منتدى استراحات زايد - راعي العجراء والسنبوسه سالفه قديمه

السلام علاكم ورحمة الله وبركاته
اليكم هذه السالفه القديمه
تقريبا عام 1393 هـ
بعنوان راعي العجراء والسنبوسه

في رمضان عام 1393 او 1394ذهبت الى البطحاء اشتري سنبوسه ولقيمات على السيكل
وكانت البطحاء بعيده عن البيت وصائم وتعب واخوكم راعي العجراءمشتهي سنبوسه
المهم رحت للبطحاء واشتريت
المطلوب وكان الوقت بعد صلاة العصر
ركبت الاغراض على السيكل وربطتها بحبال من زود الحرص على الكرسي الخلفي بكل فرح وسرور
وريحة السنبوسه من زينها تقول حاطها على الدركسون
او حاطها على كرسي صدري ماهو كرسي السيكل الخلفي
تجيب ريحتها الحصني اللي بقندهار
وتجيب البس اللي تحت طاولة مطعم تاج محل بالهند وانا لا شميتها تلصمت اذاني من زينها
تقول راكب طياره كونكورد
وجوع وصيام رايح في خبر كان واخواتها ماجبتهم مخليهم الى الحين بالدار
ماغير كان الحالها
المهم ياطولك ياوقت وياطولك يامشوار
وطول هالمسافه الساني متدلي وصاير لونه ابيض مع زهري من العطش والتعب لاشفته تقول قسيمة مرور
وانا ماغار اقول شد حيلك ياراع العجراء مابقى الا شوي وتاصل ومن بغى الدح ماقال اح
وماتضيق الا عند الله الفرج
ويوم وصلت حول البيت مابقى الا الف على اخر شارع فيه بيتنا رابع بيت على اليسار يعني وصلت البيت والمغرب قرب يأذن افرح يارع العجراء اللحين تفطر وتاكل السنبوسه
مع افمك واذانك وكل حتى تشبع
المهم يوم بغيت الف الا السنبوسه تطيح من السيكل بجيت سياره وهو يادافع البلا ينصاها
ولاتصير الا تحت الكفر يوم لزقت بالارض ماتنقشع لو تجيب كريك افغاني
ويافرحه ماتمت حصني قندهار رجع لهله مكسور الخاطر وبس الهند صوى له صويتين من القهر وعلى اقرب رحله مثل ماجا راح وراعي العجراء يهيم عبر امواج ريحة السنبوسه حتى عامنا هذا
وش الدبره يافريح
ماعاد فيه سنبوسه ولا لقيمات
انتهت السالفه والله يحفظ الجميع
وقبل الختام سبحانك اللهم وبحمدك لااله الا انت استغفرك اللهم واتوب اليك
دمتم بالف عافيه وعافيه