منتدى استراحات زايد - راعي العجراء وكبسة الرز

السلام عليكم ورحمة الله وبركاته
هذه سالفه قديم شوي قبل عشرين سنه تقريبا
بعنوان
راعي العجراء والكبسه والرجيم
في يوم من الايام قرر راعي العجراء عمل رجيم تخفيف للوزن الزايد حينما شاهد سره
تقول خيمه منصوبه فوق نفوذ ممطور من العافيه ودبغ الرز
(قولوا ماشاءالله تبارك الله الله لايضرك يابو جلنبو اخاف يجيني شي وبعدين وشلون اجمعكم)

اخوكم راعي العجراء فكر كثير ويوم فكر ضاع ليته مافكر مامن ذهانه تسوى التفكير
دخلت على المعزبه قلت فكينا من الكبسات ماعاد ابي رز شوفي اي شغله غير الرز
سوي ايدامات مشاوي قرصان جريش المهم الرز لاعاد تطبخين
قالت مايخالف بس باقي شوي بالكيس قلت شوي والا كثير قلتلك لاعاد تطبخين لاعاد تطبخين وانا تقاطر سعبولتي على ريحة الكبسه حقت امس الى الحين وهي براسي يوم تحسفت وضاق صدري

قلت مايخالف اذا باقي شوي اطبخي اليوم رز و خلينا نكمل هالكيس وماعاد جايب رز
وعلى فكره ياأم جلنبو كم يوم يمكن يكفي الرز الباقي
قالت يمكن يكفي تسعه اوعشرة ايام يوم ضاق صدري بجد واخذت اصفق بالبيبان
هذا وانا مابعد بديت بالرجيم
المهم كملنا الكيس وخلص وبتدى مشوار الجفاء مع الكبسه يوم جاء وقت الغداء ولاها ماليه السفره من نعم الله علينا
كل مايخطر على البال وانا اتلفت ادور الرز مابي غيره تمالكت نفسي واكلت من غير نفس
وعدا ذالك اليوم على خير
جاء من باكر وانا اتلفت ادورالكبسه اقول يمكن طبخت كبسه بالخطا واخذت على هالحال ثلاثة اشهر وانا كل يوم ادور على الكبسه
الحريمه المسكينه تجتهد بالطبخ حتى تعبت
وانا اجتهدت بالصبر على محبوبتي الكبسه
المهم يوم خلصت الثلاث شهور وانا اطلع ذاك اليوم للحوش قبل الغداء لعلي اشم كبسه الجيران
شوي يوم شميتها وانا ادخل مسرع يالله حطي الغداء قبل ماتقطع الريحه
وهي تحط الغدا وتغد ذاك اليوم زين
وفي اليوم الثاني بديت اشم حقت الجيران بالبيت الثاني ومع مرور الايام صرت اشم كبسات اهل الحاره كلهم وصرت اميز ريحة الكبسات هذي ريحة كبسه بيت فلان وهذي كبسة بيت فلان المهم خلصت اربع شهور وانا بعيد عنك حياتي عذاب
وانا اطلع من البيت وعلى محل بيع الارزاق وانا ادخل للمحل السلام عليكم وعليكم السلام فيه رز قال اي نوع قلت الطارف بس اسمه رز
قال كم كيس قلت كم تشيل سيارتي من كيس حمل طبعا سيارتي صغير
قال تشيل الشنطه يمكن اربعه قلت وثلاثه في المرتبه الخلفيه هذي سبعه وواحد حطه معي في مرتبة الراكب ابا اخذ اعلومه عقب هذه الغيبه وابا اسولف معه وبحكي له قصة معاناتي مع الهجران وكحل عيوني بشوفته
من وراء الخيشه
ريحة ابو زيد ولا عدمه
المهم شريتها ورحت للبيت وانا انزلها والحرمه طارت عيونها تناظر قالت وش هالاكياس يابو جلنبوا
قلت اخاف يوم اقول اابسوي رجيم وبقطع الرز و تقولين باقي شوي
وبعدين ابي الغداء كبسه والعشاء كبسه والفطور سندونش كبسه انا صبرت اربعه شهور عن الرز انا ابي كل شهر تخلصين كيسين رز تعوض عن الاربعه شهور كلها مجافات ومعانات
وابي بعد اذا صرت نائم وقدرتي تشبكين مغذي رز مسلوق مع لحمة حاشي اكون شاكر
يازوجتي العزيزه من هنا اكون تقاضيت من الاربعه اشهر الماضيه
انتهت السالفه وقبل الختام سبحانك اللهم وبحمدك لااله الاانت استغفرك واتوب اليك
ارجوا ان اكون وفقت بهذه السالفه وانتظر ردودكم للتشجيع على الاستمرار او الانقطاع
تحياتي لكم
http://center.jeddahbikers.com/uploa...3271621761.jpg