سالفة العم وولد اخوه الي بيتزوج السلام عليكم ورحمة الله وبركاته مسيكم وصبحكم الله بكل خير سالفة وكم بيت حبيت اشاركم فيها .. وأتمنا تنال على استحسانكم هذا سلمكم الله واحد توفي ابوه وهو صغير اسمه أحمد وتبناه عمه خالد وعمه كان له مزرعة من أصغر مزارع القرية إلى ان ربي مبارك له في مزرعته الي تدخل له مايكفيه هو ومرته وبنته الوحيدة نورة وولد اخوه أحمد الموهيم ان احمد من يوم هو صغير واهو يكد ويفلح بهالمزرعه هو ومرة عمه وبنتهم الوحيدة لدرجة الجيران ينادونه باسم عمه "يا ولد خالد" ومرة السنين وكبر أحمد وجاء حول سن زواجه وكل ما جاء يفاتح عمه بالموضوع يا ان عمه يغير الموضوع ولا انه يقوله بعدين ومن هالكلام لضيق اليد والحيلة وصعب انه يدبر له مسكن ومأكل لمرته الجديده حكم ان بيتهم صغير وسط المزرعة الصغيرة الولد كان متفهم الحالة الي هم عايشين فيها فما كان منه بعد فتره الى انه قرر قرار صعب جدا واهو انه يطلب من عمه بنته "نورة" الي عاش معها كأنها اخته إلى ان كبرت وبدت تتلثم عن الغراب وعن احمد اخو الطفولة من غير ام ولا اب ولكن رغم انها تتلثم عنه الى انه مايقضي يوم وهم ما تكلمو مع بعض فيوم من الايام واهو يفلح بهالمزرعة والعائلة كلهم مجتمعين عمه ومرة عمة وبنت عمه نورة قعد يردد هالبيتين على طريقة الموال او الشيلة "حداهن" يــاعم طالبك سمرا سمار الشمس .. تسمر قلبي حكاويها أسمر معاها كل نس .. ما سرت من أماسيها ومشى اليوم واهو ماغير يردد هالبيتين "واذا مانيب واهم انه فيه زياده عليهن لكن هذا الي حفظته" ومن بكره بعد صلاة الفجر ماجاء عمه للبيت الى على شروق الشمس ومعه شيخ القرية دخله وقهواه أحمد وجابو البنت وكتبو الكتاب .. والباقي علومن تسر البال هذا الي عندي وأتمنى انه راق لكم وأعتذر عن القصور |
الساعة الآن 01:24 PM |
Powered by vBulletin® Copyright ©2000 - 2024, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir