انتبهنا الا وواحد من خويانا يصرخ ووجهه متغير ويقول كلام ما نفهم منه شئ قلت لخويي الطيب يا ولد خوينا وش اللي جرا له قال الله اعلم انه لبسه جني قلت يا ولد غير بدل قال العلم اللي جاك وتراه قالي قبل كذا ان جاته حاله وابوه وداه لشيخ قرا عليه وطاب
قلتله اجل يالله نوديه للشيخ فلان ومن حسن حظنا ان بيت الشيخ ما بيننا وبينه غير شارع المهم اخذناه للشيخ يمكن الساعة قريب الفجر اتا سانده من جهة وخويي من الجهة الثانية وبدا الشيخ يقرا وسبحان الله كان جاته اغماءه وما صحيت الا خويي الطيب يسطح ضحك بصوت عالي وانا اطل فيه مستغرب واقول بنفسي هذا ماهو وقت ضحك والشيخ يطل فيه ويقوله انا جايلك الحين
اثاري خويي الطيب ماهو صري به مس ومع قراية الشيخ ضحك الجني على لسانه
المهم الحين انا والشيخ الطيبين والاثنين خوياي بهم مس والشيخ يقرا الين الله فك عنهم اللي كانو فيه ورجعنا السكن ومن يومها قلت لهم اشبعوا بالسكن .
تمت