من واقع خبره سنتين تاهو ltz 2007
 

السلام عليكم ورحمة الله وبركاته
من واقع تجربتي للتاهو ltz 2007 وبعد ما قطعت فوق 80000 كيلو و 1350 ساعة تشغيل حبيت أنقلها لكم لأني كنت أتمنى قبل اشتريه أني أعرف تجربه لشخص فعلا جرب السياره بس للأسف كان الموتر جديد وكنت من الأوائل الي شروه على العموم من واقع تجربتي هي كالتالي :
1- ندمت اني شريت ltz وما شريت نوع lt لأني دفعت فرق كبير لمواصفات ما أحتاجها مثل المسجل ونوعية السماعات وعددها وكذلك مثل ( الكراسي تتصفط من خلال الكهرب ، باب خلفي شفط ، كراسي مدفأه ، فتح باب الكراج من بعد ...الخ )
2-فيه أصوات قرقعه غير طبيعية ومصدرها أعتقد ناتج عن المواد المستخدمة بالغمارة مثل الطبلون والأبواب أقصد البلاستيك .
3-رداءات تثبيت المفاتيح بالطبلون لحد الأن أنفك مفتاح الأنوار ومفتاح الدبل ومفتاح التحكم بالدواسات وبعض البلاستيكات الأخرى كأن ودها تنفك
4-ردأة تثبيت الصدام الأمامي .
5-نزول وجه الموتر ونزل اكثر بعد ما ركبت ونش ودعاميه حديد.
6-الموتر مريح جدا وخاصه بالسفر وتكييفه ممتاز وعزل الصوت جيد جدا .
7-القير والمكينه لم أواجه أي مشكلة ولله الحمد .
8-الدبل من تجربتي له تمام بس الموتر ماهو مهيا للبر وخاصة بالشعبان وبالرمل ثقيل ويحك .
9-صرف البزين جدا طبيعي والسفر أقتصادي جداً لأنه يشتغل على 4 سلندر .
10-حساس جدا لنوعية البنزين فإذا عبيت بنزين من بعض المحطات الي بنزينه مخلوط أو غير نظيف تولع لمبه خاصة بذا الشي .
11-قيادته بالمدن صعبه شوي يمكن لأن السياره عريضه وتلافيت ذا المشكله وشريت سياره صغيره .
12-الأزياق السود المحاطة بالشبابيك تتفكك ورجعهتها وثبتها بنوع جيد من الغراء.
13-فتحة السقف لها صوت عالي إذا فتحتها يمكن ذا الشي طبيعي .
14-الموتر سريع وبدون ما تشعر تلقى نفسك ماشي 180 .
15-اللون الأسود المستخدم بطلاء المسجل والمكيف مع الأستخدام يزول ويطلع اللون الأصلي أخضر بس حلو نوع من التجديد .
16-المرايا الجانبية كانت تتصفط كهربائيا وللأسف خربت وحده .
17-المرايا الجانبية كانت تنزل على تحت مع الريوس وللأسف تعطلت .
هذا الي جاء على بالي ويمكن لو كانت سياره يابانية كانت بتكون أفضل لأني كنت مجرب باترول فيما سبق تحياتي وأسف على الإطاله