منتدى استراحات زايد - يا عمر شب النار هات المعاميل=يا شوق من قرنه على الردف ضافي

يا عمر شب النار هات المعاميل
يا شوق من قرنه على الردف ضافي

نبي لنا فنجال بِنِ ٍ مع الهـيــــــل
فنجــال يشفـــي للعلـيــل المشــافــي

فنجـالـهـا لا سِـيـق بين الرجاجيل
يشدَا اخضاب مرَدّعــات الاشافـــي

نبــي نداوي جروحهـا بالتعاليـل
ويحلهـا اللــه يالنــديــم السـنافـــي

ومن صد عنا مانبي له محاصيل
لو هو من الادنين برد وعوافـــــي

عرفت وقت اليوم من غير تحليل
ولاني لعثـرات المواليــن رافــــي

ووردك على من لا يوّدك غرابيل
ما اهبلك ياللي للمقفي تصـافــــي

قلته وانـا مسـبوق من قبل بالقيل
قال التميمي بالوفاء عقب شافــي

خِـلان وقت اليوم مـا به تـنافيل
جيـل عقب جيل علاه الحفافــــي

وان كان يرجونك تراهم مقابيل
واليا انقضى اللازم تشوف وتعافي

تظن لك ظنِ ٍ على غير تحصيل
وماشفت في عيني عن القول كافي

وقت به الطيِّب يشوف التهاويل
والرابح اللي من عناها متعــافــي

قالوا نهار وقلت مع الضياء ليل
تراثنــا غطّـت علـيـه السـوافــي

والسلم الاول والوفـاء دمّه السيل
وما هب دب وللمكـارم ينــافـــي

الاّ قلـيـل بيــن تــل وغـرامـيــل
مثـل النجوم البارزات الشوافــي

يـاطالب الجدوى ترى الدرب به ميل
و الله عليـم بغـيـبها والقوافـــي

خلك على الجدي ترى ان رحت لسهيل
مثل الذي يمشي مع الناس حافي

لعل تصدف في طريقك حلاحــيــــل
عن ضيمها تشرب من الجم صافي

ولا بدهـا يا صاحبـي بالتساهيـــل
لا ذعذعـت لك نودهــا لا تخافــي

تجي لـك الايام بكـار مباهــيــل
وجاهـك على كل الوجهات ضافي

هذا و انا ما جيت بالقول تضليل
أيام حبـلـى والقــدر مـا ينافــي

واردهـا لاهـل البخوت المشاكيل
و الشوف عن كثر السواليف شافي

للشـــاعــر/ محمد بـن سليمان بن صالح السحيم رحمه الله