منتدى استراحات زايد - النادر اللي راح من شوف عيني,,,,,,,,,,,,,ذراع الذيب

السلام عليكم ورحمة الله وبركاته,,

اسعد الله صباحكم\ ومسائكم جميعا مشرفين واعضاء وزوار منتدى مكشات..
كيف حالكم عساكم طيبين كلنـ بأسمه هذي سالفه سبق وان طرحتها بخيمة مكشات واستراحة صقار العام الماضي

واليوم حبيت اذكرها للجميع واتمنا ان تصل لمستوى سواليفكم الطيبه والجزله..

من كم سنه مضت لفى بديارنا قرناس ابيض بمنطقه عندنا قليل تلقى فيها طواريح..
ونادراً يقنصونها..
المهم لفى هالنادر بهالمنطقه وماحد درى عنه غير(الفلانيه) وحاولوه لمدة 12 يوم..
ومالله كتبه لهم الله يعوضهم بأطيب منه
وتظاريس هالمنطقه صعبه وتكثر فيها الجبال..

لاكن فيها اراضي سهله يقدر الطاروح يحاول فيها لاجذب الطير يمها..

وانتشر خبر هالقرناس وصارت المنطقه تقول بمجيرمه:) ولمدة اسبوع وهي تعج بالقنوص..

ولاحس ولاخبر وماعاد شيف هالقرناس وملّو الطواريح من هالمنطقه..
واتركوها وانا مافارقت هالديره كلي امل اني راح احصله..

وكل صبح ومسا وانا قانصها وخوياني بالساحل افقدوني والارسال بهالديره..
مايصل ولاينسمع وقابلتهم بالساحل مره وقالو وينك مختفى..
اكيد عندك بلى(يعني عندك طير تحاوله:)) وعلمتهم بهاك الديره وقنصناها..
سوى كم مره في الايام اللي مضت لاكن هم من الناس اللي اقنعو منها :) قلت لهم القرناس خابرينه ان شالله ابي احصله..
قالو وينك ياذراع الذيب الطير راح عن الديره من وقت المهم حنا بأقفاية اكتوبر واخر اسبوع..
من اجازتي واخذت الوالد الله يحفظه قنصنا سوى وهي اخر الايام اللي قنصتها..

وجيت لذيك الديار بعد الظهر ووصلت حراويها اللي تشرح النفس..

وحطيت الردار على الطبلون(القطاه) وانصح كل طاروح بهالطريقه تكشف لك السما..
وتكشف لك الحوم اللي مانت بشايفه لولا الله وثم هالقطاه..
وجيت مدرهم وكل شوي وانظر للقطاه والاهذيك النظره اللي من القطاه اللي شعفتني..
ولبدت بعدها على الطبلون تقول كروان وقامت تنظر يم ضلع اتجاهه..
غرب عني تنظر فيه بأتجاه قزاز المعاوني بالسياره وابترم بالجيب ..
والضلع ظله عصر(الفيه) فيته عصريه وقلت في بالي اكيد فيه وقع بالضلع(طير موقع) اربش هالقطاه..
استغربت من خوف هالقطاه من هالوقع والضلع ماهوب قريب وادرجها يم الضلع..
وادربل وعين الشمس بالدربيل وماعاد اشوفه زين..
واطالع بالقطاه وتتحرمس بالطبلون وكنها تبي تدفن نفسها بالتراب وتصيبني ربشه..
وكن الطير متجه يمنا وكنه طار من الضلع وانزل من السياره من الربشه..

ماعاد ادري وش السواه ولاحضات وتقلب القطاه براسها فوق الموتر..
وانظر يم شوفها والاهاك القرنااااااااااااااااااااااااالابيض ااااااااااااااااااااااااااااااس..

ياجماعة الخير انا سرحت ورحت في عالم ثاني واعد دقوق نحره ارتفاعه مرمى شوزن..
ويسبح بجنحانه وينظر يمنا خلاص ماعاد ادري انا في حلم ولا في علم...

لاحظات وكني فقت من الحلم وانا اقول في نفسي وش فيك ياذراع الذيب..
الحق الطير واحذف له تناولت السمانه مشبكه وجاهزه..

وانظر لاتجاه الطير دور دور ياولد وين راح كنه اختفى من الوجود سبحان الله العظيم..
ماكن فيه طير مر من عندنا وادور في حراويه لاكن خلاص اذا فات الفوت ماعاد ينفع الصوت..

اعطاني فرصه لاحذف له لاكنها فاتت تبون وصفه يارياجيل نحره مع راسه تقول غمامه,,
يعلم علي الله دقوقه اعدها عد لون ظهره مع شمس العصر يلمع تقول ذهب يعلم علي الله ,,
(النادر اللي راح من شوف عيني)
قالي ابوي لوكان من نصيبنا وكاتبه الله كان مهدناه واّمنت بالله..
والله يجيب النادر بالسنين الجايه وعزالله ياضفته عندي تسوى دراهمه وان شالله يكون حلاياه مثل هالزين
http://www6.0zz0.com/2011/05/27/18/174793003.png
وحبيت اشكاركم بقصيد العضو مغاليس مطلق الفزران الذي طال عنا غيابه..
واتمنا ان يشاركنا..

#poem_4f3afd4180326 td {font-family: Arial, Helvetica, sans-serif;font-size: large;font-weight: bold;} يامالك الملك فرج حالة الضيقه باللى يسوق الموامى والشبك غشه عايز مثايل ووصفه صعب تصديقه مالوم منهو ليامن زهمله خشه قرناس نادر يسر القلب تسبيقه له حول عامين واكثر تارك ٍ عشه عامين فيها تعلم من توافيقه وفيها عرف فرق خم الراس والنشه نوبات يمرح خلاوى فى شواهيقه ونوب يتعشى ويمرح فى طرف دشه له هقوة ٍ باللحوق وفن تعليقه وبالطلع شوفه يسابر كل منخشه ريشه من الشمس زان وبان تعتيقه ودايم على صنعته ماهو على المشه صافى حمر والعمد تشهد بتوثيقه صافى ولا فيه لا دقه ولا رشه هوفرحة اللى من ضروفه نشف ريقه اللى تهقوى ولكن الزمن غشه !

تكفون لاتنسونا من دعواتكم الصادقه..

وتحياتي لكم,,