منتدى استراحات زايد - عامل المزرعه والعصـآفير , ,

بسم الله الرحمن الرحيم

السلام عليكم ورحمة الله وبركـآته , ,
حيّـآ لله اخواني . . مشرفين , واعضاء , وقرّآء خيمة السوالف الشعبيه .

هذي سالفه طابعها مختلف عن القصص اللي اوردناها الا وهي " الرحمه "
والرحمة تشمل الانسان للإنسـآن وتشمل الانسـآن للحيوآن والطير .

والكل منـآ يعرف العصفور وخوفه وحذره الشديد من الانسـآن

وباختصار شديد انا على كثر مآرحت للبر وللقرى وللمزارع الاحظ ان العصفور شديد الحذر حتى عن بعد وهذا امر طبيعي والكل منا يعرف الشي هذا

في يوم من الايـآم .. رحت نهاية الاسبوع لمزرعة واحد من الربع ومن وصلنا طبعا المزرعه فيها عامل بـآكستآني ذو خلق واخلاق وطيبه .

المهم مالكم ب الطويلات .. مسينـآ ذيك الليله حنّـآ والشباب اصحـآبنا الا والله يوم شق النور ..

واصحى من النوم عارفين نوم المزرعه الساعه عن 3 ساعات تحت المكيف داخل المدينه
وبعد ما شق النور وانا في الفراش واراقب . . شوي الا والعصـآفير مجتمعه ولها (لجّه)
زقزقه .. وكان صوت قوي يشد الانتباه

في اليوم الاول !! كانت لافته للنظر بس مـآالقيت لهـآ بـآل
واليوم الثـآني !! تكرر الوضع . .
واليوم الثـآلث .. خذتني اللقـآفه وحب الاستطلاع
قمت اراقب وانا على الفراش >> طبعا فاضي وشبعان نوم هههههههههههه :D

والا ولله العصافير تدور حول موقع واحد .. اللي هو مطبخ البـآكستآني تعجبت واستغربت وتسـآئلت في نفسي !! وش هالاجتماع ؟؟ هو عندهم حفله ولا عندهم زوآج :p
وبالعاده العصافير ماتجتمع وتكثر الزقزقه الا اذا شـآفت دآب الله يكفينا شرها ويـآكم .

طليت برآسي على الموقع مـآشفت اي مخلوق ولا داب ولا كائن حي !! وبعد ذلك زاد تركيزي وزاد فضولي
وش سر زقزقة العصـآفير واجتماعها بهالكثره ؟ ؟

المهم شوي .. والا الباكستاني يطلع من غرفته اللي مجاورة للمطبخ . ويدخل المطبخ
وانا طبعا اراقب من السطح والبـآكستاني مانتبه لي

ويطلع البـآكستـآني من المطبخ مـآلي يده من رز نـآشف من الكيس وينثره قدام
بـآب المطبخ للعصـآفير . . وسبحــآن لله العظيم وهو في يده الرز والعصافير حول ماتوقف على راسه وعلى يده
وسبحان الله العظيم الرحمه , والعطف وقل الاذيّه .. جعلت العصفور اللي يخاف من الانسان على بعد 50 متر .. ومعروف منه الحذر .. آنّه حول مـآيوقّع على يد البـآكستـآني ورآسه ...

ونستخلص من هذي القصه ..

( آن الرحمه واطعـآم الطير والحيوان سبب من اسباب الولف والمحبه )

* وقـآل عليه الصلاة والسلام ( في كل كبد رطبة أجر )

شكر خـآص لكل من مر وقرأ القصّـــه