منتدى استراحات زايد - صيدي بالقصبات مع الأصدقاء (فيديوهات+شرح الطرق)

السلام عليكم ورحمة الله وبركاته
حياكم الله اعضاء وزوار منتديات مكشات الكرام

هذا الموضوع( شرح لطرق الصيد )في اخر موضوع ليا على المنتدى بعنوان تسحيييييييب بالقصبات (ناجل, جروم, بهار, تونة ثمدان وغيييره)
على الرابط التالي:
http://mekshat.com/vb/showthread.php?t=479943

زي ماوعدتكم بشرح كل طريقة من طرق الصيد بالقصبات ووضع مجموعة فيديوهات لصيدي مع الاصدقاء في مصر بكل طريقة من الطرق التلاتة:
(مجرور- بوبينج - جيجينج)

طبعا الموضوع يجمع 3 طرق فأنا حكتبلكم ان شاء الله كل مايتعلق بكل طريقة ونفتح باب للأسئلة والمناقشة وانا تحت أمركم في اي سؤال لأي شي عشان الموضوع يكتمل..
وحبيت اقلكم الكلام دا كلو من اجتهاد شخصي وتجارب كتيييييييير واستفسارات من الخبراء في هذه الطريقة لأشخاص من دول عربية واجنبية..

أبدأ معاكم بالمجرور عشان معروف للجميع ومايحتاج معلومات كتيرة نسخن شوية للي بعد كدا.

1- المجرور (ترولينج):
ناس كتير تطلع تسوي مجرور وتلف طووول النهار ومن غير فائدة لأنهم ماوضعوا في الاعتبارأهم شي في المجرور: مقاس الرابلة أو الكذابة والمكان وعمق البحر وسرعة البوت.
طبعا ماشاء الله في مواضيع كتيرة تتكلم عن هذه الطريقة فما راح اضيف غير كم معلومة..
انا استخدم عادة في المجرور الربالات أو (الكذابات) وهي امتع في صيد المجرور وتستهدف كل انواع الاسماك والكلام دا يرجع للعمق اللي تنزل اليها الرابلة وعمق البحر اللي تسوي في المجرور..
مثلا لنفرض انك على بحر 40_50 متر.. عندك التونة بأنواعها والدراك والعجام تستخدم لهم رابلة بالكتير 20 قدم لأنها من اسماك السطح نوعا ما والغزر تحتك ماهو كبير..
تبغى تجيب الجروم والثمدان والبهار نزل رابلة 25 الى 30 قدم..
عشان نوصل للطرادي والناجل يحتاج رابلة فوق ال 30 قدم الى 40 قدم..
وقيس على كدا باقي الاعماق.. (لازم يكون في تناسب بين عمق البحر ومقاس الرابلة).
يوجد ألوان كتيرللرابلات أو الكذابات والواحد يحتار ايش يختار بس انا حتكلم عن تجربتي الشخصية..
التونة بأنواعها دايما تضرب على الرابلات اللي تشبه السردين في لونها (كحلي أو ازرق على فضي) والعقام والدراك داااايما يضرب على اللون (الاخضر ) و (الاصفر)
والناجل والشرايف عمرهم ماضربوا معايا غير في لونين (البمبي) أو (البمبي مع أصفر)
وفي لون يسموه (red head) من افففضل الالوان ويضرب عليها اي نوع سمك تجي راسها حمرا وباقي الجسم ابيض.
ندخل على أفضل اماكن للمجروروالسرعة المناسبة..
طبعا حروف الشعب وحروف الطينة والجبال اللي في القاع وحول الجدرة من أفضل الاماكن بس جيب الحرف مظبوط وامشي عليه..
كمان لما نشوف الجياش في البحر (لعف على وش الموية وفي وسطه عدة انواع سمك ترعى من اللعف) لاتحاول تدخل في وسطه بالبوت اكتفي بأنك تقرب منه قدر الامكان وتلف حوليه وان شاء الله يجيك الخير لأنو لما تدخل في وسطه صوت المكاين ودخلة البوت تفجع السمك وماتلاقيه.. تقدر تتعرف على اماكن الجياش من تجمعات الطيور في منطقة معينة.
بالنسبة للسرعة كتير من الناس اشوفهم داعسييييييين ومستني العظمة والرابلة تتشد بس المجرور يحتاج لسرعة خفيفة عشان تعطي الرابلة المشية الصحيحة لها ولو مسكت علبة أي رابلة تشتريها تلاقي مكتوب في ضهرها السرعة المناسبة عشان تمشيها المشية الصح..
باختصار السرعة المناسبة والامثل في المجرور هي (8 كيلو في الساعة) أو (من 3 الى 5 عقدة) لأي نوع رابلات وبالنسبة للخيوط (طبعا انا اتكلم عن الصيد بالقصبات والمكاين) ماتحتاج اكتر من خيط 80 عشان يكون في الماكينة خيط كافي لو الحوتة تبغى تاخد ويتحمل معاك اكبر داهية بس تظبط الفرامل في الماكينة.. وانا عادة استخدم خيوط الحرير من 60 الى 80 ليبرة .
أفضل اوقات الصيد بالمجارير هو فصل الشتاء وتكون فيه برودة المياه زادت واتجهت الاسماك لأعماق قريبة من السطح.
ومن افضل شركات لمعدات الجر (حسب رأيي الشخصي وبعض الخبراء في المجال):
penn-shimano
ومن أفضل انواع الكذابات أو الرابلات:
rapala x-rap
bomber
manns
وهذه صورة لألوان الرابلات اللي اتكلمت عليها والشركات التي ذكرت اسمها..

http://www.mekshat.com/pix/upload05/...k202133_aa.jpg

لو في أي سؤال في أي شي عن الجر انا جاااااااااهز اسأل بس وان شاء الله ماأتأخر عليك وهذه فيديوهات لصيدي انا والاصدقاء بطريقة المجرور..

اول فيديو لمحدثكم مهند مقدم وصيد بهارة

ومعاكم احمد فهيم وسامح غزال و2 تونة سكيب جاك

ونجراشييييي وتسحيب الناااااجل اللي يفتح النفسسسس

واخيرا اختم معاكم المجرور بأبو شراع من صيد وائل فاروق وتم ارجاعه البحر لأنه من الاسماك المهددة بالأنقراض في المياه المصرية وذلك حفاظا على البيئة البحرية

الرجااااء عدم الرد حتى يكتمل الموضوع