منتدى استراحات زايد - قصة حقيقة ليست من نسج الخيال يرويها لكم ( بندر الشريف )

بسم الله الرحمن الرحيم
إخواني أعضاء وزوار مكشات الغالي
السلام عليكم ورحمة الله وبركاته
أسعد الله أيامكم بكل خير وسعادة
لدي قصة وهي حقيقة وليست من نسج الخيال حصلت قبل عشرين سنه تقريبا .. إليكم القصة كاملة :
هذا سلمكم الله واحد من الجماعة مديون وحالته حاله وفيه رجال يطلبه مبلغ والله ماأدري كم بالضبط المهم
راح وأخذ معه أثنين من الجماعة يبغى يخلص هالرجال اللي بهذله من كثر الشكاوي أتصلوا عليه وقالو حنا
بنجيك ونجيب فلوسك معنا قال لهم حياكم الله دخلو على الرجال في بيته والمبلغ ماهو كامل ينقص عشرة ألاف ريال
تقريبا وقالو يابو فلان حنا طالبينك تسمح للرجال في هالعشرة مادرو إلا الرجال يوم حمر وزرق وخضر وجهه
وقام يصارخ ويقول : والله ثم والله ماأرضى إلا بالمبلغ كامل قالو له والله ماعندنا إلا هالمبلغ ونبغاك تساعد الرجال
ظروفة المادية تعبانه والله يعلم بحالته قال لهم والله لجيب المبلغ كامل مكمل ولا تراني بجيب الرشاش وأذبحكم كلكم
وطلع من عندهم زعلان وقفل عليهم باب المجلس بالمفتاح وشوي إلا هم يسمعون صوت الورعان والحريم يصارخون
ويبكون بصوت عالي في الصالة وهم داخل المجلس مقفل عليهم قالو لبعض هذا الرجال معه الرشاش وأكيد أنه ناوينا
هذي والله البلشه قاموا وشالو دولاب كان في المجلس عليه تلفزيون ثقيل وحطوه على الباب عشان مايفتح خايفين من
هالخبل لايذبحهم وبسرعة فائقة أتصلوا على الشرطه قالو الحقو علينا العلم كذا وكذا والرجال ناوي ذبحتنا مافيها كلام
عجلوا علينا وماهي إلا لحظات إلا الشرطة يوم جات وهم يقتحمون شقة الرجال في أسرع وقت ويدخلون ولا الرجال منسدح
طايح في الصالة والزبد يطلع من فمه أثر الرجال معه مرض الصرع الله يشفيه يوم صك الباب وقفله عليهم طاح
وأنصرع على أهله والورعان والحريم يبكون ويصارخون والربع اللي في المجلس يحسبون ان الحريم يردون الرجال
لايدخل عليهم ويذبحهم المهم الشرطه أخذت مفتاح المجلس وفتحت الباب وطلعو الريجيل من المجلس على طول للشارع العام
من الخوف والكارثة إللي حصلت عليهم ولكن الحمد لله جات سلامات وبعد ماطلعو من هالبيت المشئوم
اتصلو على الرجال بعدها بساعات وقالو له يابو فلان الحين نرسلك رجال يعطيك المبلع كامل وعليها حبة راس هههه
أنتهت السالفة وأتمنى أن تنال رضاكم
والسلام عليكم ...