|
راعي العجراء والديك اليتيم السلام علاكم ورحمة الله وبركاته اليكم هذه السالفه تحت عنوان \راعي العجراء والديك اليتيم انتم عارفين راعي العجراء بمايحمله من مواقف طريفه تنساق مع ذهانته المعتاده (ربع قيقا) مايحتاج ذهانه نصف كم وشاتره مع الغسيل يعني كامشه وصايره تقل ثالول بهامه الراس لاشفته تقول منشاف ام صتمه كل الذهانه متحرجمه بهالثالول وباقي الدميجه فاضي شافطها هالثالول المهم سيرت يوم على زميلي في مزرعته الصغيره وكان عنده ديك اعزل يعني وحيد بهذه المزرعه وبما انه وحيد حاط حيله بالاكل لاشفته تقول اشوال رز تمن من كثر ماياكل رز المهم سألت صاحبي ليش هالديك لحاله وين باقي الدجاج قال هالديك سالفته سالفه الديك شراه واحد من عيالي وهو كتكوت صغير وكبر شوي واخذته معي للمزرعه وخليته قلت له بس الحين صار كبير ليه ماجبت له دجاج يوسعن صدره قال كل يوم اقول اباجيب وراحت الايام والى الحين وانا التفت للديك قلت ابشر من يجيب لك دجاجه توسع صدرك معها وبا اخليك تستانس تالي عمرك وبتدعيلي ويوم جاء رد الاسبوع وانا ادخل للسوق واشتري له ذيك الدجاجه المزيونه اللي تلاعب الهواء ملاعب ودلوعه وفيها موقه وتوها شبب بكر مابعد ارضعت يانهودها تقول غطيان ببسي المهم واجيك طالع للمزرعه ومعي الدجاجه الطخماء وانا احكي على هالدجاجه بالطريق واقول ياهالليله ان تهب عليك الصريفه بس تحيزمي الليله ابا ازوجكم وباقول مبارك عرس الاثنين ,,, ليلة خميس وجمعه واللي جمع بين الاثنين ,,, الله يطول في عمره وابا اجرها على الربابه ابا اخليكم تستانسون المهم وصلت المزرعه واخذ الدجاجه ووديها عند الديك ونزلها عنده هالديك حياته ماشاف دجاجه ولا يدري ان بهالدنياء دجاج مايعرف الا صاحبه وكبسة هالرز اللي تنثر له يوم شافها الديك ويبدا يأشر بعيونه ماهو مصدق وهو ياخذ طرف جناحه ويخليه جمع كف يد ويبداء يعرك بعيونه وبدا ياخذ نفس عميق احيان يدخل منقاره بوسط حلقه ماهو مصدق الى الحين وهو يدور على الدجاجه ويطالع فيها باستغراب ماعاد يفكر بالكبسه شاف شي غريب في حياته المهم الديك بدا ينتفض شوي يوم طلعت هدارته قلت خلاص وافق شن طبقه شوي يوم مغط رجليه شوي يوم انسدح على ضهره وشصولت رجليه ويبدا يرتجف يوم هجد ماعاد يتحرك قلت افا يا هالعلم وش الدبره يوم رحت يمه ولاه ميت له اسبوع من الوحشه المسكيت بسرعه عشق وبسرعه مات عاد صاحبي يقول ليتك خليته على طمام المرحوم مع كبسة الرز هذا حياته كلها مابعد شاف الدجاجه وجبتله وحده طخماء وبكر قلت لاتصير انت بعد دخلك العشق اصبر لاتموت خلني اروح لهلي ومت على راحتك انتهت السالفه ارجوا ان اكون وفقت في اخراجها لكم كما ينبغي وقبل الختام سبحانك اللهم وبحمدك لااله الاانت استغفرك واتوب اليك تحياتي لكم ودمتم |
| الساعة الآن 06:27 PM |
Powered by vBulletin® Copyright ©2000 - 2026, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir