منتدى استراحات زايد - غثيث أزمة الخليج

السلام عليكم ورحمة الله وبركاته:
أخواني يمكن هذي السالفة الاولة لي أمامكم ,, فاصبروا علي لو حمّرن الزغيدات(الخدود)وقعدت أفرّك بأصيبعاتي :cool:.
والبركة في حبيب الكل /ناصر العلي بعد ماروى لكم قصة الغثيث, وامتعنا فيها ,وابو علي لو يسولف بلغة غير لغتنا درست على حسابي عشان اتسمع له .
عندها تذكرت غثيث الأزمة:
سالفتنا صارت ايام الغزو العراقي للكويت -الله لايعيده- ومثلكم عارفين خصوصا اهل العاصمة وش جانا من الروعات وبالذات اول ليلة هجوم بصواريخ السكود(الظاهر ان صدام ذاك اليوم هو ضابط خفر:D) لأنها اكثر طبّة صواريخ.:j. بعدها وعلى اثر الجوبنة قلنا مابدّهاش ,,النحشة:burnout2: و كل ارسل عياله خارج العاصمة:redcar: وانا اولهم ’.. لكن الطفش: أجبرنا على التالي:
اتفقت مع مجموعة من الربع والاصدقاء بتجديد بيتنا القديم - بيت شعبي من الحجر والجص يسمونه(مسلّح بس مامعه ترخيص:D) وضبّطناه بالفرش و -تلفزيون كبير -طبعا كل معه رادو ولا تمر عاير الا وتسمع اذاعة البي بي سي((-هنا لوندون -وكررت لكم حرف الواو علشان المذيع محمود الازرق وصوته اللي كنه سماعة مخفوسه))اما التلفزيون فجميع انواع المحطات يجيبها بدون دش ويمكن تسائلون كيف ؟اقول لكم ..بحكم موقعنا القريب من منشآت سكنية دوليه وكل دولة نستقبل بثّها.. وياسلام سلّم معنا حريف هندسة اتصالات:type: ويسحب من ارسالهم واصلا ما يبيله ,الناس فوقنا بالضلع والبث يدحدر علينا-ولعب بلوت وطبخ شقرديه ولا فينا من ينكد الا بعض الملاقط على البلوت ولاّ شخير نايم:o..وهه . ومن ضمن الشلّه من يعمل بالعسكرية وفيهم واحد مقر عمله قريب منا وجاب مرة معه واحد من زملائه(بطل فلمنا الليلة) فيه من اللصقنة والغثاثة والبثارة ما لو وزعت على شعب بأكمله لأفسدته.. وصار الأخ-ابو غثّه- كل ساعة ليته كل يوم وهو محضّر عندنا وأحسن أفعال يسويها يالربع:
1-اذا طق الباب زقارته في يده
2-مايطق طق مسلمين يهبد هبد ,لا من نعومة يده واصابعه اللي كنّهافشق ابو غزال..وكل ضربة يطيح كسرة من برواز الباب(ديكور من الجص ).
3-اول مايدخل لديه المصطلحات التالية:
(هاه !نايمين لهالوقت-ضفوا حوستكم-وين الفطور-اقصروا على الصوت او ارفع عليه-وين فلان يقصد خويّه, يعني اني مااذب نفسي عليكم انا جاي لفلان وترى الضابط يسأل عنه)
4- كل شوي وهو طالع وواقف على الباب وبلبسه الرسمي من زين القيافة وهالمقدمة اللي لاعرّض عليك كنه شايل تلفزيون مع درج.
5- يرّم ماشافه قبل يمسكه.ولا يجيب شي ولا يقط معنا .. لا , كذب الشيطان يقط بس ماهو فلوس , يقط وجهه على قولة اخوانناالكويتيين حتى الدخان .وقال له واحد من اخواني عسى الله يفكّه وكل مسلم منه, قال (عطني زقاره) قال اخوي (كم لك سنة تدخن؟) قال(15سنة)قال (يعني خمسطعش سنة وانت تشحذ) ..ايههههه ..انا اللي انحرجت مهوب هو..:hot:
حاولنا نصرّفه ماش لمحنا له :no2:مافاد صكّينا الباب مامشت عليه بحكم الباب ينفتح بربع رجفة, والشبابيك (درايش طراز مال اول يبه)يسمعنا من وراهاو يصرّ على عدم المغادرة وطلبت منهم يفتحون له بحكم ان بيتنا معروف والناس بتقول فيهم وفيهم.كلمنا خويّه اللي جاي يزمّه مثل غليص قال والله ما اقدر :no:.قلنا ليه ؟ قال انه يعرف مدري من يعرف مدري من يعرف الضابط الفلاني وخاف احتاجه, خبركم(خرشةعسكرية) ..وليتها على هذي وبس المصيبة اللي ماتحملناها فيه وارجوكم دقّوا اللطمة:1-2-3: اكشن:
تكرمون يجينا بالبساطير وان قلناله فكّها ندمنا وان تركناه قهر,,واحد من الربع :looney:يقول (واحالالاه يالـ .. انّه ارحم من هالريحة).
وتعرفون اخوكم يشاور أعضاء الشلّة ..لذا طلبت منهم عقد اجتماع عاجل لحل هالمشكلة,, يالله دخيلك غيرنا حلّوا ازمات دوليه وانا وشلتي احترنا:rolleyes: مع هالـــ علّة ,,لكن خرجنا بالقرار التالي:good2::
طبعا سألتهم بحكم ان أغلب سرياته ما اكون موجود لأني اروح البيت والشباب هم اللي قالوا لي اذا سمع الانذار:alarm: نزل وزنه وطلع فيه خف وصارت مكينته تيربو:redcar: قلت بس لقيتها .والياعندنا فيديو جي في سي اللي بابه ينفتح فوق وسبق ان سجلوا الشباب صوت الانذار كانكم تخبرون:(( ليلة ينخرش المذيع :(ويخرشنا معه))’’ وصار كل ما جانا الغثيث شغلناه:director: ووخّر عنه اليا سمعه ..لا يتهبّدك لأنه لازم يحّضر عند خوياه في المعسكر
وصرنا نفتك منه اكثر الأحيان..لكن من جد المستفيد الاكبر البساس لأنها مربّطه بطونها من الجوع في الشارع ماتحصل شي وهو موجود
والسالفة غلّقت وابشركم الازمة انحلّت كذلك:BUTT1: .اعذروني . ولكم تحياتي.
أخوكم/أبومهنّد