|
راعي العجراء وصيد السمك السلام علاكم ورحمة الله وبركاته اليكم هذه السالفه القديمه بعنوان راعي العجراء واللنش وصيد السمك في سنة من السنين المبطيه عزموا ربعي وعددنا اربعه ان نطلع رحله بحريه صيد سمك قالوا هه يراعي العجراء نبيك تروح معنا بس وشلون كبيدك (الكبد) تتحمل قلت انتم بتشيلون عليها شي ثقيل ويوم تقلون تتحمل كبدك قالوا لا نبي نركب اللنش وخاف يجيك دوار البحر قلت دوار البحر في اي شارع اذا جانا اخذنا الدوار ورجعنا قالوا يالخبل اخاف تدوخ علينا وتطر(؟) ثم نرجع من وسط البحر ويضيع علينا الوقت وتحرمنا الصيد قلت يالربع خلونا نركب وان شوف البحر وش هو من لحيه وانا مابعد جربت البحر وبالنسبه لراسي ماهوب دايخ ان شاءلله كم مره يصفق راسي بالجدار من ذاك الشايب الله يرحمه (بالسالفه السابقه)ولا دخت وش انت يالبحر تدوخ راع العجراء قالوا يالله مشينا الرجال يحترينا صاحب اللنش بس انتبه تقول رجعوني للديره المهم وصلنا البحر وركبنا القارب وقعدت عند السواق قلت علشان ادل الخط سبحان الله يمكن يضيع ويقعدنا بالبحر خلني افتح زين علشان اقدر ارجع فيه على الجره شوي يوم اللنش مغط ضهره داخل ذيك الفيضه بوسط البحر وانا اتحمس حسبته يطرد السمك مثل طرد القطاء انا اطالع بالبحر شوي وبالسماء شوي ادور شي يطير ماشفت شي قلت بس اجل السمك ينفج مثل الارنب وانا معي سناره ومتحمس قلت اول سمكه اشوفها ابغى الوحها بعصا السناره الطويل وكسر ضهرها المهم ماشفت شي قلت بس يمكن السمك مثل قصيعه الجربوع الحين ينفج قدامنا واخير مالقيت حل وشلون يصاد السمك وبعد مامشينا خمسه كيلو اوسته مادخت بس حسيت ان عيوني وحده تشوف سطح القارب والثانيه تدور السبع بالسماء وحنا بالضهريه اشوي يوم حسيت كبدي مثل طربمة الماء اللي معبية هواء وعيت لاتدفع انا ياخوك مدري وش جاني بس ماعلمت الربع اخاف يزعلون علي ويقولون معلمينك يوم حنا بالارض يوم ضاقبي البحر وانا اروح عند المراوح كني اشوفها وشلون تدفع القارب واحاول اضبط نفسي كن مابي اخلاف وانا مارحت الا من سنع مابي الربع يشوفون راعي العجراء وحلقه تقول مزيتة شيول اشوى يوم صحيت وارجع اهيجن وكبدي مثل الجراد بداخل خيشه تخترش داخل الكيس يبي يطلع وانا كبدي تخترش داحل بطني تدور المطلاع وصاك عليه زين اخاف تجيب العيد يوم رجعت الا صاحبنا اللي يقول لاترجعنا الا وهو ممدد بالقارب تقول ردمية قبر وش العلم قالوا دايخ قلت افا ياذا العلم له ساعتين وهو مدوخن بالحكي لاترجعنا لاترجعنا واخير مدد بالقارب يالربع ماودكم نحطه طعم يتجمعون عليه السمك التفت على خويي الثاني واشوف عيونه ولاهن مايلات ويدورن تقول كشاف برج المراقبه للطيارات يحاكين وعيونه تناظر غيري قلت بس جاه اللي جاني من شوي قلت ياولد اقول له رح شف المراوح حقات القارب وشلون دفعهن بس اخاف يكشفني انا موبد المراوح لي وقت الزنقه المهم اخذته ومسكت ايديته وسدحته عندي الثاني وحطيت حدره وساده وهو يقول الله يعافيك الله يعافيك باقي الثالث تشابكت الخطوط عنده ماغير يغني شبك اغاني ام كلثوم مع سميره توفيق اسمعه يقول فكروني ازاي هو انا انسيتك ياصبابين الشاي فوق الخيل فوق الخيل شوي الا ويشبك اغنيه احلام تناظر الساعه وشفيك متغربل انت شايف الحب كله عيون وهمسة لعبد الحليم حافظ المهم دريت ان الرجال تشابك خطوطه واخذه واستدحه عند الربع واروح لم السواق قلت شف اقرب دوار وارجع فينا خل السمك لهل السمك حنا يكفينا قوطي تونه و يخب علينا قال وصلنا المحل اللي فيه سمك قلت ياعمي خل السمك ببحره المهم مشينا شوي يوم بدا يصوت راع القارب يقول شعور شعور قلت يابن الحلال ارجع ربعي ماعندهم شعور هو يقصد سمك الشعور وانا اقصد ربعي بحالة اغماء يابن الحلال ارجع وحطنا عند اقرب عرفجه ولا طلحه تواليك ويوم رجعنا الى الارض وانا اصحي ربعي ومن صحا قال الله يجزاك خير الله يجزاك خير من شدة الفرح انتهت السالفه وقبل الختام سبحانك اللهم وبحمدك لااله الا انت استغفرك اللهم واتوب اليك ارجوا ان اكون وفقت في سرد هذه السالفه وامتعتكم بها والا حطو برجلي بلكه واجدعوني بالبحر مع اطيب امنيات لكم اخوكم راعي العجراء السالفه كتبتها بدون مراجعه والسموحه اذا كان هناك اخطاء |
| الساعة الآن 12:47 AM |
Powered by vBulletin® Copyright ©2000 - 2026, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir