برمجة اكواد الباب - المفتاح - الرموت - حساس مستوى الهوى بالكفر
 

2السلام عليكم
كوني احد ملاك اكسبلورر ومن الناس الي تحب تبحث عن السيارة قبل احطها بيد مهندس واقعد على راسة لين يخلص
المهم قدر الله وشريت اكسبلورر استخدام امريكي
عليه ازرار على الباب
المصيبة ان الكود مجهول
رحت لمبرمجين المفاتيح دلوني على الوكيل كاني ماعرف طريقة
رحت لاكثر من واحد مانفع
لي زميل بشركة فورد ببريطانيا موظف اتصلت عليه وقلت له سالفتي ماقصر قال عطني يوم واجيب لك العلوم
ثاني يوم جاب العلوم السنعة

المهم لجل تحصل على الكود يبيلك كشاف او فلاش الجوال
وتتسلف مراية صغيرة يفضل مراية بودرة المكياج تبع الحريم والبنات كون لها قاعدة وتنطوي
المهم مكانها ضيق وماتقدر تشوفة بالعين المجردة لذا تحتاج المراية لجل تعكس لك
الكود عبارة عن 5 ارقام مطبوعة على علبة الفيوز الثابته تحت المقود من جهة الرفرف داخل السيارة
اذا كان السيارة بها لوحة مفاتيح يصير تلقى ال 5 ارقام مطبوعة وتحتاج تركيز
الي من جدة وماعرف يطلعة يتواصل معاي واخدمة بعيوني
[email protected]

بالنسبة للي يبون يبرمجون كود جديد الطريقة هي
1- تدخل ال5 ارقام في الباب اول مايفتح الباب مباشرة اضغط على 1/2
2- ادخل الرقم الجديد الي تبغاه يكون الرقم السري وهي 5 ارقام
تلقى بشكل الي الباب يتامن وينفتح وهذا يعني انه قبل الكود
انتضر 20 ثانية يطلع من نظام البرمجة
تقدر تبرمج 4 ارقام للباب مع العلم ان الرقم الاساسي ماراح يتغير ابد
--
استخدامات الكود
بعد ادخال الرقم السري
1/2 للبرمجة
3/4 لفتح باقي الابواب
5/6 لفتح الشنطة
7/8 مع 9/0 لتامين السيارة

------
برمجة الرموت
برمجة الرموت للفورد بسيطة وسوي امورك بنفسك
خد رموت جديد او مستخدم مو مهم اهم شيء يكون شغال
افتح السوتش تبع السيارة وقفلها بشكل متتالي لعدد 8 مرات
تلقى التامين تبع الباب يفتح ويقفل وهذا يعطيك اشارة انه دخل نظام برمجة الرموت
اضغط على زر تامين الابواب من الرموت وراح يتامن مباشرة
بذالك قبل البرمجة لو عندك اكثر من رموت تضغط على نفس الزر بعد الرموت الاول مباشرة
ملاحظة: لو عندك اكثر من رموت لازم كلها تتبرمج مع بعض في حال برمجة واحد لحالة يصير تلغي البرمجة عن الاخرى

--
برمجة مفتاح ثالث للسيارة
خد لك مفتاح فورد فيها نظام الامان تقريبا يكلفك 20 الى 30 ريال
لازم يكون عندك المفتاحين الاساسية
1- ادخل المفتاح الاساسي في السوتش وافتح السوتش بدون تشغيل السيارة لمدة 5 ثواني وقفل
2- ادخل المفتاح الثاني في السوتش وافتح السوتش بدون تشغيل السيارة لمدة 5 ثواني وقفل واسحب المفتاح
3- ادخل المفتاح الجديد في السوتش وافتح السوتش لمدة 60 ثانية راح يومض عندك علامة المفتاح بالطبلون وبعدها قفل واسحب المفتاح
ارجع حط المفتاح من جديد تلقاه تبرمج واتشغل ومبروك عليك
يشترط في البرمجية توفر المفتاحين
في حال ماعندك مفتاحين بجدة برمجة المفتاح 80 ريال بشارع الستين
بالتحديد مقابل الاندلس بلازا والسفارة الارترية واحد يماني يبرمجها ب80 ريال مع المفتاح

--
حساس مستوى الكفر
برمجته سهلة لاكن ممكن تتعبك خصوصا لو عندك مسجل غير مسجل الوكالة
1- افتح السوتش وقفلة لعدد 3 مرات متتالية
2- اضغط على دواسة الفرامل واتركة بشكل سريع
3- افتح السوتش وقفلة لعد 3 مرات وخلية بالمرة الثالثة بوضع الفتح
راح تسمع البوري يدق عندك دقة واحدة
وتظهر بالشاشة عندك اشارة لبرمجة الكفر الامامي يسار LF
تحتاج لمغناطيس قوي وصغير تحطة في مكان حساس الكفر بالعادة يكون مواجة البلف
في حال قبول البرمجة يدق عندك بوري لمرة واحدة وتنتقل للكفر الثاني مع عقارب الساعة
لما تكتمل ال 4 كفرات راح يدق البوري عندك مرتين متتالية وبذالك يكون الحساسات تعرفت على السيارة وتبرمجت وتختفي الرسالة من عندك
لاحظ ان عملية البرمجة هذي تحتاج تسويها لو غيرت الحساس او انفك الحساس من مكانة
البرمجة هذي في الوكالة مجانية
ممكن ماتقبل البرمجة في حال غيرت مسجل الوكالة او سويت عليها اي تعديل او اضافة كونه يستخدم نظام ترددي عبر المسجل للاتصال بالحساس

هذا اول موضوع لي اتمنى افيدكم بها وراح اعطيكم كل ماعندي عن المزيونه اكسبلورر لاني اعشقها