للحزن في جوفي جموع وطوابير =تنبض بقلبي مثل نبض المنبه
ياليت قلبي فالهوى سآلم الزير =يقسى على اللي فالمحبّه لعبّ به
اوليت لي جنحان وافل وآطير = واشوم عن دربٍ جمعنا واكبّه
حتآني اسلى عن جميع المشآوير = اللي تمرّه فالدروب وتنبّه
وابدله بالحب في واحدٍ غير = يحب شخصي واعتني به واحبّه
والا اللي اجروحه بقلبي مخامير = ويجرح بكل اتقآن ماخاف ربّه
جعله يصد وصدته خير ياطير = ماني بأول من خسر من يحبّه
دايم تخونك فالغيآب التعآبير = ودايم تغيب وغيبتك دون سبّه
كنت آتحدى في غلاك المقآدير = واجمع كلام الناس عنّك واشبّه
واغرق لعينك في بحور التفآكير = واخوض لاجل ارضآك في غبّه
مع السلامه ما لصدّك معآذير = لاتعتذر لي قدمك الريع ذبّه
تبقى الكرامه لو خسرت المخآسير = وجروحي ارحم من علاجك وطبّه