منتدى استراحات زايد - سالفة العامل والضب .. النبهاني ..

بسم الله الرحمن الرحيم

اخواني وأخواتي المكشاتيه

السلام عليكم ورحمة الله وبركاته

سويليفه قبل كم وكم سنه يعني مبطي كنا انا وواحد الله يذكره بالخير ومن يقرا عزوبيه آخذين بويت غرفتين وحويش ومنافعهن وتونا متوظفين

ويننا عند ارواحنا طايحين بالجخ جايبن عامل

وهالعامل يجي الضحى ويسبع المواعين وينظف البيت والا قضا من شغله يروح وبعض المرات نصادفه الا جينا من الدوام كان انه ما انتهى من شغله

بيوم من الايام مثل هالوقت طالعين للبروصايدين ضبان شي تغريق وشي طرد ومسك يعني ما فيه رمي من كثرهن هكا لوقت ماهوب الحين تدوره بكشاف

وحنا راجعين للبيت وبالطريق تفلتن بوسط السياره ويالله مسكناهن وجمعناهن من تحت المراتب

واخذنا لنا أربعة أيام وحنا نذبح منهن وناكل

وعقب اثنى عشر يوم او ثلاث طعش جيت من الدوام ودخلت البيت والا بوجهي العامل طايرتن بوهته ومناخره متفتحه ويرتعد ويقول دب دب

انا جا على بالي انه بالعن له شي وغاص ويبنن ادبه مع ظهره

واقوم واجمع اصابعي ( جمْع ) وانا ادبجه مع ظهره يوم تمدد بالارض طبعا دفاشه ما بعده دفاشه لأني خايف عليه ودي مايموت واثري بغيت اذبحه

انا انهبلت احسب ان قلبه يطلع يوم اخذت شوي وهو يقوم الحمد لله

ويردد دب دب ويومي بيده يمين ويسار

عقب فهمت انه شايفن ضب منطلق من اللي جبنا لاننا فاقدين واحد

قلت له وينه دلن عليه ولقيت الضب منّلفز وانا امسكه واربطه

العامل من هكاليوم الى اليوم ما شفناه ( سليمان ابو الريش خرج ولم يعد )

انتهت السويليفه ولكم مني أزكى تحيه

محبكم

النبهاني