منتدى استراحات زايد - ما هكذا تورد الأبل..

السلام عليكم ورحمة الله وبركاته.
اما بعد
الطير .. هذا المخلوق العزيز الذي ارتبط بابن الباديه وكان احد مصادر العيش عند الأباء والاجداد. والصقاره هي موروث اخذه الابناء من ابائهم واجدادهم وهي اما ارث واما مكتسبه عن طريق تولع الشخص بالطير. ولكن وحط تحت لكن خط..
قد لاحظت كــ مبتديء بالصقاره اشياء يتعرض لها الطير من اخواني المبتدئين تعتبر ظلم واجحاف بالطير واستئثام بحقه.ومن بعض ما رايت قصر العلف والتطويف الزايد عن اللزوم يطوف الطير يومين وبعضهم يومين ويعطيه رجل سمانا ويطوفه يومين والنتيجه الطير معرض للأمراض ويتعلم الكوشه والحقلان ونقل العلف والصيحه -الصيــــــحه يادافع البلا من الصيحه-وفوق كل هذا يبي الطير يجي على الدعو ولا يستهد ولا يطرد وينه و وين الدعو والهداد وهو هلكان من الجوع.والبعض يشري الطير والطير قافله صنعته يشب عليه بالتطويف عشان ينزل وزنه. ياخي بدال ماتنزل وزنه في اربع ايام نزله في عشره شوي شوي حتى نفس الطير ماتغير ولا يطيح فالطبوع القشر هذي واقسم بالله انه ماينلام ياخوي الادمي لو تطوفه يومين من العيشه طمر وسط الصحن وحقل عليه :d
اكثر الطيور في المحلات السنه ذي كلها فاتحه حساب في تويتر بعضهن يصيح من خلاه في خلاه ماحوله احد من الظلم الي تعرض له.كما هو معروف في المثل العربي
ماهكذا تورد الأبل فانا اقول :ما هكذا ينقل الطير.
اخواني اتقو الله اتقو الله في هذه الأنفس فوالله من احسن اليها قد يرحمه الله بها ومن اساء فالله وليه.

كما اود لفت انتباه الاخوان عن السماني والحمام الي في القرشعه تراه يبي ما وشعير والبعض مايعرف السكين يمصع راس الحمامه مصع !!!يعني وصلنا مرحلة ان الذبح الشرعي قليل تشوفه يقطم رويس الحمام الضعيفه دون خوف من الله او وجل.
اللهم علمنا ما ينفعنا وانفعنا بما علمتنا وزدنا علما.