منتدى استراحات زايد - سالفة:سوق الزل..قوافي

السلام عليكم ورحمة الله وبركاته
حياكم ربي اخواني واخواتي المكشاتيه
ويامرحبا بزوار خيمتنا الكرام
اليوم شريت دخون ويوم حطيته على المدخنه ام جمر مهوب ام كهرب المالغه شميت ريحة ماضي ماضي بعيد حبيب بكل ثانيه احمله معي واتمنى لدقائق العوده له ولكن :f هيهات:f
تذكرت سوق الزل الجميل بأهله وببضاعته المتنوعه ورائحته المميزه
ارتباط غير طبيعي وأنت تمشي به كأنك بعالم الجمال وحده مركز هنا..
:s سوق الزل:
تتميز بضائعه بما فيها من عراقة الصناعه من مشالح رجاليه وفرا شتويه جاكيتات رجالي إلى بيع السيوف والخناجر والدلال ولوازم الضيافه بمجملها..
ايضاً انواع الزل اللي صعب تمشي من غير ماتلمس احدها بيدك لجمال رسمها ونقشها وخصوصا ان معضمها كان يدوي الصناعه..
ولا ننسى انواع العطور وتاجها البخور او الدخون كما نسميه بالعاميه وانواع الدهون كـــدهن الورد والعود والصندل والمخلط وانواع اخرى لا يحضرني اسمها الان..
أذكر كنا قرب عيد ألأضحى المبارك وكان برد شديد وأمطار وجو مايبيله إلاكشته بريه :l
راح الوالد بيشري جاكيتات لأخواني وانا كني شنطة دكتور وين ماراح معه الله يخليه ويطول بعمره ويحفظه اللهم آمين :s
فيه شايب الله يرحمه حي او ميت على عصبيته عصبي مره وكل من وقف عنده او يبي يشوف شي قال رح رح ما نبيع اليوم مدري وشوله فاتح المحل الله والعالم انه معصب من احد مهوب قصده قطع رزقه:c
ولين هالشايب يبيع دلال وخلافه ويجي هاك الرجال اللي مهندم متكشخ كنه معرس وشكله ولد عز وقعد ينافخ على الشايب ويشتم والشايب يشتم وشو عليه ابد ولا شي ليه صوتك عالي بالسوق والرجال يقول للشايب والله الحين اطى خشمك بها الارض واصك دكانك يـــــــ:mad::mad::mad::mad:
شوي إلا وتلاقطو وبالايدين والرجلين والشايب على كبره الله لا يظره قم وعكرف لها المزبرق وبالدله وطرع طرع على دميجته لين سواله كهف بجمجمته والناس يفكون ويبون يمسكونه وهو ولا كن احد قاظبه والكاشخ انهبل اخذله علكه ما يحلم به وشوي إلا وتجي بنيه يمكن بعمر 7 سنين قالت يبه :D يبه:D يبه:D
قال:
هـــــــاه ان بشرتين ببنت ابفتح جمجمتس واسويلتس كهف مثله
قالت:
لا لا لا امي جابت ولد ولد يبه:D:D
ويصيح الشايب صياح اول مره بحياتي اشوف شي مثل كذا ويركع بالارض وهو يشكر ربي ويصيح:r
اثره على اعصابه عنده كوم بنات ولا ولد وهذا اول واحد يجي الله يعينه يشيل حمل البنيات مع ابوه..
الناس باركت والشايب استسمح الكاشخ المنفلق وذاك سامحه وهو رابط غترته على جبهته المنشقه وانتهت السالفه على مبروك الحصان مبروك الحصان..
تحياتي
اختكم
..قوافي..